ወንጌል ዘማቴዎስ 3
3
ምዕራፍ 3
ዘከመ ሰበከ ዮሐንስ በእንተ መንግሥተ ሰማያት
1 #
ማር. 1፥1-8፤ ሉቃ. 3፥1-11። ወበውእቱ መዋዕል መጽአ ዮሐንስ መጥምቅ እንዘ ይሰብክ በገዳመ ይሁዳ ዘዮርዳኖስ። 2#4፥17። እንዘ ይብል ነስሑ እስመ ቀርበት መንግሥተ ሰማያት። 3#ኢሳ. 40፥3፤ ዮሐ. 1፥23። እስመ ዝንቱ ውእቱ ዘተብህለ በኢሳይያስ ነቢይ እንዘ ይብል «ቃለ ዐዋዲ ዘይሰብክ በገዳም ወይብል ጺሑአ ፍኖቶ ለእግዚአብሔር ወዐርዩ መጽያሕቶ።» 4#2ነገ. 1፥8። ወልብሱ ለዮሐንስ እምፀጕረ ገመል ወቅናቱ ዘአዲም ውስተ ሐቌሁ ወሲሳዩ አንበጣ ወመዓረ ገዳም።#ቦ ዘይቤ «መዓረ ፀደና» 5ወይመጽኡ ኀቤሁ ኵሎሙ ሰብአ ኢየሩሳሌም ወኵሎሙ ሰብአ ይሁዳ ወኵሉ አድያሚሃ ለዮርዳኖስ። 6ወያጠምቆሙ በፈለገ ዮርዳኖስ እንዘ ይትአመኑ ኀጣውኢሆሙ። 7#23፥33። ወሶበ ርእየ ብዙኃነ እምፈሪሳውያን ወሰዱቃውያን እንዘ ይመጽኡ ውስተ ጥምቀቱ ጽሚተ ይቤሎሙ ኦ ትውልደ አራዊተ ምድር መኑ አመረክሙ ከመ ታምሥጡ እመቅሠፍት ወእመንሱት ወእመዐት ዘይመጽእ። 8ግበሩኬ እንከ ፍሬ ሠናየ ዘይደልወክሙ ለንስሓ። 9#ዮሐ. 8፥33-42። ወኢይምሰልክሙ ዘታመሥጡ በብሂለ አብ ብነ አብርሃም እብለክሙ ከመ ይክል እግዚአብሔር እምእላንቱ አእባን አንሥኦ ውሉድ ለአብርሃም። 10#ሉቃ. 13፥7-9። እስመ ናሁ ወድአ ማሕፄ ተሠይመ ውስተ ጕንደ ዕፀው ይንበር ኵሉኬ ዕፅ ዘኢይፈሪ ፍሬ ሠናየ ይትገዘም ወውስተ እሳት ይትወደይ። 11#ማር. 1፥7፤ ሉቃ. 3፥16፤ ዮሐ. 1፥26-27። አንሰኬ አጠምቀክሙ በማይ ለንስሓ ወዘእምድኅሬየሰ ይመጽእ ውእቱ ይጸንዕ እምኔየ ዘኢይደልወኒ እጹር አሣእኖ ወውእቱ ያጠምቀክሙ በመንፈስ ቅዱስ ወበእሳት። 12ዘመሥኤ ውስተ እዴሁ ዘቦቱ ያነጽሕ ዐውደ እክሉ ወያስተጋብእ ሥርናዮ ውስተ መዛግብቲሁ ወሐሠሮሰ ያውዒ በእሳት ዘኢይጠፍእ።
በእንተ ጥምቀተ እግዚእ ኢየሱስ
13 #
ማር. 1፥9፤ ሉቃ. 3፥21፤ ዮሐ. 1፥31-34። አሜሃ መጽአ እግዚእ ኢየሱስ እምገሊላ ውስተ ዮርዳኖስ ከመ ይጠመቅ እም ዮሐንስ በፈለገ ዮርዳኖስ። 14ወዮሐንስሰ አበዮ እንዘ ይብል አነ እፈቅድ እምኀቤከ እጠመቅ ወአንተኑ ትመጽእ ኀቤየ። 15ወአውሥአ እግዚእ ኢየሱስ ወይቤሎ ኅድግ ምዕረሰ እስመ ከመዝ ተድላ ለነ#ቦ ዘኢይጽሕፍ «ተድላ ለነ» ወይደልወነ ከመ ንፈጽም ኵሎ ጽድቀ ወእምዝ ኀደጎ። 16ወተጠሚቆ እግዚእ ኢየሱስ ሶቤሃ ወፅአ እማይ ወናሁ ተርኅወ ሎቱ ሰማይ ወርእየ መንፈሰ እግዚአብሔር እንዘ ይወርድ በአምሳለ ርግብ ወነበረ ዲቤሁ። 17#17፥5፤ ኢሳ. 42፥1። ወናሁ መጽአ ቃል እምሰማይ ዘይብል ዝንቱ ውእቱ ወልድየ ዘአፈቅር ዘቦቱ ሠመርኩ።
Zvasarudzwa nguva ino
ወንጌል ዘማቴዎስ 3: ሐኪግ
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda