Záan 1
1
Zozi Klísɩ ŋwɔ́ɔ cícíwɔlɩ
1Wɔlɩ́ɛ́ fɩ́ɛ́ a bháàdà a, cícíwɔlɩ kʋ wá fɩ́ɛ́ ʋ́, lé cícíwɔlɩɛ́ kʋ wá Lagɔ gɔ̀ lé ɩ́ ŋwɔ́ɔ wá Lagɔ. 2Ɩ bháàdà a, ɩ yà Lagɔ sɔ́ kʋ̀ wá ʋ́.#1.2 A zɛlɩɩ sáà dɔ̀ a bɔ́gʋ̀ɔ̀ a mnɩ́. 3Ɩ́mɩ́ mʋ́ Lagɔ plɩ́ɩ lé ɔ́ nɩ lɩ́ɛ́ fɩ́ɛ́, lɛ́ nɩ́ lɛ́ kɔ́ zɔ̀ kʋ lé ɛ ka nilo, ɛ̀ nɩ̀ nɩ cícíwɔlɩ mʋ́ ŋwɔ́ɔ a.#1.3 A zɛlɩɩ sáà kɔ́ a bháàda a bɔ́gʋ̀ɔ̀ a mnɩ́. Lɔlɔ 33.6,9; 1 Kɔlɛ́tɩ 8.6. 4Cícíwɔlɩ a mnɩ́ kɔ́ kʋ wá, lé kɔ́ɔ́ ʋ́mʋ́ ʋ̀ ŋwɔ́ɔ wá nyʋa a nápɛ. 5Nápɛɛ́ lʋɛ cúcú a mnɩ́, mà cúcúó nɩ́ ɛ́ cásɩ nyɛ́.#1.5 Nyʋa àna yì saá cémʋ́ cúcú nɩ́ nápɛ sɩa a.
6Nyɔ a múó kʋ wá ʋ́, ɔ́mɔ́ á wlele Záan ɔ́mɔ́ Lagɔ cíè.#1.6 Zán Batísɩ á sa. 7Ɔ́mɔ́ Záan ɔ́mɔ́ ɔ̀ yi lé ɔ̀ kà wɔlɩ́ɛ́ a dá yɛ́, ɔ́mɔ́ nà kà nápɛɛ́ a ŋwɔ́nɩ́srɩ̀lɛ nɩ bhʋ́ nyʋa yii cɩ́cása kʋ́ bhá. 8Ɔ́mɔ́ ɔ̀ nɩ́ nápɛɛ́ ŋwɔ́ɔ, mà ɔ́ɔ yi lé ɔ ká nápɛɛ́ a ŋwɔ́nɩ́srɩ̀lɛ nɩ. 9Nyɔɔ́ ɔ̀ kɔ̀ ŋwɔ́nɩ́srɩ̀lɛ̀ɛ̀ Záan nɩ lɛ́ a, ɔ́mɔ́ ŋwɔ́ɔ wázɔ̀ cɩ́cánapɛɛ́, ɛ̀ yi lé ɛ̀ kà kɔ́ a nyʋaá fɩ́ɛ́ kʋ́ ŋanà. 10Ɔ́mɔ́ nyɔɔ́ ɔ́ɔ kʋ kɔ́ɔ̀kɔ́ kɔ́, ɔ́mɔ́ mʋ́ Lagɔ plɩ́ɩ lé ɔ́ nɩ kɔ́, bhè sɩ́tɛ̀ mʋ́ ɩ́ kʋ bhè kɔ́ a nyʋaá nɩ́ ɔ́ yɩbhlɩ. 11Ɔ́ɔ yi ɔ́ nyʋa a nyièdɩ, mà ɔ́ nyʋaá nɩ́ ɔ wlɩ tʋà. 12Mà nyʋaá fɩ́ɛ́ à tʋɔ́ wlɩ, lé à kɔ̀ɔ̀ cícása a, ɔ́ pláalaá Lagɔ a yúó mʋ́.#1.12 A zɛlɩɩ sáà Galátɩ 3.26; 1 Záan 3.23. 13Ɛ̀ nɩ́ dòlú yà a yɛ́kɛ́ sɔ́ a vavayuo ŋwɔ́ɔ, ɩ́mɩ́ ŋwɔ́ɔ mà nyʋa à nɩ́ á va, mà Lagɔ valaá.
