লূক 19
19
সক্কেয়র মন্ ফিরেনা
1যীশু যিরীহো শঅর ভিদিরেদি যার্। 2সিধু সক্কেয় নাঙে এক্কো মানুচ্ এলঅ। তে এলদে খাজানা-তুলিয়্যে সদ্দার্ আর এক্কো থাগোয়্যে মানুচ্। 3যীশু কন্না, সিয়েন তে চেবাত্তে চেষ্টা গরের্, মাত্তর্ বাদি এলঅ বিলি ভিড়োত্তে তারে দেগা ন-যার্। 4সেনত্তে তে যীশুরে চেবাত্যে মুজুঙোত্ ধাবা যেইনে এক্কো ডোমোর্ গাজত্ উদিলো, কিয়া যীশু সে পধেদি যার্।
5যীশু সেই ডোমোর্ গাচ্চো কুরে এইনে উগুরেদি রিনি চেলঅ আর সক্কেয়রে কলঅ, “সক্কেয়, যাদিমাদি লামি আয়, কিয়া এইচ্চ্যে তঅ ঘরত্ মত্তুন্ থা পুরিবো।”
6সক্কেয় যাদিমাদি লামি এলঅ আর খুজীয়্যে যীশুরে গুজি ললঅ। 7ইয়েন্ দেগিনে বেক্কুনে ভুদুভুদু গুরিনে কলাক্, “তে এক্কো পাপী মান্জ্যর গর্বা অবাত্যে গেলঅ।”
8সক্কেয় সিধু থিয়্যেইনে প্রভুরে কলঅ, “প্রভু, মুই মর্ ধন সোম্বোত্তির্ অদ্দেক্ নাঢাগুনোরে দি দুয়োঙর্ আর যুনি কাররে থোগেই থাং সালে সিগুনোর্ চেরগুন্ ফিরেই দোঙর্।”
9সেক্কে যীশু কলঅ, “এ ঘরানত্ এইচ্চ্যে পাপত্তুন্ উদ্ধোর্ এলঅ, কিয়া ইবেয়ো দঅ অব্রাহাম গুত্তির্ একজন । 10যিগুনে আঝি যেয়োন্ সিগুনোরে তোগেবাত্যে আর পাপত্তুন্ উদ্ধোর্ গুরিবাত্যে মান্জ্য পুয়োবো এইচ্চ্যে।”
রাজা আর তার্ দশজন চাগর্
(মথি ২৫:১৪-৩০)
11যীশু সেক্কে যিয়েনত্ এলঅ সিয়েনত্তুন্ যিরূশালেমান বেশ্ দূরোত্ নয়, আর যিগুনে তা কধা শুনোদন্ সিগুনে ভাবদন্, গোজেন রেজ্যগান্ সবরে ফগদাং পেবঅ। সেনত্তে যীশু তারারে শিক্ষ্যে দিবাত্যে এ কধাগান্ কলঅ: 12সেনত্যে তে কলঅ, এক্কো দাঙর্ বংশর মানুচ্ রাজা ওইনে ফিরি এবঅ বিলি দূর্ দেজত্ গেলঅ। 13যেবার্ আগেদি তে তার্ দশজন চাগররে ডাগিলো আর পত্তিজনরে একশত দীনার্ গুরি দিইনে কলঅ, “মুই ফিরি ন-এজানা সং ইগুন্দোই বেবসা গর্।”
14মাত্তর্ তা দেজর্ মানুচ্চুনে তারে ঘিনেদাক্ । ইয়েনত্তে তারা তা পিজেদি মানুচ্ দিপাধেইনে হবর্ দিলাক্, আমি ন-চেই এ মানুচ্চো আমা উগুরে রাজাগিরি গোরোক্।
15মানুচ্চো রাজা ওইনে ফিরি এলঅ আর লগে লগে তে চাগরুনোরে তা মুজুঙোত্ ডাগি আনিবাত্যে উগুম্ দিলো। তে জানিবাত্তে চেলঅ বেবসা গুরিনে তারা কন্না কদক্ লাভ্ গোজ্যে। 16পত্তম্ মানুচ্চো এইনে কলঅ, প্রভু, তঅ টেঙাগুন্দোই মুই দশগুন্ লাভ্ গোজ্যং।
