GENESIS 8
8
Buanchukcho Donghnak
1Pathian nih Noah le a sin i lawng chungah a ummi saram vialte le saṭil vialte kha a philh hna lo, cucaah vawlei cungah thli a hranter i ti cu ṭum hram aa thawk. 2Vawlei tang rilipi an hna hna le van i a ummi awng hna cu a phih hna. Van in a rung surmi ruah cu a tlaih hna i 3ti cu a ṭum chin lengmang. Ni za le ni sawm nga chung ti cu a ṭum i 4thla sarihnak thla#8.4 thla sarihnak thla hi October thla a si. a ni hleisarih ni ah Ararat ram tlang pakhat ah lawng cu aa din. 5Ti cu a ṭum chin lengmang i thla hranak thla#8.5 thla hranak thla cu January thla a si. a ni khat ni ah tlang par kha an lang.
6Ni sawm li hnuah Noah nih thlalangawng kha a hun i 7langak pakhat a thlah. (Vawlei cungin ti cu a kao hlantiang a kenkip ah a zuang lengmang). 8Cun Noah nih cun ti cu a zor cang maw zor cang lo ti hngalhnak dingah ṭhuro pakhat a thlah, 9sihmanhsehlaw ti nih khan vawlei kha a rak khuh dih rih caah futnak hmun a hmu lo. Cucaah Noah nih khan a kut in a hei banh i lawng chungah cun a luh ṭhan. 10Ni sarih a ngan hnuah lawng chung cun ṭhuro cu a thlah ṭhan. 11A sinah zanlei ah khan a ra kir i a hmur in oliv hnah tharte hi a hun i put. Cucaah Noah nih ti cu a ṭum cang ti kha a hngalh. 12Cun Noah nih cun a dang ni sarih a ngan ṭhan i ṭhuro kha a thlah ṭhan; tutan cu a ra kir ti lo.
13Noah kum za ruk le kum khat a si kum, thla khatnak thla#8.13 thla khatnak thla cu April thla a si. a ni khatnak ni ah, ti cu vawlei cungin a kao dih. Lawng cungkhuh kha a hun i khua a hei zoh tikah, vawlei cu a ro cang ti kha a hmuh. 14Thla hnihnak thla, cu thla ni kul le ni sarih ni ah vawlei cu a dihlak in a ro.
15Pathian nih Noah cu a thawh i, 16“Na nupi le na fapa hna le an nupile hna he, lawng chung hin chuak cang u. 17Cun saram vialte zong kha chuah hna — va si hna seh, saṭil si hna seh, saram hna phun si hna seh, chuah dih hna law vawlei cungah hin fa hring ṭhan hna seh law karh ṭhan hna seh,” a ti. 18Cucaah Noah cu a nupi le a fapa hna le an nupile hna he khan lawng chung cun an chuak. 19Ramlak saram vialte, inn zuat saṭil vialte, va vialte, saram hna phun vialte kha, anmah le an phun ning cio in a bubu in lawng chung cun an chuak.
Noah Nih Raithawinak A Tuah
20Noah nih Bawipa caah biakṭheng pakhat a ser; saram thiang pawl le va chung khan phun khat ah pakhat cio a lak hna i khangh thawinak caah biakṭheng cungah cun a khangh hna. 21Bawipa nih cu rim thaw cu a theih tikah, “Minung tuahmi ruangah vawlei cu zeitikhmanh ah chiat ka serh ṭhan ti lai lo; minung cu a no lio tein a ruahnak cu a ṭhalo ti kha ka hngalh. Atu i ka tuah bantuk hin zeitikhmanh ah thilnung vialte kha ka hrawk ṭhan ti hna lai lo.
22Vawlei a um chung paohpaoh cu
Tuh caan a um lai i
ṭuan caan zong a um ko lai.
Khuasik caan a um lai i khualum caan a um lai,
ṭhal caan a um lai i fur caan a um lai,
chun a um lai i zan a um lai.
Hi hna hi zeitikhmanh ah an dong lai lo,” a ti.
Zvasarudzwa nguva ino
GENESIS 8: HCL06
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Lai (Hakha) Common Language Bible © Bible Society of Myanmar 2006