ᤋᤥᤗᤡᤱᤛᤥᤔᤢ 50
50
1ᤕᤢᤛᤢᤑᤧᤴ ᤁᤢᤶᤒᤠᤖᤧ ᤁᤢᤛᤶᤎᤠᤱ ᤛᤠᤶᤒᤥᤴ ᤑᤴᤇᤡᤱᤅᤠᤱ ᤜᤠᤒᤧ. ᤜᤧᤰᤁᤩᤠᤱ ᤂᤢᤏᤧ᤹ ᤆᤢᤵ ᤔᤧᤳᤋᤢ॥ 2ᤂᤧᤒᤩᤠᤱ ᤕᤢᤛᤢᤑᤖᤧ ᤂᤢᤏᤧ᤹ ᤁᤢᤛᤧᤘᤠ ᤁᤧᤈᤥ᤺ᤰᤐᤠ ᤛᤡᤍᤠ᤹ᤛᤠᤶᤒᤠᤜᤠ᤹ ᤁᤢᤶᤒᤠᤖᤧ ᤁᤢᤎᤰᤁᤥ ᤁᤢᤏᤠᤶᤃᤧᤏᤢ᤹ᤒᤠ ᤏᤡ᤺ᤱᤃᤣ᤹ ᤜᤢ᤺ᤵᤐᤠᤱᤄᤢᤛᤡ॥ ᤂᤧᤸᤗᤧᤆᤥᤃᤢᤸᤗᤧ ᤕᤠᤁᤢᤒᤖᤧ ᤁᤢᤈᤣᤀᤥ ᤁᤢᤏᤠᤶᤃᤧᤏᤢ᤹ᤒᤠ ᤏᤡ᤺ᤱᤃᤣ᤹ ᤔᤧᤜᤢ᤺ᤳᤋᤢ॥ 3ᤀᤰᤂᤣ ᤆᤥ᤺ᤰᤔᤠᤖᤧ ᤗᤠᤃᤡ ᤗᤡᤒᤥᤱ ᤕᤧᤴ ᤌᤠᤖᤡᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤘᤕᤧ॥ ᤂᤢᤏᤧ᤹ ᤁᤢᤗᤠᤃᤡ ᤔᤡᤛᤪᤡᤜᤠ᤹ᤀᤠᤱ ᤏᤢᤒᤥᤱ ᤕᤧᤴ ᤌᤠᤖᤡᤰ ᤔᤧᤖᤡᤱ ᤔᤧᤎᤰᤋᤧ॥
4ᤂᤢᤏᤧ᤹ ᤁᤢᤗᤠᤃᤡ ᤔᤧᤖᤡᤱ ᤌᤰᤔᤠ ᤕᤧᤶ ᤆᤢᤖᤧᤀᤠᤱ ᤕᤢᤛᤢᤑᤧᤴ ᤑᤠᤖᤥᤸᤗᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤏᤢ ᤀᤰᤂᤣᤗ᤹ᤖᤡᤰ ᤜᤧᤏᤠ ᤔᤕᤧ. “ᤂᤧᤏᤡ᤹ ᤗᤢᤱᤔᤠ ᤀᤠᤃᤧᤍᤢᤰᤋᤡᤏᤧᤑᤃᤪ ᤁᤴ ᤀᤠᤒᤠ᤺ᤴᤏᤡᤴ ᤑᤠᤖᤥ᤺ᤸᤗᤥ ᤋᤣ᤹ᤖᤧ ᤀᤠᤒᤡᤖᤧ᤹ᤀᤥ॥ 5ᤀᤠᤶᤒᤠᤖᤧ ᤀᤰᤂᤣ ᤐᤠ᤺ᤳᤋᤢᤖ ᤂᤢᤏᤧ᤹ᤏᤢ ᤔᤠᤱᤜᤧᤰᤛᤡᤱᤔᤠ ᤐᤠᤱᤄᤠᤱ. ‘ᤀᤠᤱᤃᤠ᤹ ᤛᤡᤔᤠ ᤀᤡ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ ᤁᤏᤠᤏ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤀᤠᤒᤠᤅᤣ ᤋᤕᤢᤱᤅᤠᤱ ᤁᤧᤏᤧᤒᤠ ᤀᤠᤀᤡᤐᤢᤱᤅᤥ ᤀᤠᤱᤃᤠ᤹ ᤗᤢᤵᤋᤠᤱᤅᤧ᤹ᤀᤥ॥’ ᤀᤠᤱᤃᤠ᤹ ᤐᤣ᤺ᤰᤔᤠ ᤀᤠᤓᤠ᤺ᤰᤋᤧ᤹ ᤜᤧᤰᤁᤩᤠᤱ ᤀᤠᤶᤒᤠ ᤂᤧᤵᤔᤥ ᤗᤢᤵᤋᤢᤱᤎᤠᤱ ᤂᤧᤒᤩᤠᤱ ᤏᤢ᤺ᤱᤅᤠ ᤑᤧᤴᤏᤠᤖᤥ॥” #ᤋᤥᤗᤡᤱ ᥊᥍:᥈᥏-᥉᥇
6ᤑᤠᤖᤥᤸᤗᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤔᤠᤱᤜᤧᤰᤛᤡᤱᤔᤠ ᤁᤧᤒᤠᤱᤄᤧᤒᤠ ᤀᤡᤛᤡ᤺ᤰ ᤐᤣᤃᤧ᤹ᤀᤠᤱ ᤁᤧᤶᤒᤠ ᤗᤢᤵᤋᤧ᤹॥”
7ᤂᤧᤸᤗᤧᤆᤥᤃᤢᤸᤗᤧ ᤁᤢᤶᤒᤠ ᤗᤢᤵᤛᤧ ᤕᤢᤛᤢᤑᤧᤴ ᤐᤣᤃᤧ॥ ᤂᤢᤏᤧ᤹ᤏᤢ ᤑᤠᤖᤥᤸᤗᤧ ᤁᤧᤖᤧᤰ ᤁᤢᤛᤢᤜᤠᤱᤃᤧᤶᤒᤠᤜᤠ᤹. ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤜᤧᤰᤁᤩᤠᤱ ᤔᤡᤛᤪᤒᤠ ᤁᤧᤖᤧᤰ ᤁᤧᤕᤧᤰᤐᤠ ᤕᤶᤒᤠ ᤔᤏᤠᤜᤠ᤹. 8ᤜᤧᤰᤁᤣᤗ᤹ᤖᤡᤰᤁᤣ ᤕᤢᤛᤢᤑᤖᤧ ᤁᤧᤖᤧᤰ ᤁᤢᤜᤡᤶᤛᤕᤱᤜᤠ᤹. ᤂᤢᤏᤧ᤹ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤜᤧᤰᤁᤩᤠᤱ ᤁᤢᤶᤒᤠᤖᤧ ᤁᤢᤜᤡᤶᤛᤕᤱ ᤁᤧᤖᤧᤰ ᤔᤧᤒᤣ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤅᤧ᤺ᤰᤘᤠᤛᤠᤜᤠ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤡᤳ ᤔᤧ᤺ᤴᤍᤠᤰ ᤗᤢᤵᤜᤠ᤹ᤖᤰ ᤃᤥᤛᤣᤴᤏᤥ ᤔᤧᤗᤧᤖᤢ ᤔᤧᤎᤛᤡ॥ 9ᤂᤢᤴᤇᤡ᤹ᤏᤢ ᤀᤴᤗᤠᤎᤠᤜᤠ᤹ ᤏᤢ ᤀᤴ ᤁᤧᤕᤢᤰᤐᤠᤜᤠ᤹ᤀᤠᤱ ᤔᤧᤒᤣ॥ ᤂᤧᤴ ᤆᤣ ᤛᤠᤛᤧ ᤁᤧᤒᤣ᤺ᤰᤐᤠ ᤗᤳᤇᤠ ᤕᤶᤒᤠ ᤔᤏᤠᤗᤢᤵ ᤔᤧᤘᤕᤧ॥
10ᤂᤧᤱᤜᤠ᤹ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤀᤠᤋᤠᤍᤖᤧ ᤁᤢᤄᤠ᤺ᤸᤗᤠᤀᤥ ᤔᤧᤃᤧᤖᤧᤸᤗᤧ. ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤋᤢᤃᤧᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤔᤧᤖᤡᤱ ᤔᤧᤎᤰᤋᤧᤖ ᤔᤧᤜᤠᤒᤧ॥ ᤜᤧᤰᤁᤩᤠᤱ ᤂᤧ᤹ᤕᤥ ᤕᤢᤛᤢᤑᤧᤴ ᤁᤢᤶᤒᤠᤖᤧ ᤁᤢᤗᤠᤃᤡ ᤏᤢᤛᤡ ᤕᤧᤴ ᤌᤠᤖᤡᤰ ᤔᤧᤖᤡᤱ ᤌᤰᤋᤧ॥ 11ᤂᤧᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤁᤏᤠᤏᤡᤜᤠ᤹ᤖᤧ ᤀᤠᤋᤠᤍᤖᤧ ᤁᤢᤄᤠ᤺ᤸᤗᤠᤀᤥ ᤔᤧᤖᤡᤱ ᤔᤧᤎᤰᤋᤧᤒᤠ ᤔᤧᤏᤡᤛᤢᤀᤠᤱ ᤔᤧᤒᤠ᤺ᤳᤋᤢ. “ᤁᤱᤃ ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤕᤶᤒᤠ ᤔᤧᤖᤡᤱᤖᤇ॥” ᤂᤧᤸᤗᤧᤆᤥᤃᤢᤸᤗᤧ ᤕᤷᤍᤏᤧᤸᤗᤧ ᤁᤢᤕᤠᤀᤥᤒᤠ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤜᤠᤒᤡᤗ-ᤔᤡᤛᤪᤀᤡᤔ#᥋᥆:᥇᥇ ᤜᤠᤒᤡᤗ-ᤔᤡᤛᤪᤀᤡᤔ—ᤁᤴ ᤔᤡᤱᤅᤧᤸᤗᤧ ᤁᤢᤒᤣᤴ ᤜᤡᤒᤪᤢᤀᤥ “ᤔᤡᤛᤪᤒᤠ ᤔᤏᤠᤜᤠ᤹ ᤔᤧᤖᤡᤱ ᤔᤧᤎᤰᤐᤠ” ᤜᤧᤰᤁᤣ ᤂᤧᤶᤍᤧᤳ॥ ᤔᤧᤕᤢᤰᤂᤢ॥
12ᤀᤰᤂᤣᤗ᤹ᤖᤡᤰ ᤕᤠᤁᤢᤒᤖᤧ ᤔᤧᤳᤋᤢᤛᤡᤒᤠ ᤜᤧᤰᤁᤣᤀᤣ ᤁᤢᤛ᤻ᤛᤠᤜᤠ᤹ᤖᤧ ᤔᤧᤈᤥᤃᤢ॥ 13ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤏᤧ᤹ ᤁᤏᤠᤏ ᤌᤠᤖᤡᤰᤁᤣ ᤔᤧᤍᤣ᤹ᤖᤢ. ᤜᤧᤰᤁᤩᤠᤱ ᤜᤡᤳᤋᤡ ᤀᤧᤐᤪᤥᤏᤧᤸᤗᤥᤗᤠᤶ ᤀᤒᤪᤠᤜᤠᤶᤔᤧᤸᤗᤧ ᤀᤡᤐᤢᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤀᤡᤅᤢᤒᤠ ᤑᤢᤰᤁᤢᤴ. ᤜᤧᤰᤁᤩᤠᤱ ᤔᤔᤪᤣ᤺ᤸᤗᤧ ᤁᤢᤒᤣᤛᤠᤱᤒᤠ ᤔᤰᤐᤣᤗᤠᤒᤠ ᤐᤩᤠᤱᤛᤡᤀᤥ ᤁᤧᤏᤧᤒᤠ ᤑᤢᤰᤁᤢᤀᤥ ᤂᤢᤏᤧ᤹ ᤔᤧᤗᤢᤵᤋᤢ॥ #ᤛᤣ᤺ᤰᤕᤢᤰ ᥍:᥇᥌ 14ᤁᤢᤶᤒᤠ ᤗᤢᤵᤋᤢ ᤛᤢᤖᤢᤀᤠᤱ ᤁᤢᤶᤓᤢ᤹ᤛᤡ ᤜᤧᤰᤁᤩᤠᤱ ᤁᤢᤶᤒᤠ ᤁᤢᤗᤢᤵᤛᤧ ᤁᤧᤒᤣ᤺ᤰᤐᤠ ᤁᤧᤖᤧᤰᤏᤢ ᤛᤥᤖᤡᤰ ᤕᤢᤛᤢᤑᤧᤴ ᤔᤡᤛᤪ ᤏᤢ᤺ᤰᤂᤧ॥