14Cícíwɔlɩɛ́ plɩ́ nyɔ lé ɔ̀ yi àmɔ̀ nyièdɩ sí ka, lé à yɛ́ ɔ blɔ̀blɔ́ɔ́. Lagɔ a Yuwliyʋɔ́ a múó cocoó ɔ̀ wlʋ́ Tʋ́ɔ́ gɔ̀ a, à yɛ́ cémʋ́ ɔ́ blɔ̀ a, lé ɔ́ li ɔ blɔ̀blɔ́ɔ́ jáa kʋ́ a.#1.14 A zɛlɩɩ sáà Eza 60.1‑2. 15Záan nɩ wá ɔ ŋwɔ́nɩ́srɩ̀lɛ lé ɔ́ pá wá wɔlɩ́ lé ɔ́ nie wá mà: «Nyɔɔ́ lɩ̀à a wɔlɩ́ ɩ́ cíé wá, lé ɩ́ nie wá lɛ́ mà: Nyɔɔ́ ɔ̀ yie mɔ́ bɩ́ a, ɔ́ ka gbʋ́, ɔ́mɔ́ tɛ̀tɛ̀ kʋ̀ wá ʋ́, fɩ́ɛ́ lé mɔ́ɔ ɩ́ wlʋ́.»
16Nyɔɔ́ lɩ̀à, ɔ pʋ́pʋ́ɛ́ ɛ́mɛ́ ŋnɩ àmɔ̀ kʋ́, ɛ́mɛ́ nɩ lé ɔ pápányuó kwlíle kɔ́ɔ̀kɔ́ àmɔ̀ jɩ̀. 17Moyízɩ mʋ́ Lagɔ pláa ɔ́ lɔ̀ɔ̀ lé ɔ́ nyɛ́ àmɔ̀ mʋ́,#1.17 A zɛlɩɩ sáà Námɛɛ́ 31.18; 34.28. ɩ́zà pʋ́pʋ́ɛ́ yà cɩ́cása sɔ́ plɩ́ɩ Zozi Klísɩ mʋ́ lé ɩ́ yi. 18Nyɔ nɩ́ à zà Lagɔ yɛ́ mà Lagɔ a Yuwliyʋɔ́ a múó cocoó ɔ̀ ŋwɔ́ɔ Lagɔ lé ɔ̀ kʋ̀ɔ̀ gɔ̀ a, ɔ́mɔ́ nɩ lé nyʋa yɩbhlɩ Lagɔ.
Zán Batísɩ cí ɔ nyoku a wɔlɩ́
(Matíe 3.1‑12; Málɩ́kɩ 1.2‑8; Lúkɩ 3.15‑17)
19Tányɩ a múó, Zelízalɛ́mʋ a Zúfʋnyʋa a cífɩnyʋaá, á cíe Lagɔ̀bʋ̀bɔ̀nyʋa yà Levítɩnyʋa sɔ́ Záan bɩ́ a kɔ́ɔ́ yrá: «Nyɩ́kpɔcegbá ɩ̀ ŋwɔ́ɔ a?» 20Záan nɩ́ wɔlɩ́ kʋ́ bhla à, ɔ́ srʋ á wɔlɩ́ a cɩ́cása, ɔ́ srʋ á mà: «Mɔ́ɔ ɔ̀ nɩ́ Kláyɩ́sɩ#1.20 Kláyɩ́sɩ: Bhʋ́anɩ ŋnɩ́ɛ́ a gba ŋwɔ́ɔ mà, nyɔɔ́ lɩ̀à ɔ́mɔ́ Lagɔ sa à lé ɔ́ cíè ɔ̀ kà ʋ́ kɔ́ a nyʋa neé sa à. ŋwɔ́ɔ.» 21Bhʋ́ á yrɔ́ɔ́ mà: «Bhè ɩ̀ ŋwɔ́ɔ a? Lagɔ a nékʋ́cinyɔ Elíi?» Ɔ́ anɩ́: «Ʋ́nn! Nɩ́ Elíi ŋwɔ́ɔ!» Nɩ̀ɩ́ Elíi ŋwɔ́ɔ, mà Lagɔ a nékʋ́cinyɔ nà ká wá yi a, ɔ́mɔ́ ɩ̀ ŋwɔ́ɔ?#1.21 A zɛlɩɩ sáà Detro 18.15,18; Mala 3.23. Ɔ́ anɩ́: «Ʋ́nn!» 22Bhʋ́ á yrɔ́ɔ́ mà: «Bhè nyɩ́kpɔcegbá kɛtɛkʋ́ ɩ̀ ŋwɔ́ɔ bhè nɩ ka àmɔ̀ srʋ a? Cí bhè nyʋaá à cíe àmɔ̀ a, à nɩ̀ mʋ a, à kà a dí sa a! Nànɩ́ nyɩ́kpɔcegbá ɩ̀ ŋwɔ́ɔ a?» 23Záan anɩ́:
«Mɔ́ɔ ŋwɔ́ɔ zɩkpɩkɔfʋ́ a mnɩ́ a nyɔɔ́ ɔ̀ kʋ̀ mɔ̀ɔ lé ɔ̀ pá wɔlɩ́ a,
Ɔ̀ nie: A gɩglà Kanyɔ a nyúzɔ̀ɔ̀,
Lé a srí ɔ nyízɛ̀ɛ̀ sá.
