मत्ती 13
13
बिएजु बाणे कथा
मरकुस 4:1-9; लूका 8:4-8
1तेस रोज यीशु गीहा निस कइ तथे औत जे गा त तठि बिश कइ दुबारी शिचालुण लगा। 2तोउं तसे भेएड़ अत हुसुड़ा किठा भुआ कि तस घेई कइ नाव पुठ बिशुण आउ, त सोब हुसुड़ा औत पुठ बिशा।#लूका 5:1-3 3तेन तेन्हि जुओई कथाई बेलि सुआ बोके की। तेन बोलु, “यक मेह्णु बिएजु बाण जे गा। 4बांत पेंत कुछ बिएजु बत झड़ु त चड़ी चखुरु एई कइ से खाई छउ। 5कुछ बिएजु शकरिआटी जिमि पुठ झड़ु, जेठि सुसुर जन न थिआ। से झठ लुंग गोउ, किस कि तठि जन सुआ न थिआ। 6पर जपल धुप लगी त सेके बेलि से शुख गोउ। 7कुछ बिएजु कांटि बुछ झड़ु। कांटे त बोडी गे, पर से बोडीण न दुतु। 8पर कुछ बिएजु सुसुर बग झड़ु, त खरी फसल भुई, कोई तिह गुणा, शठ गुणा त सौ गुणा फसल।” 9तोउं यीशु तेन्हि जे बोलु “अगर तुस में बोक ध्यान जोई शुणियेल त तुस समझ घेन्ते।”
कथाई के मकसद
मरकुस 4:10-12; लूका 8:9-10
10तोउं, यीशु चेली तसे भेएड़ एई कइ तेस केईआं पुछु, “गुरुजी, तुस मेह्णु जोई कथाई के बेलि ईं बोक किस कते?” 11तेन बोलु, “तुन्धे स्वर्गे राज्ये नियको बोके समझणे बुद्धि दुतो असी, पर तेन्हि नेईं। 12किस कि जेस केईं समझ असी, तसे धे हउ बि देन्ते। पर जेस केईं समझ नेईं, तेस केईं जे कुछ बि असु, से बि नीइ घेन्तु।#मत्ती 25:29; मरकुस 4:25; लूका 8:18; 19:26 13अउं तेन्हि जोई कथा अन्तर तोउं बोक कता, कि से हेर हेर कइ बि ना पिछाणियेल, त शुण शुण कइ बि ना शुणियेल होर न समझियेल। 14इसे बेलि ए मेह्णु यशायाह भविष्य वक्ते तेस बोक पूरा कते, जे तेन बोलो थी कि
‘तुस कनि बइ त शुणते, पर समझते नउ;
टीरी बइ त हेरते, पर पिछाणते नउ।
15किस कि अन्हि मेह्णु के मन सुआ खोट भोई गो असा।
अन्के कन टौणे त टीर अन्हे भोई गो असे।
ईं न भोल कि से टीरी बइ हेरियेल,
कनि बइ शुणियेल त मने बइ समझियेल,
होर मोउं केईं एईयेल
त अउं तेन्हि ठीक करुं।’#यशायाह 6:9-10
16पर धन्य असे तुस, किस कि तुसी में किओ कम हेरे त में बोलो बोक शुणी। #लूका 10:23,24 17किस कि अउं तुसी जे बोता कि सुआ भविष्य वक्ता त धर्मी मेह्णु चहु कि जे कम तुस हेरते, से बि हेरियेल, पर तोउं बि ना काउ; से चहन्तेथ कि जे बोके तुस शुणते, से बि शुणियेल, पर तोउं बि ना शुण बटी।”
बिएजु बाणे कथाई मतलब
मरकुस 4:13-20; लूका 8:11-15
