MOTHI 7
7
Bang Ado Kabisar
(Luk. 6:37-38,41-42)
1“Nali bangyok ado bisarek, tangsi naliyok ta ado bisarse ye. 2Piyok pu tene jibadi bisarsi naliyok bisar ma, labadi abisar pensi naliyok ta labenthot Arnam nali ado bisare; aro jibadi linsi nali lindo ma, labang alin pensi naliyok linbo. 3Nang bithang amek ber poyok chilanglesi, nang korte amek ber poyoksi piyok langdo? 4Aro langot, nang bithang amek ber ihong kido amunsi, nang mek berpo pahekngot, labadi alam nang musoyok pot badi than une? 5Nali nengsik abang, angoke nang bithang amek berpo chihek ngot, tangsi nang muso amek berpo kihekyok me-atsi thek phlene. 6Hik helyok kangthir abihini piyek; aro nali kilang me-at ser-atheng phak hel ango tiyek; pene bak ke anali keng pen dong sinek nge, aro wang chiru phaksi naliyok ta wangkor phaknge.
Chihang, Chibisar Aro Chipardeng
(Luk. 11:9-13)
7“Chihang, tangsi naliyok piye; chibisar, tangsi pahlonge; chipardeng, tangsi naliyok owa ingpu piye. 8Piyok pu tene jai chihang, labangsi hlongman; jai chibisar, labangsi thek hlongman; aro jai pardeng, anangyok si owa ingpu piman. 9Piyok pu tene asopo him hang, tene anangyok arlong piye, lang-ok neng tene phurul piye, 10nali sitem ladi ingho arlengpo do ma? 11Lasi nali kangho yongta nangso yok akime abihini pi thek, tene la yokta nali ethakpe kido Apa anangyok kachihang abangyok kime abihini pipe ye ma?
12“La-apot ahuwit alam long, bang hel naliyok jibadi arkel-pasi tene, nali akime hlong, nali ta analiyok ladi arkel-pasi; piyok pu tene lalo kanong aro turki hel kithan alamthe acho.
Kibek Owa
(Luk. 13:24)
13“Awar kibek owa agasi lutdam; piyok pu tene pot owasi aro pot aduwarsi kapangho yok ponman, labang owa awar kithe, duwar ta kidam kajalso, aro labang aga kilutdam arleng ta ongjap. 14Piyok pu tene pot owasi aro pot aduwarsi khanang ajiuliyok ponman, labang awar kibek, duwarta kachisep, aro bangpo kihlongdun abangta bekso det.
Arong Aro Anang Athe
(Luk. 6:43-44)
15“Kachobel turkihel bherabik badi chiplangsi nang dungyok wang; manta aneng arlo ke kaphere meme timit badi, lahelyok chilangwen not. 16Anali katiki angban parasi nali lahelyok chiniye. Arleng hel angsu kido arong parake rihanthu athe, lale dumuru athe wang un ma?. 17Ladisi ahuwit akime thengpe arongten akime athe wangman; manta akangho thengpe arongsi akangho athe wangman. 18Akime athengpe akangho athe wangwe aro irong akangho thengpe parata akime athe wangwe. 19Pot athengpe athe wangwe, bangpo thudetsi, melong tidetman. 20La-apotsi nali athe parasi lahelyok chiniye.
Hane Nang Kachinine Alam
(Luk. 13:25-27)
21“Inghosi neyok Hemphu, Hemphu, pusi taram, anali ahuwit ethakpe long lutdam une pu ke kalek; manta inghosi ethakpe long kido ne Apa aneng badi mainotman, anangsi lut dam une. 22Laba arnike ako-ong arleng neyok nepuye, O Hemphu, O Hemphu, hali nang menpen katurki alamthe paharhe yongma? Aro nang menpen hali si-ik ujharjhe yong ma? Aro nang menpen ajat-jat asombhik asal tikike yong ma? 23La-amun ne analiyok parjudaksi puye, “Ne naliyok jatsi chinine yong; ei kangho katiki abang, ne dung para chiterek ngot.”
Bang-Hini Arleng Hem Kikem
(Luk. 6:47-49)
24“Inghone bak ne labang ahuwit alamthe onesi mainot, anang arlong athak hem kikem budhi-ater arlengpo pen pangbare. 25La-aphel arwe wang jango, lang akithe ingbak ngo, aro tomon japsi labang ahem long wang tongo; manta anang abhiti arlong athak apot, anang pakrep un-eh yongot. 26“Aro inghonebak labang hane lamehel alam onesi mainotne, sangtel athak hem kikem kamango arlengpo pen anangyok pangbare. 27Lalong arwe wang jangsi, lang akithe wang ingbaksi, aro tomon japsi labang ahem long wang tongo, hempo krepmo; aro labang ahem chingho phrotno.”
Jisu Ajakong
28Jisu lamehel alamthe thansi patango, rat hel anang kapaklang hel asombhik hlong detno; 29piyok pu tene anang anali kanong paklang hel ateng thanthesi, ajakong kido arleng badisi analiyok thano.
Zvasarudzwa nguva ino
MOTHI 7: AMRI-BSI
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.