Sɩ́tɛ̀ tɛ̀ɛ̀ Lagɔ a nékʋ́cinyɔ Ezayíi cí wá.»
24Nyʋaá á cíe wá lé a yi Záan gɔ̀ a, Falizɩ́ɛnyʋa kʋ̀ wá ʋ́.#1.24 Zúfʋnyʋa a céàna ŋwɔ́ɔ Falizɩ́ɛnyʋa. 25Nyʋaá mɛ́ ɔ́ jɩ̀ á yrɔ́ɔ́ kɔ́ɔ̀kɔ́, á nie: «Nànɩ́ nɩ̀ɩ́ Kláyɩ́sɩ ŋwɔ́ɔ, nɩ̀ɩ́ Elíi ŋwɔ́ɔ, lé nɩ̀ɩ́ sáà Lagɔ a nékʋ́cinyɔ ŋwɔ́ɔ, bhè lɛ́gbá kʋ̀ʋ bhè ɩ̀ ŋwʋ́ nyʋa nyú wlú à?» 26Bhʋ́ Záan srʋ á mà: «Mɔ́ɔ, ɩ́ ŋwʋ́ɛ́ nyʋa nyú wlú, mà nyɔ a múó kʋ amɔ nyièdɩ lé a nɩ́ ɔ́ yì, ɔ́ kʋ mɔ́ɔ bɩ́ ɔ́ yie, 27lé náa srʋɛ sáà amɔ mà, nɩ́ ɔ mʋ́ pla si a bhlí a pʋ́pʋ́ a vlulèe neé bhɩa.»
28Wɔlíɛ́ fɩ́ɛ́ ɩ̀ cílo lɛ́ sɩ́tɛ̀ a, Betaníi mʋ́ ɩ́ plɩ́ɩ, Zrʋdɛ́ɛ a nyíé a bɩ́, bhlɩ́ɛ́ jɩ̀ Záan ŋwʋ́lɛ wá nyʋaá nyú wlú a.
Zozíi ŋwɔ́ɔ Lagɔ a bhlábhlɩ́yʋɔ́
29Zrɩ̀ɩ zɩ a, Záan yɛ́ Zozíi ɔ́ yiloó mʋ́ lé Záan sa né, ɔ́ anɩ́: «Aa dʋdʋ̀ Lagɔ a bhlábhlɩ́yʋɔ́ ɔ̀ sa ʋ́ zɩkpa zɔ̀ a nyumoé a, ɔ́mɔ́ lɛ̀ɛ̀. 30Tányɩɛ́ mʋ́ ɩ́ cí wá lɛ́ mà: Nyɔɔ́ ɔ̀ yie mɔ́ bɩ́ a, ɔ́ ŋwnɔ́ kʋ́ lé ɔ́ zi mɔ́ɔ kʋ́ a, ɔ́ wɔlɩ́ ɩ́ cíé wá. Ɔ́mɔ́ tɛ̀tɛ̀ kʋ̀ wá fɩ́ɛ́ ʋ́ lé mɔ́ ɩ́ wlʋ, ɔ́mɔ́ ŋwɔ́ɔ tɛ̀wlʋ́. 31Mɔ́ɔ mɔ̀glʋ̀ nɩ́ ɔ́ wá yì, mà Izrayɛ́lɩnyʋa kɔ́ɔ́ yɩbhlɩ a, ɩ́zà ɩ́ yii wá nyʋa nyú wlúŋwʋ̀ka.»
