ᤗᤠᤶᤍᤡᤰ 3
3
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠᤴ ᤀᤢ᤺ᤳᤋᤢ
1ᤀᤠᤸᤗ ᤔᤥᤛᤠ᤺ᤸᤗᤧ ᤂᤢᤏᤧ᤹ ᤁᤢᤴᤏᤢ᤺ᤵᤐᤠ ᤔᤡᤍᤩᤠ᤺ᤴᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤡᤋᤪᤥ᤺ᤸᤗᤧ ᤁᤢᤔᤧᤸᤗᤢᤰ ᤁᤢᤔᤧ᤺ᤴᤍᤠᤜᤠ᤹ ᤆᤠᤖᤠᤶᤛᤢᤛᤡᤖ ᤘᤕᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤸᤗᤢᤰ ᤔᤧ᤺ᤴᤍᤠᤰᤜᤠ᤹ ᤆᤠᤖᤠᤶᤛᤢᤛᤡᤖ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤡᤸᤗᤧ ᤏᤠᤎᤠ᤺ᤶᤒᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤃᤥ᤺ᤰᤔᤠ ᤜᤥᤖᤣᤒ ᤌᤠᤖᤡᤰ ᤋᤣ᤹ᤖᤢᤛᤡ॥ 2ᤂᤧᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤎᤡᤰ ᤑᤠᤳᤋᤠᤵᤐᤡᤸᤗᤧ ᤁᤢᤗᤢᤶᤔᤥ ᤁᤧᤍᤡ᤺ᤵᤐᤠᤖ ᤁᤧᤒᤵᤐᤠ ᤔᤡᤖᤠ᤺ᤰ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤍᤃᤡ ᤏᤡᤎᤠ᤺ᤶᤛᤡᤱ॥ ᤔᤥᤛᤠ᤺ᤸᤗᤧ ᤑᤠᤳᤋᤠᤵᤐᤡᤴ ᤔᤡᤍᤡᤃᤧᤖ ᤐᤳᤇᤧᤒᤠ ᤏᤡᤛᤢ. ᤜᤧᤰᤁᤣᤛᤠᤱ ᤂᤧᤴ ᤂᤠᤵᤐᤢᤌᤩ᤺ᤱ ᤔᤧᤒᤥ᤺ᤰᤂᤧᤴ॥ 3ᤂᤧᤸᤗᤧᤆᤥᤃᤢᤸᤗᤧ ᤔᤥᤛᤠ᤺ᤸᤗᤧ ᤁᤢᤏᤡᤱᤘᤠ᤹ᤀᤥ ᤐᤠ᤺ᤳᤋᤢ. “ᤀᤠᤸᤗ ᤀᤠᤱᤃᤠ᤹ ᤏᤡ᤺ᤳᤋᤠᤱ ᤐᤣ᤺ᤰᤁᤠᤀᤠᤱ ᤁᤴ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤏᤡᤴ ᤀᤥᤔᤧᤳᤋᤢᤱ᤹॥ ᤂᤧᤴ ᤑᤠᤳᤋᤠᤵᤐᤡᤴ ᤌᤣᤀᤠᤱ ᤔᤡᤔᤧᤍᤡᤰᤏᤧᤶᤒᤠᤖᤧᤳᤇ᥅”
4ᤀᤠᤸᤗ ᤀᤥᤔᤧᤵᤔᤠᤖᤧ ᤗᤠᤃᤡ ᤔᤥᤛᤠᤴ ᤂᤧᤳᤏᤠ ᤗᤧᤵᤔᤠᤱ ᤐᤣᤒᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤏᤡᤛᤢ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤑᤠᤳᤋᤠᤵᤐᤡᤸᤗᤧ ᤁᤢᤗᤢᤶᤔᤥᤗᤠᤶ ᤀᤰᤂᤣ ᤔᤧᤳᤋᤢ. “ᤔᤥᤛᤠᤀᤣ. ᤔᤥᤛᤠᤀᤣ᥄”
ᤔᤥᤛᤠ᤺ᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤱᤃᤠ᤹ ᤁᤵᤔᤥ ᤘᤠ᤹ᤀᤠᤖᤥ॥”
5ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤳᤋᤢ. “ᤏᤡ᤺ᤳᤋᤠᤱ ᤔᤧᤓᤧᤖᤧᤴᤏᤧ᤹॥ ᤂᤧᤏᤧ᤹ ᤁᤧᤗᤠᤱᤛᤢ᤺ᤵᤐᤡᤴ ᤑᤧᤴᤍᤧ᤹ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤛᤣᤛᤣᤒᤠᤍᤧᤴᤏᤥ ᤁᤧᤕᤧᤵ॥” 6ᤂᤢᤏᤧ᤹ ᤀᤠᤸᤗᤛᤠᤱ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤁᤧᤶᤒᤠ ᤁᤧᤴᤎᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥” ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤁᤢᤏᤠᤖᤠᤴ ᤋᤧᤵᤋᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤥᤔᤧᤵᤔᤠ ᤁᤡᤛᤧ॥
7ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. “ᤔᤡᤛᤪ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡᤀᤠᤱ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤖ ᤔᤧᤕᤠᤰ. ᤂᤧᤴ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹॥ ᤕᤠ᤺ᤶᤒᤰᤁᤥ ᤔᤏᤠ ᤁᤧᤓᤶᤒᤠ ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤛᤧᤶᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤴ ᤀᤠᤱᤃᤠ᤹ ᤂᤧᤵᤛᤢᤱᤅᤠᤱ ᤘᤠ᤹॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤢᤰᤂᤣᤴ ᤏᤢ ᤁᤧᤛᤠᤰᤐᤠ ᤔᤧᤍᤢᤔᤢᤒᤠᤴ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱ᤹॥ 8ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤋᤠᤱᤛᤧ᤺ᤵᤔᤠᤛᤡᤖᤧ ᤗᤠᤃᤡ ᤏᤢ ᤔᤡᤛᤪ ᤗᤠᤈᤣ᤹ᤗᤠᤶ ᤗ᤺ᤵᤔᤠᤛᤡᤀᤠᤱ ᤗᤳᤇᤠ ᤋᤠᤶᤍᤠᤶᤒᤠ ᤗᤠᤈᤣ᤹ᤀᤥ ᤁᤧᤵᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤌᤩᤠᤱᤅᤠᤱ ᤘᤠ᤹ᤀᤠ॥ ᤂᤧᤴ ᤗᤠᤈᤣᤴ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤆᤥᤰ.#᥉:᥎ ᤁᤴ ᤑᤠ᤹ᤀᤡᤴ ᤛᤠ᤹ᤖᤡᤰ ᤕᤖᤡᤰ ᤐᤥᤃᤢᤃᤧᤴ ᤁᤢᤈᤠ ᤁᤧᤎᤥ᤺ᤰᤐᤠ ᤗᤠᤈᤣ᤹ ᤂᤧᤵᤔᤥ ᤀᤠᤸᤗᤥ ᤁᤏᤠᤏᤡ. ᤜᤡᤳᤋᤡ. ᤀᤣᤔᤥᤖᤡ. ᤐᤖᤡᤈ᤻ᤈᤡ ᤜᤡᤒ᤻ᤒᤡ ᤏᤢ ᤕᤒᤢᤛᤡᤜᤠ᤹ ᤔᤧᤕᤢᤱ᤹॥ 9ᤀᤠᤱᤃᤠ᤹ ᤛᤧᤰᤂᤠᤀᤣ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤠ᤺ᤵᤔᤠ ᤑᤡ᤺ᤰᤔᤠᤴ ᤂᤧᤵᤛᤢᤱᤅᤠᤱ ᤘᤠ᤹ ᤜᤧᤰᤁᤩᤠᤱ ᤔᤡᤛᤪᤡᤜᤠ᤹ᤖᤧ ᤀᤠᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤖ ᤔᤧᤘᤠ᤹ ᤀᤠᤱᤃᤠ᤹ ᤂᤧᤴ ᤏᤡᤛᤢᤱᤅᤠᤱ ᤘᤠ᤹॥ 10ᤀᤠᤸᤗ ᤀᤠᤱᤃᤠ᤹ ᤂᤧᤏᤧ᤹ ᤔᤡᤛᤪ ᤗᤠᤈᤣ᤹ᤒᤠ ᤜᤠᤱᤅᤧᤀᤥ ᤐᤠᤱᤏᤧᤖ ᤐᤳᤋᤠ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤂᤧᤸᤗᤧ ᤁᤢᤗᤠᤈᤣ᤹ᤗᤠᤶᤒᤠ ᤁᤧᤍᤡ᤺ᤰᤋᤢᤛᤡᤀᤠᤱ ᤁᤧᤗ᤺ᤳᤋᤢ ᤁᤧᤓᤧᤳᤋᤢᤛᤡ᤹॥”
