Yohani 18
18
Ukulemwa kwa Yesu
1Ilelo lwʼayanzile zinizʼuYesu, pʼahafuma kunzi navasundikwa vakwe, ahavalʼukulambʼahajenje he vakuti Kideloni izina, ahavala pe yalʼibusitani, mwʼahinjila navasundikwa vakwe.
2-11: Mat. 26,47-56. Mal. 14,43-52. Luk. 22,47-53.
2NuYuda vovulo wʼakwʼamwanilile apamanyile pupo, she pe vahavungana shima uYesu navasundikwa vakwe. 3Uwene lelʼuYuda vamupiyʼimpuga ya vasikali navanyamata va vashiputʼavapiti nava vaFalisayi, pe wope ahavala navo kukwo. Avene vasenzite ninyale namazondolo nimpalala. 4UwenʼuYesu shʼazimanyile zyonti zye zikwe zimwinzilaje, pʼahasavuha ukufuma, ahavavuzya ahati: Mukumwanzʼunanu? 5Pe vahamuvuzyʼavene vahati: TukwanzʼuYesu wa mu-Nazaleti. PʼuYesu ahati: Nkwe nene. NuYuda vulo wʼakwʼamwanilile ayimiliye navo. 6Ilelʼavene lwʼakuti: Nkwe nene, pe vahagaluha shingunga, vahagwa pansi. 7Ahavuyizyʼuwene ahavavuzilizya ahati: Mukwanzʼunanu? Avene vahati: TukwanzʼuYesu wa mu-Nazaleti. 8UwenʼuYesu ahamula ahati: Nkwe mbavuzizye ntili: Nene. Inga lelo mukunanzʼine, pe muvalehaje vanava vavalaje; 9ukuti lilunjihaje izwi lyʼayanzile atili: Ava vʼumpiye atatezile numo. 10UwenʼuSimoni Peteli wʼali nishipanga, shʼahakula, ahadibʼumunyamata wa washiputʼumupiti, ahasengʼikutwi lya kumulilo. Uwenʼumunyamata wununo ali wʼuMalisho izina. 11PʼuYesu ahayanga nawʼuPeteli ahati: Kwihagʼishipanga mushipata shakwe. Ishikombʼisho shʼuTata ampiyʼatili shʼungʼwelaje, she minji nsitʼukungʼwela?
12-27: Mat. 26,57-75. Mal. 14,53-72. Luk. 22,54-71.
12Iyenʼimpuga ya vasikali lelo numutwale navanyamata va vaYuda ve vahamulemʼuYesu, vahamukunga. 13Vahavala nawo, vahataliha ukumutwala kwa Hanasi. Uwene ali wʼuyisevwala wa Kayifa, wʼali washiputʼumupiti umwaha wuyo. 14We wʼuKayifa uno wʼavavuzizyʼavaYuda atili: Hinzʼukuvafwilʼavantu umuntu woka.
UPeteli akuyihana kwa Yesu
15NuSimoni Peteli nuwamwavʼumusundikwa ve vahalandata mwisinda mwa Yesu. Umusundikwa uno wʼamumanyilʼuwashiputʼumupiti. Wʼahinjila nuYesu muluvungano lwa washiputʼumupiti. 16UwenʼuPeteli wʼahimilila kunzi kushilyango. Pʼahafuma kunzi umusundikwʼuwamwavo uno wʼamumanyilʼuwashiputʼumupiti, ahayanga numusungashilyango, ahamwinjizyʼuPeteli. 17Pʼumulindu umusungashilyango uno ahayanga nuPeteli ahati: Amwe nawe ute we musundikwa wa muntʼula? Uwenʼahati: Ha, ine ndali. 18Avenʼavazya navanyamata ve vimiliye pupo vahotagʼumwoto, wa mazimwa we vapemṿile, she vumiyʼimpepo. NuPeteli vulo ahimilila navo ahotʼumwoto.
