পত্থম 7
7
পানি বান কধা
1ইয়েন পরেদি লগেপ্রভু নোহরে আরঅ কলঅ, “তুই আর তঅ পরিবারর্ বেক্কুনে জাহাজত্ উদিবা। মুই দেগঙর্, এ মানুচ্চুনো ভিদিরে বানা তুয়ই গম্ মানুচ্ আগচ্। 2তুই গম্ য়েমানুনোর পত্তি জাদ ভিদিরেত্তুন্ ফাদি-চেলা মিজেইনে সাত জোড়া গুরি তঅ সমারে নেযেবে, আর অসিজি য়েমান ভিদিরেত্তুনঅ মিলে-মরদ মিজেইনে এক জোড়া গুরি নেযেবে। 3আগাজত্ উড়ি বেড়ান্ এবাবোত্যে গম্ পেগো ভিদিরেত্তুন্অ মিলে-মরদ মিজেইনে সাত জোড়া গুরি তঅ সমারে নেযেবে। পিত্থিমীগান উগুরে তারা বংশগুন জেদা রাগেবাত্তে তুই ইয়েন্ গুরিবে। 4মুই আর সাত দিন পরেদি পিত্থিমীগান উগুরে ঝড় ফেলেবার বেবস্থা গুরিম্। সেক্কে চোল্লিশ দিন আর চোল্লিশ রেত্ সং ঝড় পড়িবো। মুই মাদি উগুরে যিদুক্কুন পরান্বলা বানেয়োং তারারে বেক্কুনোরে পিত্থিমীগান উগুরেত্তুন্ তুলি দিম।” 5লগেপ্রভুর্ উগুম মজিম্ নোহ বেক্ কামানি গুরিলো।
6পিত্থিমীত্ পানি বান্ আরাম্ভ অবার সলাবোত্ নোহর বয়স এলদে ছয়শ বজর। 7পানি বানত্তুন্ মাব্ পেবাত্তে নোহ, তা মোক্কো, তা পুয়োগুন আর পূদবোগুনে সে জাহাজছানত্ উদিলাক্ । 8-9গোজেনে নোহরে উগুম দিবার অক্তত্ যিয়েনি কোইয়্যে সেধোক্ক্যেন গম্ আর ভান্ন্যেই য়েমান্, পেক্ আর বুগেদি-আঢি বেড়েয়্যে প্রাণীগুনে মিলে-মরদ মিজেনে জোড়া জোড়া সেই জাহাজছানত্ নোহ ইধু যেইনে উদিলাক্। 10সেই সাত দিন পার্ ওই যানার পরেদি পিত্থিমীত্ বান অলঅ। 11নোহ বয়সচান যেক্কে ছয়শ বজর চলের্, সে বজরত্ দ্বি মাস সতর দিনোত্ মাদি তলেত্তুন্ বেক্ পানিগান অদাদৎ নিগিলি এজা ধুরিলো আর আগাজচানত্অ যেন্ ফাদামারা ধোজ্যে। 12চোল্লিশ দিন আর চোল্লিশ রেত্ সং পিত্থিমীয়ান উগুরে ঝড় পড়া ধুরিলো।
13যেদিন্যে ঝড় পড়ানা আরাম্ভ অলঅ সেদিন্যে নোহ, তা মোক্কো, তা পুয়ো শেম, হাম, যেফৎ আর তা তিন্নো পূদবো যেইনে জাহাজছানত্ উদিলাক্। 14তারা সমারে পত্তি জাদত্তুন্ এক জোড়া গুরি ঝাড়্বো আর ঘরত্ পালেয়্যে য়েমান, বুগেদি-আঢি বেরেয়্যে প্রাণী আর নানান্ বাবোত্যে পেগ্অ উদিলাক্ । 15নিজেস্ বলা জেদা বেক প্রাণীগুন্ জোড়ায় জোড়ায় নোহ ইধু জাহাজত্ যেইনে উদিলাক্। 16গোজেনে নোহরে উগুম দিবার সলাবোত্ যিয়েনি কোইয়্যে সে ঢগে মিলে-মরদ মিলেইনে তারা উদিলাক্। ইয়েন পরেদি লগেপ্রভু জাহাজ দোরান্ নাঢি দিলো।
17সে পরেত্তুন্ ধুরি চোল্লিশ দিন সং পিত্থিমীত্ বান পানি বাড়ানা আরাম্ভ অলঅ। পানি বাড়িনে জাহাজছান্ মাদিত্তুন্ উগুরেদি ভাজি উদিলো। 18পরেদি পিত্থিমীগান উগুরে পানি আরঅ বাড়িলো সেক্কে জাহাজছান্ পানি উগুরে ভাজা ভাজা অলঅ। 19পিত্থিমীগান উগুরেদি পানিগান দিন দিন বাড়ের্; সেনে সিয়োত্ যিদুক্কুন দাঙর দাঙর মুড়ো এলাক্ বেক্কুন ডুবিলাক্। 20বেক্ মুড়ো-মুড়িগুন ডুবেইনে পানিগান আর পনর আত্ উগুরে উদি গেলঅ।
21ইয়েনত্তে মাদি উগুরে ঘুরি বেড়েইয়্যে বেক্ প্রাণীগুন, পেক্, ঘরত্ পালেয়্যে আর ঝাড় য়েমানুন্, ঝাক্বানি বেড়েইয়্যে চিগোন চিগোন প্রাণীগুন আর বেক্ মানুচ্চুনে মুরি গেলাক্। 22শুগুনো মাদি উগুরে যিদুক্কুন প্রাণী থেদাক্, অত্তাৎ নিজেস্ ফেলেনে যিগুনে বাঁজি এলাক্ তারা বেক্কুন মুরি গেলাক্। 23গোজেনে এধোক্ক্যেনগুরি মাদি উগুরে বেক্ পরাণবলাগুনোরে পিত্থিমীগান উগুরেত্তুন্ তুলি ফেলেল। সেক্কে মানুচ্, য়েমান, বুগেদি-আঢি বেড়েয়্যে প্রাণী আর আগাজ পেক্কুনে পিত্থিমীয়ান উগুরেত্তুন্ শেজ্ ওই গেলাক্। বানা নোহ আর তা সমারে যিগুনে জাহাজত্ এলাক্ সিগুনে বাঁজি এলাক্ । 24পিত্থিমীগান একশ পঞ্চাশ দিন সং পানিত্ ডুপ্যে এলঅ।
Zvasarudzwa nguva ino
পত্থম 7: CBT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Copyright © 2021 Bangladesh Bible Society