Pianciilna 7
7
Tuipi Liim
1 Topa in Noah tungah, “Na innkuan bupin teambaw sungah tum vun; leitung theampo ah a maanin a seam sia nangma bekma kong mu hi. 2Biakna taw kisai a thiangtho nganhingte kop sali tek paipui in a, ahizong a thiangtho ngawl nganhingte ahile kop khat tek bek paipui in. 3Vacimte zongh nam khat ciang kop sali tek paipui in. Leitung ah vacim le nganhing nam theampo no nei kikin a nuntak natu hi bang vawt in. 4Tu zo ni sali zawkciang, ni sawmli sung sun le zan ngua kong zusak tu a, ka vawtsa nuntakna nei theampo a mon natu hi,” ci hi. 5Tuaciang Noah in Topa thupiak theampo vawt siat hi.
6Leitung ah tuipi a liim lai in Noah kum zaluk pha hi. 7Tuipi liimna pan a suakta tu in Noah le a zi, a tapate le a zite teambaw sungah tum uh hi. #Mt 24:38-39; Lk 17:27 8Nganhing le vacim namkim anu le apa kopkhat tek, biakna taw kisai a thiangtho ahizong a thiangtho ngawl ahizong, 9Pathian thupiak bangin Noah taw teambaw sungah tum khawm uh hi. 10Ni sali zawkciang tuipi liim hi.
11Noah kum zaluk a phak zawk, a tha nii na ni sawm le ni sali ni in, leinuai a om tui teng puaktham in kihongkeak a, mun theampo pan tui phuul hi, van ii tui kongpi theampo kihongin, #2 Pe 3:6 12sun sawmli le zan sawmli tawntung leitung ah nguazu hi. 13Tua ni ma in Noah le a zi sia a tapate thum Shem, Ham, Japheth le a zite teng taw teambaw sungah tum uh hi. 14Amate taw in nganhing nam theampo, innsate le ngamsate, a lian a no, le vacim nam theampo tum uh hi. 15Pathian thupiak bangin nganhing nungta peuma ii a nam khat sim sung pan anu khat le apa khat veu Noah taw teambaw sungah tum uh hi. 16Noah a tum zawkciang Topa in kongkha khak hi.
17Tuipi liim ni sawmli a ngei ciang teambaw a laam khom tu in tui hong thuk hi. 18Tui thuk vaial a, tui tungah teambaw laam hi. 19Tui thuk mama a, mualsaangbelte zong khum hi; 20mualsaangbelte ii dawn tungsia ah metre sali a phak dong bang tui khang hi. 21Leitung ah a om a nungta teng — vacim theampo, nganhing theampo le mihing theampo thi siat hi. 22Leitung ah om husang theampo thi hi. 23Topa in leitung ah a nungta theampo — mihing, nganhing le vacimte theampo mongsak siat hi. Noah le ama taw teambaw sungah a om teng bek taang hi. 24Ni 150 sung tui kiamsuk tu kipan ngawl hi.
Zvasarudzwa nguva ino
Pianciilna 7: SCB2
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Siyin Chin Bible © Bible Society of Myanmar, 2016