Bemba 12
12
Baboma Zaki, na ihujɛcɛ Pyɛli o njoko
1O elɔmɔ yɛ, Elodi wa nkani andenjɛkɛsɛ iyate ngabo ya buka bwa babukwɛ iwujɛcɛ bango. 2Okate aloma bahɔlɛ ibomaka Zaki, wa mwana nyangwɛ wa Za na ngombele. 3Usya ango ayɛnɛsɛ te ba-Zufi bayɛnɛ bɔnhu ya ango aloma ibandaka na Pyɛli. Ya jasa o buya bwa elɛsi ya pɛmbɛ mwa teka levɛn. 4Usya ango ahijɛ bobandaka ango ahujɛ te ango ojoko, aloma bahɔlɛ obecita benanyi bya bahɔlɛ banayi ikɔlɔkɔ ango, abokakasa ipabaka ango ombiya elɛsi ya Paki o boho bwa lupu. 5Bakɔlɔkɔsɔ Pyɛli o jonko, nde buka bwa babukwɛ bajasa kanganga ibɔndɔngɔkɔ Zambe na bosina bweji.
Bayɛjɛ Pyɛli
6Elodi ayongasa paba ango. Na epundu yɛ, Pyɛli ajasa kote-kote na mehinga mya belenga, ajasa obonangaka opanga bahɔlɛ, o boho bwa itulu, bakɔlɔkɔsɔ itulu ja njoko bajasa okate. 7Ibujɛkɔ, ngɛlɛ wa Ku te apwa, ikutu te ja yonga na moji. Ya ngɛlɛ adumɛ Pyɛli o mbaza iyemwɛcɛ ango ya ango asɔhɔ na neji te: «Yemwaka kwakwa!» Mehinga mya belenga te byatuwa o mabɔ meji. 8Ya ngɛlɛ asɔhɔ te: «Kotaka modunga mɔbɛ, na bengwɛgwɛ ibyɔbɛ.» Ya Pyɛli abeka ngɛlɛ te asɔhɔ te: «Halaka mekanda hijɛcɛ mɛ.» 9Okate, ya ango apunda na ihijɛcɛ ango. Moyebasa te emba ya ngɛlɛ abeka yɛ yaje mombo atemangasa te yajasa yɛni. 10Nde usya ango ayekanasa usi ya bahɔlɛ ba boho-boho, na iyekanaka isi ya mba, usya ango apundaka o itulu ja belenga ja balwa byeposi. Ya ango jibwana ja mɛnɛ oboho bwango ya ango apunda na ilandaka o njɔhu, ibujɛkɔ ngɛlɛ te amaya neji. 11Pyɛli ayebwa amɛnɛ isɔhɔkɔ te: «Mombo, mayɛne te Ku eloma ngɛlɛ eji ipokwaka imɛ o mabɔ ma Elodi na bemba bya lupu ja ba-Zufi ja temangakasa ibekaka imɛ.» 12Usya ango ayokasa nɛ, ya ango alwa bya Elongwɛ ya Mali, wa nyangwɛ wa Za wa babangakasa te Malɛte, bosina te bato buce bajasa be sɔnɔ bimɛnɛ ibɔndɔngɔkɔ. 13Nde usya ango adumɛsɛ itulu ya ijazi wa jinɔ te Lodi mwaya iyocɛcɛ. 14Ya ango ayembya ekɔlu ya Pyɛli, ocebo, ango teka jibwa ekucɛ, ahuwana itandaka te Pyɛli angutɛ usatɛ, o itulu ja mini bakweya. 15Ya basɔhɔ na neji te: «Ojɛ eboci!» Nde akangama isɔhɔkɔ: te ajɛ usatɛ. Bango te basɔhɔ te: «Yɛ ngɛlɛ eji!» 16Usɛ Pyɛli akangama idumɛcɛ. Usya bango bajibwasa ekucɛ bayɛnɛ ango, ya bango bayɛnɛ ngambala na inɛnɛcɛ ango. 17Okate abeka bango ɔbɔ te, jaka wayɔ, na ongo itandaka bango nda Ku apojɛ ango o njɔkɔ te: «Tandaka na Zaki na bana nyangwɛ bamɛ.» Ya ango apunda na ilwaka iyate isi.
18Nde usya buya bwayasa ya jasa na embaci ya ebumba opanga bahɔlɛ: na ihimwaka te Pyɛli abe nawe? 19Elodi ahakakasa ango o masi mahajɛ, nde bango teka kumɛ ango. Ya ango ahimwa bahɔlɛ babokakasa Elongwɛ, ya ango aloma ibomaka bango. Onyate mɛnɛ ya ango alwa bya Zude na bya Sezali ibekaka minyan.
Ilɛlɛ ja nkani Elodi Angilipa
20Elodi ajasa enganya na bato ba etafɛlɛ bya Tili na ba Sidɔni. Nde ya bango bayokana, ilwaka bya ango aji. Usɛ ya bango bayokana bango na Balatisi wa nkɔle mwa elongwɛ ya nkani. Ya bango Balwa ihimwaka Elodi te yajace na Itabu opanga ango, bosina te maja ma myɔngɔ myango mayenga bya mɔngɔ mwa nkani mwɛ. 21O buya bwa bango basijɛsɛ. Elodi wa nkani ahala te mekanda myeji mya Bokani, ya ango ahula ukwa ekozi ya bokani na isɔkɔ uyɛhɛhɛ na lupu. 22Lupu jajasa obopotangaka: «Etɛ habe ekɔlu ya moto, nde ya zambe!» 23Ibujɛkɔ, ngɛlɛ wa Ku apazɛ te ango na bosina bwa ango ajasa teka wɛ makombo na Zambe. Ya mehɔmbi myaja ango, na ango iwaka.
24O elɔmɔ yɛ iyɔkɔ ja Zambe janɛnɛ buce amɛnɛ. 25Banabasi na Sɔli, bahijɛ ehaji ya ango okuna babukwɛ ba Zɛluzalɛmi. Ya bango bakwa Za wa kombo te Maliki ihuwanaka bango na ango.
Zvasarudzwa nguva ino
Bemba 12: KOQ
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES