SEMPANHNAK 6
6
Minung Sualhnak
1Laivum pumpuhluk ah minungte tu pungzai amam ai fenu tampui khai nai i.#Job 1:6; 2:1 2Ciafangin Pathian ai fapate in ciami fenute mawi bikbik hmu fangin amahte daihhnak ril ai hoi tlang i. 3Ciafangin Bawipa in, “Minung hnenah i rauhla heh kumzangza in umruai tuh lo ing, zaimantifangin taksa naimi i. Tunai panin kum za le kum kul tah tam nung tuh lo i,” tiin ti i. 4Cia san le ciahnua san ahkhai Pathian ai fapate le minung ai fenute pawl dun ai naihnak fate tu tlami bangin a ham bikbik i. Anite tu hlanlai san ai hmingthang le ralpha bikbik pawl i.#Mip 13:33
5Pathian in laipua vumai minungte hmuahhmuah heh a hrokhrawl in amahte thinlung ah ruathnak siava lekin dim i, ti a hmu fangin, #Mat 24:37; Luk 17:26; 1Pet 3:20 6lailung vumah minung a bawn heh sir ai a thinhnawm i. 7Ciamanin, “I bawnciahnak minung hmuahhmuah, konteng ah a um inkhai hnawmcan tuh sek ing. Ramsate le vaniute khai, a bok ai vak thai tianin hnawmcan leh tuh sek ing, a bawn ngah ta i sir i,” tiin ti i. 8Ikhalselai Noah vum ahcen Bawipa a lungawi i.
9-10Noah ai fate tu hemite i: fapate pathum nai ai Shem, Ham le Japhet i. Noah tu mipha bik i ai cia san ahcen amah pakhat ian Pathian ai lungkhimmi i. Pathian thawn a um kawmtu i.#2Pet 2:5 11Ikhalselai midang hmuahhmuah Pathian hmaiah siava ze ai hnawmhnak heh khuahacang ah karhzai amam i. 12Cen Pathian in laivum heh a pha lo ze in hmu i, zaimantifangin mi zongzong phatlohnak in dim i.
Noah In Lawng Bawn I
13Cen Pathian in Noah hnenah, “Minung heh laipua vuman boruai tuhin ruat zo ing. Siatsuah tuh sek ing, zaimantifangin laipua heh sual bawnhnak in dim i. 14Nangmah ca Cyprus thing pha phun in lawng bawn tu, A songah akhante tampui bawn tulai, a songlam le pualam farhnai noih tu. 15Ciami lawng khiah pi za li le sawmnga sau, pi sawmsarih le pi nga kau, pi sawmli le pi nga sang in bawn tu. 16A phukhuk bawn tulai a khuh le a bangkhang karlak khiah zung hlairiat in zuah tu. Cen thuah thum in bawn tulai a sir ah dawngkham bawn tu. 17Lailung vumah tilawi tlungruai tuhai a nungmi hmuahhmuah siatsuah tuh sek ing. Lailung vumai a nungmi hmuahhmuah thi tuh sek i. 18Ikhalselai nangmah thawn thukhamhnak bawn tuh ing. Na nupui le na fapate le a nupuite thawn lawng songah lut tuh i si. 19Nung tuh ve in ramsa hinkhim in a nuu le a paa, khuah khat ṭen, lawng songah khum tu. 20Vaniu hinkhim songin pahnih ṭen, ramsa songin a ham ituseh a sen ituseh pahnih ṭen, a nung thilhnak tuhin lawng songah lutpui tu. 21Ai pha ti le rong hinkhim in khawl tulai, nangmah le amahte ca dah tu. Hemi tu lawng songah ning aih tuh i,” tiin ti i. 22Pathian ruaihnak bang rori in Noah in bawn sio i.#Heb 11:7
Zvasarudzwa nguva ino
SEMPANHNAK 6: RZB
Sarudza vhesi
Pakurirana nevamwe
Sarudza zvinyorwa izvi
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.