19Uwenʼuwashiputʼumupiti ahamuvuzilizyʼuYesu ahati: Utuvuzye navasundikwa vaho ninongwa zyaho zyʼuvasambilizizyʼavantu. 20UwenʼuYesu ahamwamula ahati: Ine insi yonti njivuzizye apazelu inongwa, nkasambilizyagʼavantu mwonti mwonti mumasinagogi namwa tempeli, mwe vontʼava-Yuda vakuvungana, kukwilu kwe ntayanzile nazimo. 21Ukumbuzilizya shonu ine? Nkwʼuvavuzilizye vuvo ve viṿuye zye nkayanga, shʼavene vazimanyile zye nkavavuzyaga. 22Ilelo lwʼayanzile zinizi, pe wokʼumunyamata wʼapalamine nawo ukwimilila ahamuhoma nikofi uYesu ahati: Ukumwamula vovulo uwashiputʼumupiti? 23UwenʼuYesu ahamwamula ahati: Inga njanzilʼimbivi, pʼumenelezyajʼutinji wayanzile zizino zizino. Nkandʼinga ngolosizyʼukuyanga pʼukunkomela shonu? 24PʼuHanasi ahamutwalʼumukungwa kwa Kayifa uwashiputʼumupiti.
25UwenʼuSimoni Peteli nyene wʼayimiliye pupo ahotʼumwoto. Pe vahamuvuzya vahati: Amwe ute we musundikwa wakwe nawe? Uwenʼahahana ahati: Ha, ine ndali. 26Pe wokʼumuzya wa washiputʼumupiti umujenzi wʼula wʼuPeteli amusenzilʼikutwi wope ahayanga ahati: Ngati nkwazile nawe mubusitani mula? 27Pʼahavuyizya havili UPeteli ahahana. Pʼinkanda ihajenda nukuvilishila.
UYesu kwa Pilati umusungansi wa shiLoma
28-19,15: Mat. 27,2; 11-30. Mal. 15,1-19. Luk. 23,1-25.
28Pe vahafuma nawʼuYesu mwa Kayifa, vahavala nawo kunyumba ya vulonzi. Kuhasha kunzi. Avene nyene vahasitʼukwinjila munyumba ya vulonzi, she vatili mwe tukwambulʼamiho, she vatili tulyanjʼuPasa. 29Pʼahafuma lelʼuPilati, ahayanga ahati: Mukumulonjelela shonu umuntʼuno? 30Avene vahamula vahamuvuzya vahati: Apele ate mutalamalandu pe nkandi tutamulesite kukwaho. 31PʼuwenʼuPilati ahavavuzya ahati: Simumusende mwenemwe lelo, mumulonje mwe zivaliyeʼinkomelezyo zyinyu. AvenʼavaYuda vahamuvuzya vahati: She muvinzite mutili mutahagoje numʼumuntʼiswe. 32Mwe zihalunjiha zyʼahayangagʼuYesu lwʼakutaha uvufwe vwʼakwinza ukufwilʼuwene. 33PʼuPilati ahinjila havili munyumba ya vulonzi, ahanawitʼuYesu, ahamuvuzya ahati: We mwene wa vaYuda iwe? 34AhamulʼuYesu ahati: Amwe zyʼusimishizizye wewe weka zinizi, ingavanga vakuvuzizye avanji? 35PʼahamulʼuPilati ahati: Ne muYuda ine? Vakulesite kukwane uluho lwaho navashiputʼavapiti. Uvomṿile shonu? 36AhamulʼuYesu ahati: Ishanʼishinamwene shite sha nsi yinino ndali, shipele sha nsi munumu ishinamwene shane, pe nkandʼavanyamata vane valuye ukuti ntatwalwaje munyove zya vaYuda. Shinishi lelo pʼishinamwene shane shite sha munumu. 37PʼuPilati ahamuvuzya ahati: Pe fwane we mwene lelo? AhamulʼuYesu ahati: Mwe mumwo mwʼukuyanga. Ne mwene. She zye zizyo ninzile munsʼumu, zye zya kuti nkomeshezyaje uvwanalyoli. Vonti ava muvwanalyoli vakwiṿwʼizwi lyane. 38UwenʼuPilati ahamuvuzya ahati: Vwe ṿintu vuli uvwanalyoli? Ilelo pe lwʼayanzile linili, pʼahafuma kunzi kuvaYuda, ahavavuzya ahati: Inʼumuntʼuno ntakwaga numʼumulandu. 39Imwe muli numwiho uwa kuti mbatavulilʼumʼumuntu paPasa. Vuli lelo, mukasimʼukuti mbatavulilʼumwene wa vaYuda? 40Avene nyene vahavuyizya ukuvilishila vahati: Wununo we ndali! NkandʼuBalaba! UwenʼuBalaba nyene lyali lipalazi.
Zvasarudzwa nguva ino
Yohani 18: NYi1965
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Nyiha New Testament © British and Foreign Bible Society, 1965.