Rwiyo Rukuru rwaSoromoni 8
8
1Dai chete wakanga uri sehanzvadzi kwandiri,
akanwa pamazamu amai vangu!
Ipapo kana ndaikuwana panze,
ndaikutsvoda
uye hapana aizondishora.
2Ndaizokutora ndouya newe
kumba kwamai vangu,
ivo vakandidzidzisa.
Ndaikupa waini yakaiswa zvinonhuhwira kuti unwe,
nomukume wemitamba yangu.
3Ruoko rwake rworuboshwe rwuri pasi pomusoro wangu,
uye ruoko rwake rworudyi rwakandimbundikira.
4Imi vanasikana veJerusarema ndinokurayirai:
Musazunguza kana kumutsa rudo
kusvikira irwo rwada rwoga.
Shamwari
5Ndianiko uyo ari kuuya achibva kurenje
akazendamira pamudiwa wake?
Mukadzi
Pasi pomuti womuapuro ndakakumutsa;
ipapo mai vako vakakubereka,
ipapo ivo vairwadziwa vakakubereka.
6Ndiise pamwoyo pako sechisimbiso,
sechisimbiso paruoko rwako;
nokuti rudo rwakasimba sorufu,
godo rarwo seguva harishanduki.
Runopisa serimi romoto,
somurazvo mukuru kwazvo.
7Mvura zhinji haigoni kudzima rudo;
nzizi hadzigoni kurukukura.
Kunyange munhu akapa
pfuma yose yemba yake kuti awane rudo,
zvingazvidzwa chose.
Shamwari
8Tine hanzvadzi yedu duku
uye mazamu ake haasati akura.
Tichaitireiko hanzvadzi yedu
pazuva rokukumbirwa kwayo kuti iwanikwe?
9Kana ari rusvingo,
tichavaka shongwe dzesirivha paari.
Kana ari musuo,
tichamukomberedza namapuranga omusidhari.
Mukadzi
10Ndiri rusvingo,
mazamu angu akaita seshongwe.
Ndizvo zvandava pamberi pake,
somunhu anouyisa kugutsikana.
11Soromoni aiva nomunda wemizambiringa muBhaari Hamoni;
akapa munda wake wemizambiringa kuvanhu vairima vachimuripira.
Mumwe nomumwe wavo pachibereko chawo
aiuya namashekeri chiuru#8:11 makirogiramu angaita 11.5 esirivha.
12Asi munda wangu wemizambiringa ndewangu kuti ndiupe;
chiuru chamashekeri esirivha ndechako, iwe Soromoni,
asi mazana maviri#8:12 makirogiramu angaita 2.3 ndeevanochengeta michero yawo.
Murume
13Iwe unogara mumapindu
unoshandirwa neshamwari,
rega ndinzwe inzwi rako!
Mukadzi
14Handei mudiwa wangu,
uite semhara kana setsvana
pamusoro pamakomo
azere zvinonhuhwira.
Zvasarudzwa nguva ino
Rwiyo Rukuru rwaSoromoni 8: BDSC
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Shona Contemporary Bible
Copyright © 2005, 2018 by Biblica, Inc.®
Used by permission. All rights reserved worldwide.
Bhaibheri Dzvene MuChiShona Chanhasi
Copyright © 2005, 2018 Biblica, Inc.®
Mvumo yokushandisa ndima yakapiwa. Kodzero dzose dziripo.