ᤕᤢᤛᤢᤑᤖᤧ ᤁᤢᤶᤓᤢ᤹ ᤁᤢᤴᤛᤠᤜᤠ᤹ ᤜᤠᤱᤜᤠᤱ ᤔᤧᤳᤋᤢᤛᤡ᤹
15ᤂᤢᤴᤇᤡ᤹ ᤐᤠᤴ ᤔᤠᤛᤡᤱᤒᤠ ᤔᤧᤏᤡᤛᤢᤀᤠᤱ ᤕᤢᤛᤢᤑᤖᤧ ᤁᤢᤶᤓᤢ᤹ᤛᤡ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤸᤗ ᤕᤢᤛᤢᤑᤖᤧ ᤀᤠᤏᤡ᤹ᤏᤢ ᤏᤡᤱᤔᤡ ᤆᤥᤃᤢᤀᤡᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤜᤢᤅᤢᤀᤡᤖᤥ॥” 16ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢᤀᤠᤱ ᤀᤡᤱᤄᤱ ᤔᤧᤜᤠᤰᤋᤢ. “ᤛᤡᤔᤠᤏᤢ᤺ᤸᤗᤧ ᤋᤃᤡ ᤁᤧᤶᤒᤠᤖᤧ ᤀᤰᤂᤣᤍᤱᤒᤠ ᤀᤡᤱᤈᤠᤱ ᤐᤡᤖᤡᤃᤧᤀᤠᤱ ᤘᤕᤧ. 17‘ᤂᤡᤏᤡ᤹ ᤕᤢᤛᤢᤑᤧᤴ ᤔᤧᤳᤋᤧᤶᤔᤧ᤹. ᤁᤧᤶᤓᤢ᤹ᤛᤡᤖᤧ ᤂᤧᤏᤧ᤹ᤀᤥ ᤔᤧᤈᤥᤃᤢᤒᤠ ᤗᤠᤕᤥᤴ ᤏᤢ ᤋᤠᤵᤑᤧ᤺ᤸᤗᤡᤰ ᤁᤧᤶᤔᤧᤳᤋᤧᤒᤠᤴ ᤗᤧᤵᤔᤡ ᤐᤡᤖᤧᤛᤧ᤹ᤀᤥ॥’ ᤀᤠᤸᤗ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ. ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤗᤧᤵᤔᤡ ᤀᤠᤒᤡᤖᤧ᤹ᤀᤥ॥” ᤂᤧᤱᤜᤠ᤹ᤖᤧ ᤀᤰᤂᤣᤍᤱᤒᤠ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤕᤢᤛᤢᤑᤧᤴ ᤜᤠᤒᤧ॥
18ᤂᤢᤏᤧ᤹ ᤁᤢᤶᤓᤢᤜᤠ᤹ᤀᤠᤱ ᤔᤧᤓᤧᤖᤧᤀᤠᤱ ᤂᤢᤏᤧ᤹ ᤁᤢᤍᤃᤡ ᤛᤠᤶᤒᤥᤴ ᤔᤧᤓᤴᤇᤡᤱᤗ ᤔᤧᤔᤧᤳᤋᤢ. “ᤀᤥᤔᤧᤳᤋᤧ᤹. ᤀᤠᤏᤡᤃᤣ ᤂᤧᤏᤧ᤹ ᤁᤧᤕᤥ᤺ᤃ᤻ᤒᤠᤛᤡᤃᤧᤖᤥ॥”