18“अब तुस बिएजु बाणे बाड़ी कथाई मतलब शुणे। 19जे कोउं स्वर्गे राज्ये वचन शुण कइ बि ना समझते, होर तेन्के मन अन्तर जे कुछ बि समझ गो भुन्ति, तेस शैतान एई कइ घिन घेन्ता, से मेह्णु तेस बते कनारी जिमि के ईं असे। 20-21जे कोउं परमेश्वरे वचन शुणते त खुश भोई कइ झठ मान छते, पर जपल वचने बझई जोई कोई भुंजाण या परेशानी एन्ती त से वचन मनण छड़ दी छते, से मेह्णु तेस शकरिआटी जिमि के ईं असे। किस कि तेन्के जील वचन अन्तर न गो भुन्तु त से कुछ देर पता शुख घेन्ते। 22केहि जेईं परमेश्वरे वचन शुणते त जरूर, पर इस मतोके चिन्ता कर कइ त धन दौलते लालचे बेलि दबी घेन्ते त वचन मान कइ ना जीन्ते। से मेह्णु कांटियाली जिमि के ईं असे। तेन्हि केईआं कोई फल न मेता। 23पर केहि मेह्णु वचन शुणते, समझते त तेस मान कइ जीन्ते। से तेस खरी जिमि ईं असे, जेन्हि केईआं तिह गुणा, शठ गुणा त सौ गुणा फल मेता।”
गिहुं बुछ छरबेउ कथा
24यीशु तेन्हि यक होरी कथा शुणाई: “स्वर्गे राज्य ईं असा, जीं यक मेह्णु अपु बग खरु बिएजु बाओ थिउ। 25पर जपल से मेह्णु उंघो थिआ त तसे दुश्माणे एई कइ गिहुं बुच छरबेउ बिएजु फटाई कइ नश गा। 26जपल गिहुं लुंगे त छरबेउ बि लुंग गा। 27ई सोब हेर कइ नौखरी बोलु, ‘ए मालिका! तुसी अपु बग खरु बिएजु न बाउ ना? त फिर ए छरबेउ कोठिआ आ?’ 28मालिके तेन्हि जे बोलु, ‘ए केसे दुश्माणे कम भो।’ नौखरी तेस जे बोलु, ‘तुस की चहन्ते ना कि अस घेई कइ तेस छरबेउ पुटी एन्ते?’ 29तेन बोलु, ‘ना, ना! ईं न भो कि छरबेउ पुटते पुटते तुस गिहुंए डा बि पुटी छड़ियेल। 30लुणुण तकर दुहि साते बोडीण दिए। लुणणे टेम अउं लुणणे बाड़ी जे बोता कि पेहले छरबेउ बेह्ढ़ कइ जाण जे पुलोठु बणाए, त गिहुं किठे कर कइ में केंचार अन्तर छड़े।’”
शरहेउए बिएजु कथा
मरकुस 4:30-32; लूका 13:18-21
31यीशु तेन्हि जे यक होरी कथा शुणाई: “स्वर्गे राज्य यक शरहेउ रोए ईं असु, जे केनि मेह्णु नी कइ अपु बग बाई छउ। 32से सोबी बिएजु केआं मठुड़ भुन्तु। पर जपल से लुंगतु त बोडी कइ यक ईं बुटा बण घेन्ता कि चड़ी चखुरु तेस पुठ बिश्ते।”
टकेणे कथा
मरकुस 4:34
33तेन तेन्हि यक होरी कथा शुणाई: “स्वर्गे राज्य टकेणे ईं असा, जे केनि जिल्हाणु नी कइ टाई बाटि आटे अन्तर मिआ त भुन्ते भुन्ते पूरा आटा टकी गा।”
34ए सोब बोके यीशु कथा बणाई कइ मेह्णु शुणाई। होर बजन कथाई के से तेन्हि जे कुछ न बोताथ। 35एसे बेलि परमेश्वर भविष्य वक्ता जे, जे वचन बोलो थिए से पूरा भु। तेन बोलो थिउ कि
“अउं कथाई बेलि अपु बोक शुणान्ता,
जे बोक सृष्टि शुरुवात केआं नियोको असी, तेन्हि समझान्ता।”#छुआंरी 78:2
छरबेउ कथाई मतलब
36तोउं से हुसुड़ा छड़ दी कइ अन्तर आ, त तसे चेली तसे भेएड़ एई कइ बोलु, “बगे छरबेउ कथाई मतलब असी समझाण दिए।” 37यीशु तेन्हि जे जवाब दिता, “खरे बिएजु बाणे बाड़ा से मेह्णु, अउं भो, मनखे कुआ। 38बग जीं मतोक भो। खरे बिएजु जीं परमेश्वर राज्ये गभुर भो, होर छरबेउ बिएजु जीं दुष्ट शैताने गभुर भो। 39जेन दुश्माणे से बाए से शैतान; त लुणणे टेम मतोके अखिर रोज भो। होर लुणणे बाड़े स्वर्गेदूत भो। 