32Lé Záan cí wá sɔ́kʋ́ wɔlɩ́ɛ́ ɩ̀ kɩ̀ɩ̀ dá ɔ́ yɛ́ a, ɔ́ anɩ́: «Ɩ́ yɛ́ Blɔ̀blɔ̀zùzùò kpóòkpú bhísakʋ́ lé ʋ́ kwlíi lé ʋ́ bɔ́lɔɔ́ jɩ̀. 33Mɔ́ɔ mɔ̀glʋ̀ nɩ́ ɔ́ wá yì, mà tányɩɛ́ mʋ́ Lagɔ cíe mɔ́ɔ nyʋa nyúwlúŋwʋ̀kà a, bhʋ́ ɔ́ srʋ mɔ́ɔ mà: Nyɔɔ́ nà kà yɛ́ lé Blɔ̀blɔ̀zùzùò ká jɩ̀ kwlíi lé ʋ ká jɩ̀ bɔ́ɔ a, ɔ́mɔ́ ŋwɔ́ɔ nyɔɔ́ ɔ̀ kwléle Blɔ̀blɔ̀zùzùò nyʋa jɩ̀ a. Ɔ́ nɩ nyʋa a nyú wlúŋwʋ̀ŋwʋ́ɛ́ a sá kʋ̀. 34Mɔ́ɔ, mɔ̀glʋ̀ ɩ́ yɩ́ɩ dá, lé ɩ́ kɩɩ cɩ́cása cémʋ́ ɔ́mɔ́ ŋwɔ́ɔ Lagɔ a Yuwliyʋɔ́ a.»
Zozíi wle ɔ tagà kʋjɩ̀nyʋ̀àà
(Matíe 4.18‑22)
35Zrɩ̀ɩ zɩ a, Záan yà ɔ́ kʋjɩ̀nyʋ̀àà aa nyièdɩ a kʋjɩ̀nyʋ̀àà a sɔ́ sɔ́ kʋ sɔ́kʋ́ ʋ́, 36bhè ɔ́ dʋdʋɛ Zozíi jɩ̀ ɔ́ plɩ́ɛ́, lé ɔ́ sané, ɔ́ anɩ́: «Lagɔ a bhlábhlɩ́yʋɔ́ ɔ́mɔ́ lɛ̀ɛ̀!» 37Záan a kʋjɩ̀nyʋ̀àà sɔ́ɔ́ nú wɔlɩ́ɛ́ ɔ́ cí a, áa gbɛ Zozíi jɩ̀. 38Zozíi yrɩ́bha lé ɔ́ dʋdʋ̀ a, á kʋ ɔ bɩ́, bhʋ́ ɔ́ yrá á, mà: «Lɛ́gbá a mʋ́mɔ áa?» Á anɩ́: «Wlabíi! Dɛ́gbá ɩ̀ tópʋ á?» Wlabíi a gba ŋwɔ́ɔ Kanyɔ. 39Lé ɔ́ srʋ á, ɔ́ anɩ́: «A yi à kà mʋ a ká ʋ́ yɛ́!» Lé á mʋ lé á yɛ́ ɔ kʋda kosúgbo a glíyi a mɔ̀na a tányɩ. Á kʋ ɔ́ gɔ̀ lé yrʋ́ bhli.
40Simɔ́ Pɩ́ɛ́lɩ ɔ nɩ́ayʋ Adrée ɔ́mɔ́ bhle nyʋaá à nú Záan cícíwɔlɩɛ́ bhè à jɩ́ Zozíi kʋ́ a sɔ́. 41Ɔ́ mʋ a, tagànyɔ̀ɔ̀ ɔ yɔ̀sɔ́ gbɩ́dà a, ɔ́mɔ́ ŋwɔ́ɔ ɔ nɩ́ayʋ Simɔ́ɔ, ɔ́ srʋ ɔ́, ɔ́ anɩ́: «À yà Kláyɩ́sɩ yɛ́!» Kláyɩ́sɩ ŋnɩɛ́ a gba ŋwɔ́ɔ mà ɔ́mɔ́ Lagɔ gbázɩ̀ mʋ́ lé ɔ́ cíe lé ɔ̀ kà ʋ́ kɔ́ neé sa. 42Lé ɔ́ fɔɔ́ Zozíi gɔ̀. Zozíi dʋdʋ̀ɔ̀ diin, lé ɔ́ srʋ ɔ́ mà: «Mɔ̀ ŋwɔ́ɔ Záan a yʋ́ Simɔ́ɔ, mà mɔ̀ á na ká yɩ́ Sefásɩ wleè.» Sefásɩ ŋnɩ́ɛ́ ɩ́mɩ́ ŋwɔ́ɔ sáà Pɩ́ɛ́lɩ, Pɩ́ɛ́lɩ ŋnɩɛ́ a gba ŋwɔ́ɔ cɔ́kʋ.