11ᤁᤖ ᤔᤥᤛᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤳᤋᤢ. “ᤀᤠᤱᤃᤠ᤹ ᤜᤠ᤺ᤳᤋᤠᤀᤠᤱᤒᤣ᥅ ᤀᤠᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤑᤠᤖᤥᤀᤥ#᥉:᥇᥇ ᤔᤡᤛᤪᤡᤜᤠ᤹ᤖᤧ ᤜᤠᤱᤅᤡᤴ “ᤑᤠᤖᤥ” ᤔᤧᤔᤧᤳᤋᤢ ᤐᤣ᤺ᤰᤁᤠ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤗ᤺ᤳᤋᤢᤱᤛᤡᤱᤅᤠᤱ ᤑᤧᤵᤔᤠ ᤛᤢᤰᤋᤢᤱᤛᤡᤱᤒᤣ᥅”
12ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤠ᤹ᤀᤠ. ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤐᤠᤱᤏᤧᤒᤠ ᤁᤧᤗ᤹ᤒᤠ ᤐᤠ᤺ᤴᤏᤡᤸᤗᤧ ᤔᤡᤰᤛᤣ᤺ᤴᤏᤡᤴ ᤂᤧᤏᤧ᤹ᤀᤥ ᤁᤴ ᤐᤥᤱ᤹—ᤂᤧᤏᤧ᤹ ᤂᤧᤴ ᤔᤏᤠᤜᤠ᤹ ᤔᤡᤛᤪᤗᤠᤶᤒᤠ ᤁᤧᤗ᤺ᤳᤋᤢ ᤁᤧᤓᤧᤳᤋᤢᤛᤡᤸᤗᤧ ᤂᤧᤏᤡ᤹ ᤁᤴ ᤁᤥ᤺ᤰᤔᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤁᤧᤔᤧᤳᤋᤢᤶ॥”
13ᤔᤥᤛᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤀᤠᤸᤗ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤥ ᤐᤣ᤺ᤰᤁᤠᤀᤠᤱ ᤀᤰᤂᤣᤃ ᤔᤧᤳᤋᤢᤱᤛᤡᤱ᤹. ‘ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤂᤡᤏᤡ᤹ᤀᤥ ᤐᤠᤱᤄᤠᤱᤒᤠ.’ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ‘ᤂᤢᤏᤧ᤹ ᤁᤢᤔᤡᤱ ᤌᤧᤔᤠᤒᤣ᥅’ ᤑᤠ᤹ᤀᤠᤱ ᤛᤣ᤺ᤴᤔᤧᤍᤠᤀᤠᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤌᤣ ᤔᤧᤳᤋᤢᤱᤛᤡᤱᤒᤠᤒᤣ᥅”
14ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤱᤃᤠ᤹ᤀᤣᤀᤠ॥ ᤕᤠᤶᤔᤥ ᤂᤢᤏᤧ᤹ ᤐᤠ᤺ᤳᤋᤢ. ᤀᤡᤛᤪᤠᤀᤡᤗᤡᤜᤠ᤹ ᤂᤧᤏᤧ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤀᤠᤱᤃᤠ᤹ ᤁᤧᤗ᤹ᤒᤠᤸᤗᤧ ᤂᤡᤏᤡ᤹ᤀᤥ ᤐᤠᤱᤄᤠᤱᤒᤠᤖᤥ॥’”
15ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠᤴ ᤁᤴᤏᤠᤱ ᤔᤧᤳᤋᤢ. “ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹. ‘ᤂᤡᤏᤡ᤹ ᤐᤠ ᤌᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤖᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ᤀᤥ ᤐᤠᤱᤄᤠᤱᤒᤠᤖᤥ॥’
“ᤛᤍᤠᤍᤡᤱᤗᤧ ᤗᤠᤃᤡ ᤀᤠᤱᤃᤠ᤹ ᤀᤠᤔᤡᤱᤅᤡᤴ ‘ᤀᤠᤱᤃᤠ᤹ᤀᤣᤀᤠ’ ᤖᤥ.