17তে তারে কলঅ, দোল্ কাম গোজ্যস্। তুই এক্কো গম্ চাগর্। তুই সামান্য পৌইদ্যেনে বিশ্বেজি ওইয়োচ্ বিলিনে মুই তরে দশ্চান শঅরর্ ভার্ দিলুং।
18দ্বি-লম্বর্ চাগর্বো এইনে কলঅ, প্রভু, তঅ টেঙাগুন্দোই মুই পাচ্গুন লাভ্ গোজ্যং।
19তে সেই চাগর্বোরে কলঅ, তুই পাচ্চান্ শঅরর্ কামর্ ভার্ পেবে।
20সে পরেদি অন্য আর এক্কো চাগর্ এইনে কলঅ, প্রভু, এইয়্যে তঅ টেঙাগুন; মুই তঅ টেঙাগুন্ রূমোল কানিত্ বানি থোইয়োং। 21মুই তরে দোরেয়োং, কিয়া তুই অমকদ আঘাত্যে মানুচ্; তুই যিয়েনি ন-থুবোস্ সিয়েনি লোই থাচ্ আর যিয়েনি ন-লাগাচ্ সিয়েনি কাবচ্।
22সেক্কে তে তারে কলঅ, তুই পাজি চাগর্ ! তঅ মুয়ো কধালোই মুই তর্ বিচের্ গুরিম্। তুই দঅ কোই পারচ্, মুই আঘাত্যে মানুচ্; যিয়েন্ ন-থুবাং সিয়েন লোই থাং আর যিয়েন ন-লাগাং সিয়েন্ কাবং। 23ঠিগ্ আঘে, পরেদি কিত্তে তুই মঅ টেঙাগুন ব্যাংকত্ ন-থলে? সে পরেদি আর মুই যেক্কে ফিরি এদুং সেক্কে সুদ সহ সিগুন লোই পারিদুং।
24পরেদি যিগুনে তা কায়কুরে থিয়্যেই এলাক্ তারারে কলঅ, তাত্তুন্ সেই টেঙাগুন নেযঅ আর যিবের্ দশ দীনার্ আঘন্ তারে দুয়ো।
25সেক্কে সেই মানুচ্চুনে রাজারে কলাক্, প্রভু, তার দঅ এক আজার্ দীনার্ আঘে।
26“তে কলঅ, ‘মুই তমারে কঙর্, যিবের্ আঘে তারে আরঅ দিয়্যে অবঅ, মাত্তর্ যিবের্ নেই তার যিগুন্ আঘন্ সিগুন্অ তাত্তুন্ নেযা অবঅ। 27মঅ শত্রুগুনে যিগুনে ন-চান্ মুই রাজা অং, তারারে ইধু আন্ আর মঅ মুজুঙোত্ মারে ফেলা।’ ”
যিরূশালেমত্ সমানা
(মথি ২১:১-১৭; মার্ক ১১:১-১৯; যোহন ২:১৩-২২; ১২:১২-১৯)
28এ বেক্ কধানি কনার্ পরেদি যীশু তারা আগে আগে যিরূশালেম ইন্দি যাহ্ ধুরিলো। 29যেক্কে তে জৈতুন মুড়োবো ধাগত্ বৈৎফগী আর বৈথনিয়া আদাম ইধু লুমিলো সেক্কে তা দ্বিজন শিচ্চ্যরে ইয়েন কোইনে আগে দিপাধেল, 30“এ শিক্ষ্যে মজিম তুমি মুজুঙেদি আদামানত্ যঅ। সিধু সুমিবার্ অক্তত্ দেগিবা এক্কো গাধা ছঅ বান্ন্যে আঘে। সিবে উগুরে কেঅ কনদিন্অ ন-চড়ে। সিবে খুলিনে ইধু আনঅ। 31যুনি কেঅ পুযোর্ গরন্, কিত্ত্যে সিবে খুলোর্? সালে কঅ, ‘প্রভুর্ দরকার্ আঘে।’”
32যে শিচ্চ্যগুনোরে দিপাধা ওইয়্যে তারা যেইনে যীশুর কধা মজিম্ বেক্কানি দেগিলাক্। 33তারা যেক্কে সেই ছবুয়ো খুলোদন্ সেক্কে গিরোজ্চুনে তারারে পুযোর্ গল্লাক্, “তুমি ছবুয়ো কিত্ত্যে খুলোর্?”