Filípʋ lé Natanayɛ́lɩ
43Zrɩ̀ zɩ a, Zozíi anɩ́ ɔ ká Galilée mʋ, mà ɔ yà Filípʋ sɔ́ ya gbɩ́dà, lé ɔ́ srʋ ɔ́, ɔ́ anɩ́: «Filípʋ, jɩ́ mɔ́ɔ kʋ́!» 44Zɩ̀glàmà Filípʋ, Besayidáa a nyɔ kʋ̀, dúó a múó a mnɩ́ ɔ́mɔ́ bhè Adrée yà Pɩ́ɛ́lɩ sɔ́ wlʋ́ɛ́. 45Filípʋ a sɛ́fʋ, ɔ́ yɛ́ Natanayɛ́lɩ a, ɔ́ srʋ ɔ́ mà: «Nyɔɔ́ ɔ̀ kɔ̀ɔ̀ gɔ̀ a wɔlɩ́ Moyízɩ cí lɛ́ jràmábɔ̀gwɩ a mnɩ́, bhè ɔ̀ kɔ̀ɔ̀ wɔlɩ́ Lagɔ a nékʋ́cinyʋaá cí lɛ́ a#1.45 A zɛlɩɩ sáà Detro 18.18; Eza 9.5‑6; Eze 34.23., à yɔ̀ɔ̀ yɛ́, ɔ́mɔ́ ŋwɔ́ɔ Zozíi, Nazalɛ́tɩ a Zɔ̀zɛ́fʋ a yʋ́ kʋ̀ ʋ́.» 46Lé Natanayɛ́lɩ yrɔ́ɔ́ mà: «Ɩ̀ yi saá mà námawɔlɩ yi Nazalɛ́tɩ kʋ́ flʋʋ?» Bhʋ́ Filípʋ srʋ ɔ́ mà: «Yi kà yɛ́.» 47Natanayɛ́lɩ námɛ ɔ́ yile Zozíi mʋ́ lé Zozíi a yɩ́ bhliloó jɩ̀, ɔ́ anɩ́: «Izrayɛ́lɩyʋ mɔ̀glʋ̀ lɛ̀ɛ̀, ɔ nɩ́ yrʋʋ́ ka.» 48Bhʋ́ Natanayɛ́lɩ yrɔ́ɔ́ mà: «Dɛ́gbá mɔ̀ ɩ̀ yɩbhlɩ mɔ́ɔ a?» Zozíi anɩ́: «Ɩ́ yɛ́ fɩ́ɛ́ mɔ̀ figíesu zɔ̀ lé Filípʋ wle mɔ̀.» 49Natanayɛ́lɩ srʋ ɔ́ sɔ́kʋ́ mà: «Kanyɔɔ̀, Lagɔ a Yuwliyʋ ɩ̀ ŋwɔ́ɔ, lé ɩ̀ ŋwɔ́ɔ sáà Izrayɛ́lɩnyʋa a lóo.» 50Bhʋ́ Zozíi srʋ ɔ́ mà: «Ɛ̀kɛ̀ɛ̀ zà ɩ́ srʋ mɔ̀ɔ mà ɩ́ yɛ́ɛ wá mɔ̀ figíesu zɔ̀ a, ɩ́ zà ɩ̀ tɔ̀ yɩ́ lɛ́ mɔ́ɔ duo. Kʋ ʋ́ mà ɩ̀ yi àyɩ wɔlɩ́ ànɩ̀ɛ̀ ɩ̀ yie lé ɩ́ zi ɩ̀lɩa kʋ́ a, yɛ́ɛ.» 51Ɔ́ srʋ ɔ́ sɔ́kʋ́ mà: «Ná anɩ́, cɩ́cása a mnɩ́, lagɔɔ́ yi kɛ́zɔ̀ klʋ́ kalɔɔ̀ lé a yii Nyɔɔ́ a Yuwliyʋɔ́ a wlú kʋ́ kplɔkplɔzìzi yɛ́ ɩ́ yi gblàa, ɩ́ yi kwlíi.»
Zvasarudzwa nguva ino
Záan 1: NEY
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.