ᤜᤧᤰᤁᤩᤠᤱ ᤁᤧᤖᤧᤰ ᤌᤠ᤺ᤰᤁᤥᤒᤠ ᤔᤏᤠᤜᤠ᤹ᤖᤧ
ᤀᤠᤶᤓᤠ ᤁᤴ ᤀᤠᤔᤡᤱᤅᤡᤴ ᤏᤡᤱᤘᤠ᤹ ᤔᤧᤀᤡ᤺ᤳᤋᤢ᤹॥
16“ᤐᤣᤃᤧ᤹ᤀᤠᤱ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ ᤌᤡᤰᤔᤧᤳ ᤑᤢᤰᤂᤧᤛᤧ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤋᤠᤰᤌᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤛᤢᤑᤥ ᤐᤡᤏᤧᤒᤠ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤕᤧᤀᤠᤱ ᤘᤠ᤹ ᤜᤧᤰᤁᤩᤠᤱ ᤔᤡᤛᤪᤡᤜᤠ᤹ᤖᤧ ᤂᤧᤱᤜᤠ᤹ ᤌᤣ ᤔᤧᤔᤧᤳᤋᤢᤛᤡᤖ ᤔᤧᤘᤠ᤹ ᤂᤧᤴ ᤁᤧᤖᤧᤰ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹॥ 17ᤔᤡᤛᤪ ᤗᤠᤈᤣ᤹ᤒᤠ ᤋᤢᤰᤂᤣ ᤗᤠᤰᤂᤣᤗᤠᤶ ᤂᤢᤏᤧ᤹ ᤂᤡᤏᤡ᤹ ᤁᤧᤗ᤺ᤳᤋᤡᤀᤠᤱ ᤗᤳᤇᤠ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣ᤹ ᤁᤧᤏᤧᤒᤠ ᤗᤠᤈᤣ᤹ᤀᤥ ᤁᤧᤃᤧᤳᤋᤡ ᤑᤠ᤹ᤀᤠᤱ ᤂᤢᤏᤧ᤹ ᤁᤢᤳᤆᤠ᤹ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤠ᤹॥ ᤂᤧᤴ ᤗᤠᤈᤣ᤺ᤱᤃ ᤁᤏᤠᤏᤡ. ᤜᤡᤳᤋᤡ. ᤀᤣᤔᤥᤖᤡ. ᤐᤖᤡᤈ᤻ᤈᤡ ᤜᤡᤒ᤻ᤒᤡ ᤏᤢ ᤕᤒᤢᤛᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤖᤥ॥
18“ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤔᤧᤄᤧᤵᤛᤢ᤹॥ ᤂᤧᤒᤩᤠᤱ ᤂᤧᤏᤧ᤹ ᤏᤢ ᤀᤡᤛᤪᤠᤀᤡᤗᤒᤠ ᤂᤧᤴ ᤗᤠᤶᤗᤥᤒᤠᤜᤠ᤹ ᤔᤡᤛᤪᤒᤠ ᤜᤠᤱᤅᤧᤀᤥ ᤁᤧᤒᤣᤃᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤴ ᤀᤰᤂᤣ ᤁᤧᤔᤧᤳᤋᤢᤶ᤹. ‘ᤕᤜᤘᤣ ᤍᤠᤱᤒᤠ ᤜᤡᤒᤪᤢᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤣ ᤋᤢᤶᤛᤧ ᤕᤧᤀᤠᤱ ᤘᤠ᤹. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤔᤢᤖᤧᤰ ᤂᤠᤖᤧᤰᤐᤠ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤛᤢᤶᤕᤠᤴᤒᤠ ᤗᤠᤶᤍᤡ᤺ᤰᤁᤥ ᤐᤣ᤺ᤰᤔᤠ ᤀᤠᤓᤠ᤺ᤰᤋᤧ᤹॥’ 