19ᤁᤖ ᤕᤢᤛᤢᤑᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤧᤃᤡᤛᤧᤶᤔᤡᤴᤏᤧ᤹. ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤢᤱᤒᤠ ᤋᤧᤴᤏᤥ ᤘᤠ᤹ᤀᤠᤒᤡ᥅ 20ᤂᤡᤏᤡ᤹ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤁᤧᤀᤡᤳᤋᤢᤶᤔᤠᤱ ᤁᤧᤘᤕᤡ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤒᤠ ᤂᤧᤴ ᤕᤠ᤺ᤶᤒᤰᤁᤥᤗᤠᤶ ᤏᤢᤒᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ. ᤀᤠᤀᤡᤴ ᤐᤥᤱᤗ ᤐᤵᤐᤠ ᤜᤧᤰᤁᤣᤀᤣ ᤕᤖᤡᤰ ᤔᤏᤠᤜᤠ᤹ ᤔᤧᤜᤡᤱᤅᤠᤱ ᤔᤧᤘᤠ᤹ᤖ॥ 21ᤂᤧᤸᤗᤧᤆᤥᤃᤢᤸᤗᤧ ᤔᤧᤃᤡᤛᤧᤶᤔᤡᤴᤏᤧ᤹. ᤂᤡᤏᤡ᤹ ᤏᤢ ᤂᤡᤏᤡ᤹ ᤛᤠᤜᤠ᤹ ᤁᤧᤖᤧᤰ ᤀᤠᤱᤃᤠ᤹ ᤜᤡᤱᤏᤡᤱ᤹॥” ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤂᤧᤱᤜᤠ᤹ ᤜᤠᤱᤜᤠᤱ ᤔᤧᤳᤋᤢᤛᤡ ᤜᤧᤰᤁᤩᤠᤱ ᤗᤧᤔᤢᤛᤡᤖᤥ॥
ᤕᤢᤛᤢᤑᤧᤴ ᤔᤠᤛᤡᤱ᤹
22ᤕᤢᤛᤢᤑ ᤏᤢ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤜᤡᤶᤛᤕᤱᤜᤠ᤹ ᤔᤡᤛᤪᤀᤥᤀᤣ ᤔᤧᤕᤢᤅᤧ. ᤜᤧᤰᤁᤩᤠᤱ ᤕᤢᤛᤢᤑᤧᤴ ᤁᤡᤵ ᤌᤡᤰᤁᤠᤱ ᤌᤡᤒᤥᤱ ᤋᤱᤒᤣ ᤜᤡᤅᤧ॥ 23ᤕᤢᤛᤢᤑᤖᤧ ᤀᤣᤑᤪᤠᤀᤡᤔᤧᤸᤗᤧ ᤁᤢᤔᤢᤔᤧᤴᤇᤠ᤹ ᤌᤠᤖᤡᤰᤁᤠᤱ ᤏᤡᤛᤢ॥ ᤔᤏᤛ᤻ᤛᤣᤖᤧ ᤁᤢᤛ᤻ᤛᤠ ᤔᤠᤁᤡᤖᤖᤧ ᤂᤠᤖᤰ ᤁᤧᤒᤥᤱᤒᤠ ᤁᤢᤛ᤻ᤛᤠᤜᤠ᤹ᤀᤠᤱ ᤕᤢᤛᤢᤑᤖᤧ ᤁᤢᤎᤢᤱᤒᤥᤀᤥ ᤔᤧᤕᤢᤰᤂᤢᤛᤡ॥
24ᤂᤧᤒᤩᤠᤱ ᤕᤢᤛᤢᤑᤖᤧ ᤁᤢᤶᤓᤢ᤹ᤛᤡ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤛᤡᤔᤠ ᤕᤧᤶ ᤁᤧᤖᤧ. ᤁᤖ ᤛᤧᤰᤂᤠᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤓᤠ᤹ᤖᤡᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤴ ᤔᤡᤛᤪ ᤗᤠᤈᤣ᤹ᤗᤠᤶᤒᤠ ᤀᤠᤒᤪᤠᤜᤠᤶ. ᤀᤡᤛᤜᤠᤁ ᤜᤧᤰᤁᤩᤠᤱ ᤕᤠᤁᤢᤒᤧᤴᤏᤢ ᤔᤠᤱᤜᤢᤵ ᤆᤥᤃᤢᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤍᤣ᤹ᤖᤡᤖᤥ॥” 25ᤜᤧᤰᤁᤩᤠᤱ ᤕᤢᤛᤢᤑᤖᤧ ᤀᤡᤛᤪᤠᤀᤡᤗᤖᤧ ᤁᤢᤛ᤻ᤛᤠᤜᤠ᤹ ᤔᤠᤱᤜᤧᤰᤛᤡᤱᤔᤠ ᤐᤠᤱᤄᤢᤛᤡᤀᤠᤱ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤀᤥᤃᤧᤔᤧᤳᤋᤡᤖᤥ. ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤀᤠᤕᤧᤵᤐᤠᤜᤠ᤹ ᤁ᤹ᤕᤥᤗᤠᤶ ᤂᤧᤴ ᤗᤠᤈᤣ᤹ᤀᤥ ᤋᤣ᤹ᤖᤧᤶᤔᤧ᤹ᤀᤥ॥” #ᤗᤠ ᥇᥉:᥇᥏; ᤕᤜᤥ ᥈᥊:᥉᥈; ᤜᤡᤒᤪᤢ ᥇᥇:᥈᥈
26ᤀᤰᤂᤣᤗ᤹ᤖᤡᤰ ᤕᤢᤛᤢᤑᤧᤴ ᤁᤡᤵ ᤌᤡᤰᤁᤠᤱ ᤌᤡᤒᤥᤱ ᤋᤱᤒᤣ ᤁᤧᤖᤧᤸᤗᤧ ᤔᤠᤛᤡᤱ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤢᤎᤰᤁᤥ ᤁᤢᤏᤠᤶᤃᤧᤏᤢ᤹ᤒᤠ ᤏᤡ᤺ᤱᤃᤣ᤹ ᤔᤧᤜᤢ᤺ᤳᤋᤢᤀᤠᤱ ᤆᤣ ᤛᤴᤍᤥᤰᤁᤥ ᤔᤧᤃᤣ᤺ᤳᤋᤢᤀᤠᤱ ᤔᤡᤛᤪᤀᤥᤀᤣ ᤔᤧᤏᤧᤛ᤻ᤛᤢᤖᤥ॥
Zvasarudzwa nguva ino
ᤋᤥᤗᤡᤱᤛᤥᤔᤢ 50: LIFOTNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2009, 2023, Wycliffe Bible Translators, Inc. All rights reserved.