Jonashi 4
4
Ikisanakara Jonashi
1Yogari Jonashi ineakera tera intsatagero Tasorintsi ikantavetakarira inkisashiigakemparimera Ninivekunirira impogereaigakerira, irirori ineakero tera onkametitimoteri ovashi ikisanaka.
2Impo iniakeri Tasorintsi, ikantiri:
«Nero, Notinkami, nokantasanotakeniroro okyara aiñokyara nonavetara anta nogipatsiteku. Irorotari nokogantavetakarira noshiganakemera noatakemera Tarisuku, nogotakempitari vinti Tasorintsi kametiri, aikiro pairo pitsarogakagantavageta, tera shintsi pinkisempa, pairotari pitasanotantavageta pikantavetaka nonkisashiigakempari impo ariokya pikantatigavairo.
3Irorotari, nonkantantakempirira maika, Tasorintsi, atsi gamagena. Pairo okametitake nonkamakera avisakero nontimaera.»
4Kantankicha yogari Tasorintsi ikantiri:
«¿Pineakero viro kametitake pikañotakerora maika pikisanakara?»
5Impo iatake Jonashi parikoti samani oatakara ikontetira poreatsiri; ario ipirinitake kara okoneatakera magatiro apatotara pankotsi, yovashitaka maani itikakotakara ganiri itagiri poreatsiri, kantaka ipirinitakera yogiakera ariorika intsatagakero ikantakeririra.
6Yogari Tasorintsi ishivokakagakero oga shivitsa pamatsaniro atagumaitanake inakera Jonashi, otsimanpegakerira ganiri itagiri poreatsiri. Antari ineakerora Jonashi otsimanpegakerira ishinevagetakatyo kara.
7Kantankicha impo ikantake Tasorintsi irogakemparora kashageto otsitiku pamatsaniro, nerotyo iroro okutagitevetanakara pairo shigirikake.
8Impo iporeanakera poreatsiri ariokya ikantake Tasorintsi ontampiatakera omponiakempara ikontetira poreatsiri onkatsirinkaenkatanakera. Yogari poreatsiri kantinkasanotari ikatinkatagutakeri igitoku Jonashi nerotyo oga ikenake itaganakerira, ovashi ineavaka panikya intuanake inkamakera. Iniavagetanake ikanti: «¡Pairo okametitake nonkamakera avisakero nontimaera!»
9Kantankicha Tasorintsi ikantiri:
«¿Pineakero viro okametitimotakempi pikisanakara pikañotakerora maika pineakerora oshigirikapitsatanakempira shivitsa pamatsaniro?»
Inianake Jonashi ikanti:
«¡Jeje, noneakeroniroro kametitake nonkisakotakemparora! ¡Nokogantakarira maika nonkamakera pairotari nokisaka!»
10Impo Tasorintsi ikantiri:
«Pine maika tera viro pankivetemparone oga shivitsa pamatsaniro, aikiro tera viro gishivokerone; onti tsikyata oshivokanake irorori, impo okutagitevetanaka pa shigirikake, kantankicha viro pitsarogakagakarotyo pineaketari iroro pomanpegantaka.
11Naromparorokari pairo nontsarogakagaigakempari Ninivekunirira, karari kara apatotakara pankotsi aiñoegitari kara tovaini matsigenkaegi yavisaigakero 120,000 ananekiegi tekyarira irogoigero tyara ikantaigakempa kameti irogavisaakoigakempara aikiro aiño tovaini piratsipage.»
Zvasarudzwa nguva ino
Jonashi 4: JON20
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Proyecto Biblia Matsigenka © Sociedad Bíblica Peruana.