19ᤁᤖ ᤔᤢᤰᤛᤠᤶᤒᤠ ᤜᤢᤰᤁᤡᤸᤗᤧ ᤔᤡᤛᤪᤒᤠ ᤜᤠᤱᤅᤡᤴ ᤁᤧᤛᤠᤰᤐᤠ ᤋᤢᤔᤢᤖ ᤔᤧᤴᤕᤠ᤺ᤴᤏᤣ ᤌᤠᤖᤡᤰ ᤂᤢᤏᤧ᤹ ᤂᤡᤏᤡ᤹ ᤐᤣ᤺ᤰᤔᤠ ᤁᤧᤶᤓᤠ᤺ᤰᤋᤡᤴ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱ᤹॥ 20ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤜᤢᤰᤁᤡᤸᤗᤧ ᤔᤡᤛᤪᤡᤜᤠ᤹ ᤛᤠ᤺ᤵᤛᤢᤱᤛᤡᤱᤅᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤠᤱᤃᤠ᤹ ᤁᤧᤖᤧᤰ ᤏᤡᤱᤘᤠ᤹ ᤁᤧᤔᤠᤒᤠ ᤀᤠᤕᤠ᤺ᤶᤒᤰᤗᤠᤶ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤂᤧᤸᤗᤧ ᤂᤡᤏᤡ᤹ ᤐᤣ᤺ᤰᤔᤠ ᤁᤧᤓᤠ᤺ᤰᤋᤡ॥
21“ᤀᤠᤱᤃᤠ᤹ ᤔᤡᤛᤪᤡᤜᤠ᤹ᤖᤧ ᤂᤡᤏᤡ᤹ ᤏᤢᤖᤡᤰ ᤁᤧᤶᤔᤧᤳᤋᤡᤖ ᤆᤥᤃᤢᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤂᤧᤵᤔᤥᤗᤠᤶ ᤛᤧᤶᤔᤢ᤹ᤀᤡ ᤔᤧᤒᤥᤱᤅᤡᤸᤗᤧ ᤜᤢᤰᤁᤥ ᤌᤧᤔᤠᤀᤠᤱ ᤔᤣ᤺ᤴᤏᤣ ᤔᤧᤸᤗ᤺ᤴᤏᤧᤴ ᤔᤧᤶᤒᤣ᤺ᤰᤏᤧᤴ॥ 22ᤁᤧᤖᤧᤰ ᤀᤡᤛᤪᤠᤀᤡᤗᤡ ᤔᤧᤴᤇᤢᤔᤠᤜᤠ᤹ ᤂᤢᤴᤇᤡ᤹ ᤜᤡᤶᤒᤣᤛᤠᤱᤒᤠ ᤔᤡᤛᤪᤡ ᤔᤧᤴᤇᤢᤔᤠᤜᤠ᤹ᤀᤥ ᤔᤧᤒᤣ᤺ᤰᤁᤠᤱ ᤂᤧᤴ ᤜᤡᤶᤔᤥ ᤁᤧᤘᤠ᤹ᤔᤠ ᤔᤧᤴᤇᤢᤔᤠᤜᤠ᤹ ᤆᤠᤱᤘᤠᤴ ᤏᤢ ᤛᤠᤶᤔᤩᤠᤱ ᤕᤢᤵᤐᤠ ᤘᤠ᤺ᤳᤋᤡᤜᤠ᤹ ᤔᤧᤏᤠ᤺ᤰᤋᤢᤛᤡ᤹॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤴ ᤆᤠᤱᤜᤠ᤹ ᤏᤢ ᤘᤠ᤺ᤳᤋᤡᤜᤠ᤹ ᤂᤢᤴᤇᤡ᤹ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤛᤠᤜᤠ᤹ ᤔᤧᤈᤠᤰᤋᤢᤛᤡ᤹ ᤔᤧᤘᤠ᤺ᤳᤋᤢᤛᤡ᤹ ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤔᤡᤛᤪᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤂᤧᤱᤜᤠ᤹ᤖᤧ ᤔᤧᤍᤣ᤹ᤖᤢᤀᤠᤱ ᤔᤧᤒᤣ᤺ᤰᤗᤥ॥”
Zvasarudzwa nguva ino
ᤗᤠᤶᤍᤡᤰ 3: LIFOTNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2009, 2023, Wycliffe Bible Translators, Inc. All rights reserved.