40जीं छरबेउ बेह्ढ़ कइ आग अन्तर जाते, तीं मतोके अखिर रोज अन्तर भुन्तु। 41मनखे कुआ अपु स्वर्गेदूती लंघान्ता, जे तसे राज्य अन्तरा सोबी दुष्ट, अधर्मी, त पाप करणे बाड़ी कठेरते। 42त तेन्हि आगे कुण्ड अन्तर छते, जेठि रोणा धोणा, त मगिर चठ देण भुन्तु। 43तेस टेम धर्मी मेह्णु अपु बोउए राज्य अन्तर दिसे ईं चमकते।” तोउं यीशु तेन्हि जे बोलु “अगर तुस में बोक ध्यान जोई शुणियेल त तुस समझ घेन्ते।”
स्वर्गे राज्य बारे होरी होरी कथाई
44तोउं यीशु ई बोक लाई, “स्वर्गे राज्य जीं यक बग अन्तर नियोको धने ईं असा, जे केसे मेह्णु मेईंया त नियोकइ छड़ा। तोउं खुशी खुशी तेन अपु सोब कुछ बेचबुच कइ से बग खरीद छड़ा।”
45“होर, स्वर्गे राज्य यक तेस व्यापारी ईं असा, जे अब्बल मोती तोपता। 46जपल तेस यक अब्बल त कीमति मोती मेईंया त तेन घेई कइ अपु सोब कुछ बेचबुच कइ से खरीद छड़ा।”
47“होर शुणे, स्वर्गे राज्य तेस बोडे जाले ईं असा, जे मछवारे समन्दर अन्तर छड़ा त हर किस्मी मछली तस अन्तर फसी। 48जपल जाल भरी गा त मछवारे से ढीड़ कइ औत पुठ अण्हता, त बिश कइ अब्बल अब्बल मछली चाउं अन्तर छते त कुस्तुरी कुस्तुरी फटाई छते।”
49“मतोके अखिर रोज अन्तर बि इहांणि भुन्तु। स्वर्गेदूत एई कइ दुष्टी, धर्मी केआं अलग कते। 50त दुष्टी आगे कुण्ड अन्तर छते, जेठि रोणा धोणा, त मगिर चठ देण भुन्तु।”
नोई त पुराणि शिक्षा
51तोउं यीशु अपु चेली केआं पुछु, “तुसी ई सोब बोक समझ छइ ना?” तेन्हि तेस जे बोलु, “आं।” 52त तेन तेन्हि जे बोलु, “तोउं त, हर यक धर्मशास्त्री, जे स्वर्गे राज्य चेला बणो असा, तेस मालिके ईं असा जे अपु भण्डार अन्तरा नोई त पुराणि चीज किढ़ता।” 53जपल यीशु ई सोब कथा शुणाई छइ त से तठिआ घेई गा।
यीशु पुठ अपु ग्रां मेह्णु विश्वास ना करण
मरकुस 6:1-6; लूका 4:16-30
54पता यीशु अपु ग्रां एई कइ तेन्के अराधनालय अन्तर शिचालुण लगा। त सोब जेईं हैरान भोई कइ बोलुण लगे, “एस अत ज्ञान कोढ़िआ मेईंया, होर चमत्कार करणे शक्ति केन दिती? 55ए त तेस कठोड़े मिस्त्री कुआ भो, होर असे ईया नओं ‘मरियम’ असु। एसे भाई नओं कि याकूब, यूसुफ, शमौन त यहूदा नेईं ना? 56एसे सोब भेण त हें बुच हंटती बिश्ति। त फि एस ए सोब कोठिआ मेउ?” 57ई बोल कइ तेन्हि से ना मना। पर यीशु तेन्हि जे बोलु, “भविष्य वक्ते सद अपु ग्रां त अपु गी इज्जत ना मेती। पर होरे जगाई तस रज्जि इज्जत मेती।”#यूहन्ना 4:44 58तेन तेन्के विश्वास ना करणे बझई जोई तठि सुआ चमत्कारे कम ना किआ।
Zvasarudzwa nguva ino
मत्ती 13: pgg
Sarudza vhesi
Pakurirana nevamwe
Sarudza zvinyorwa izvi
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.