34তারা কলাক্, “প্রভুর্ দরকার্ আঘে।”
35সে পরেদি শিচ্চ্যগুনে সেই গাধা ছবো যীশু ইধু আনিলাক্ আর তা পিদোত্ তারার্ কিয়্যে কাবড়ান্ বিজেই দিইনে যীশুরে বোজেলাক্। 36তে যেক্কে যার্ সেক্কে মানুচ্চুনে নিজো কিয়্যে কাবড়ান্ পধত্ বিজেই দিয়্যে ধল্ল্যাক্।
37এবাবোত্যেগুরি যীশু যিরূশালেম ইধু এইনে যে পধ্তান্ জৈতুন মুড়োত্তুন্ লামি যেয়্যে সেই পধ্থানত্ এলঅ। যীশু সমারে তার্ বোউত্ শিচ্চ্য এলাক্। সেই শিচ্চ্যগুনে তার্ যে বেক আমক্ কামানি দেক্কোন্ সিয়েনিত্তে খুজীয়্যে রঅ ছাড়িনে গোজেনরে বাঈনী গুরিনে কুয়ো ধুরিলাক্,
38“প্রভুর্ নাঙে যে রাজাবো এজের্
তার বাঈনী ওক্ ।
স্বর্গত্ শান্তি,
আর সিধু গোজেনর্ মহিমা ফগদাং পেইয়্যে।”
39ভিড়ো ভিদিরেত্তুন্ কয়েক্কো ফরীশী যীশুরে কলাক্, “মাষ্টরবাবু, তঅ শিচ্চ্যগুনোরে জুরো অবাত্যে কঅ।”
40যীশু তারারে কলঅ, “মুই তমারে কঙর্, ইগুনে যুনি জুরো গুরি থান্ সালে পাত্তরুনে জগার্ পারি উদিবাক্।” 41তারা যেক্কে যিরূশালেম ইধু এলাক্ সেক্কে যীশু শঅরান্ দেগিনে কানিলো । 42তে কলঅ, “হায়, শান্তি পেবাত্যে যিয়েনি দরকার্, তুই, অয় তুই যুনি এচ্চ্যে সিয়েন্ বুঝি পাত্তে! মাত্তর্ ইক্কিনে সিয়েন তর্ চোগো আন্দালত্ রোইয়্যে। 43এমন্ সময় এবঅ যেক্কে শত্রুগুনে তঅ বিরুদ্ধে চেরোকিত্তে দেবাল্ তুলিবাক্ আর তরে ঘিরি রাগেবাক্ আহ্ চেরোকিত্ত্যেত্তুন্ তরে চাপি ধুরিবাক্। 44তারা তরে আর তঅ ভিদিরে বেক্ মানুচ্চুনোরে ধুরিনে মাদিত্ আঝার্ মারিবাক্ আর এক্কো পাত্তর উগুরে আর এক্কো পাত্তর্ ন-থবাক্, কিয়া গোজেনে যে অক্তত্ তইন্দি মনযোগ্ দিয়্যে সেই সময়ান্ তুই ন-চিনোচ্।”
45ইয়েনর্ পরেদি যীশু উবোসনা-ঘরত্ সুমিনে বেবসায়ীগুনোরে ধাবেই দিলো। 46তে সেই বেবসায়ীগুনোরে কলঅ, “পবিত্র বোইয়োত্ লেগা আঘে, ‘মঅ উবোসনা ঘরানরে তবনা গরেদে ঘর্ বানা অবঅ’, মাত্তর্ তুমি সিয়েন ডাগেদর্ আড্ডাখানা বানেয়ো।”
47যীশু পত্তিদিন উবোসনা-ঘরত যেইনে শিক্ষ্যে দিয়্যে ধল্ল। আজল ধর্মগুরুগুনে, ধর্ম-মাষ্টরুনে আর মানুচ্চুনোর নেতাগুনে তারে মারে ফেলেবাত্তে চেলাক্, 48মাত্তর্ কিবাবোত্যেগুরি সিয়েন গুরিবাক্ সিয়েনর্ কনঅ পথ তারা তোগেই ন-পেলাক্, কিয়া মানুচ্চুনে মন্ দিইনে তার বেক্ কধানি শুনিদাক্।
Zvasarudzwa nguva ino
লূক 19: CBT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Copyright © 2021 Bangladesh Bible Society