LWIKHI 17
17
Ńne le ábhwe yɔ́phɔ́
(Ɔ́n wú Mat 18.6-7,21-22; Ɔ́n wú Mák 9.42)
1Jezwi kranman mɛ́n yíchwɛmán sa:
– Ácí khúnbrɛn ábha pɛ áyí khɛ́n néphan bha khɔ́ lóphɔ tɛ́ ne. Lókhɛ́n áli muswe se lephan a, lóyí lókɔnhɔn bha khɔ́ mɛ́n phɔ bhá! 2Ló lephan lókɔn, áyɔn se salé ohɔ́n ábhú khóo bɛn di mɛ́n bhwá, ló ohɔ́n-ɛn fɔ́nká gwe hromɛn, brɛn ló ánman chɛ́ ńmiɔ́ lókɔn aya, bɛn oká ńneyítɛ́ hrómɛn. 3Ɔ́n hámwanhɛ́n!
Kasé hɛ hɔnsɛ́n tɛ́ ne, ɛhɛ mwámwá. Kasé ńjrɛn mɛ́n yítɛ́, ɛyɔ́phɔ́-ɛ. 4Kasé ácí brɛ antɛ́ ne hɛ phɔ lí ndɔn khwache, khɛ́n lóka tɛɛ ńtɛ ne, kasé ánsáji man kranmán hɛ lée: “Mɛn yɛn salé mɛn tɛ yí yan hɛ phɔ”, tɛmɛ ɛyɔ́phɔ́-ɛ.
Mímíbhú
5Ló Krisi-mranchɛ́mán kranman Hwánthe sa:
– Ɛtɛ́ lo mímíbhú othúbhɔ háne.
6Ló Hwánthe kranman wo sa:
– Kasé ɔ́n pɛ mímíbhú bhrií khɛ́n átɛsa mutáde mí, ɔ́n ma gɛ tɔ sé áyá bhrií lókɔn lée: “Fi lo tré gwe hromɛn”, ánman ji hɔ́n.
Nɛnkhwɛ́nwo, mɛ́n júmán ayɔn se salé anní
7– Hɔ́n hrómɛn: abɛn nɔn kasé mɛ́n nɛnkhwɛ́nwo chan, khɔ ábithe o, khɔ ńbranmán bó o, bha bháthó, khɛ́n ábha tɔlé: “Bha chéthé gbraa ɛli nɛn ɛ”? 8Mɛ́n bhwe ánman tɔ sé nkɛ nɔn ali salé: “Tɛ mɛn nɛn, ɛjrɛn hɛ phɔ ntráliɛ́, ɛkhwɛn nɛn sé mɛn ní, ló ɛsé mɛn ndu mɛn nán, lómánji khɛ́n ɛlí hɛ nɛn, khɛ́n ɛnán hɛ ndu.” 9Mɛ́n nɛnkhwɛ́nwo yí atɛ se hɛ́nthé, wú ánman ná nkɛ nansi; léliló? 10Lóyábhɛ brɛ nɔn ali hɔ́n ékɛ lɔ: áyí khɛ́n ochɛ hɔ́n lée ɔ́n tɛ́, lóka ɔ́n tɛ phu, ɔ́n tɔlé: “Lo-ɛ, júmánmán wrɛ́ pán le lo; áyí khɛ́n ayɔn se salé lo tɛ́, lónɔn lo tɛ.”
Jezwi tɛ khokhóbhé-phɔmán áwɔ́ phɔ jan
11Jezwi bho sitó pɛ eló Jeruzalɛ́mɛn, ńmúrikhɔ Samari le Galile ɔ́nmɔn ngrɛmɛ́n. 12Ńnɛ ákhúbhɛ́ bɛn, lóne nɔn khokhóbhé-phɔmán áwɔ́ bha ywɛnli. Wo ya nthwéthwemɛn-áan 13ló wo elúkhwɛ́ tɔ sa:
– Jezwi Yíliéwo, wu lo nfɛkhu!
14Jezwi wu wo, ló ńkránman nkɔn sa:
– Ɔ́n no sé nphahamán owú hɔ́n.
Wo ka wo eló lóne, lótɛ wo phɔ jan. 15Wo hromɛn, bɛn ka awu salé mɛ́n phɔ jan, lótɛ annúkhwɛ́ átɔ́ khrákhrá mɛn nri Yankan hwa ɔ́nmɔn má. 16Ńhalé Jezwi nta mɛn, ńhɔn hɛ́nmɛn dɔlé ló ńna nkɛ nansi. Lephan lókɔn mɛ́n-ɛ, Samari khúbhɛ́ sɛ. 17Ló Jezwi tɔ sa:
– Wú léli hɔ́n hɛ́n áwɔ́ nɔn hɔ́n phɔ jan? Ńthé krɛnnɛ́n hɛ́n ábhrɔ, wo-ɛ bán wo bha? 18Álepɛ lephan khɛ́n abhu mwanhɛ́n sáji bha la Yankan nansi, kasé áleli thekhusɛ brɛ lókɔn pán sáji bha.
19Ló Jezwi kranman nkɛ sa:
– Hɛ mímíbhú do hɛ ka, tɛmɛ ɛchánfe tho lo.
Yankan Bhringbi khúbhɛ́ ka ábha bhá
(Ɔ́n wú Mat 24.23-28,37-41)
20 Fariziɛnnɛ́n bhi Jezwi sa, cíbɛn nɔn Yankan Bhringbi khúbhɛ́ bha bhá ɛ? Ló ńtɔ se nkɔn sa:
– Yankan Bhringbi khúbhɛ́ bha le bhá sé owú mɛbhí mɛn. 21Obha lé gɛ tɔlé: “Ábha krɛn!” saji “Ábha kwan!” Khɛ́n tɛmɛ ɔ́n yɛ́n salé Yankan Bhringbi khúbhɛ́ bha hɔ́n thethé.
22Lómánji ńtɔ se mɛ́n yíchwɛmán sa:
– Cíbɛn ɔ́n ma nɛn salé ɔ́n wú Lephan Mi cí brɛ bɛn mɛbhí, khɛ́n ɔ́n ma lé wú lócí lókɔn bhrɔ́ɔ́. 23Wo bhá kranmán hɔ́n lée: “Ńma krɛn!” saji wo bhá tɔlé: “Ńma kwan!” Ɔ́n ne ká wo mɛ́n, ɔ́n ne ya wá dwan. 24Lósi yábhɛ khɛ́n ágbánkhran tɛn khɔ́ dri, khɛ́n áfi átho chán phɛ́nta bɛn bha hɛ́n phɛ́nta lójɔ ɔn, Lephan Mi cí ábha bhá, lóyí yábhɛ brɛ tɛɛ ebhá tɛ́ e. 25Khɛ́n áyɔn se salé anphrɛ ní gbre khóo, ló thénthé khúbhɛ́nɛ́n khúnbrɛn lɔ otrɛnmɛn khɛ́n. 26Noe cí tho yí yábhɛ atɛ, lóyí yábhɛ brɛ tɛɛ ebhá tɛ́ Lephan Mi cí tho lɔ e. 27Lóka lókɔn, néphan elí nɛn, wo enán ndɛ, wo ephɛ́n mie le ńsɛ ɔ́nmɔn, wo esé wo miɔn, ńsɛ le ńmie ɔ́nmɔn phɛ́n, kábrɛ kábrɛ ádi lóka Noe ka hran mɛn: ńdu bhɔ pi si khúnbrɛn, ló wo khúnbrɛn wo khu du. 28Ábha tɛ́sa Lɔ́thu cí tho ékɛ si yábhɛ akhɔ tɛ: lóka lókɔn, néphan elí nɛn, wo enán ndɛ, wo ephɛ́ yí, ló wo ephɛ́ yí lí, wo éha nyámí, wo ethán nkhú; 29lókhɛ́n lóka Lɔ́thu chan Sodɔmɛn féne, lópán átɛn le yánnan ɔ́nmɔn chantho bha mrwɛn wo, ló áwɛn wo khúnbrɛn. 30Lephan Mi cí ábha bhó mɛ́n phɔ thándi lɔ, lóyí yábhɛ brɛ tɛɛ ebhá tɛ́ nɔn ali lókɔn.
31Lócí lókɔn, lephan khɛ́n achan nkhú tho diathé, annɛn nó khúthé no khwɛ́n mɛ́n yí abha lóne; lóyábhɛ brɛ, lephan abha bithe lɔ, olé sáji bhá bháthó. 32Tɛmɛ Lɔ́thu mia bhwe odi hɔ́n mwanhɛ́n! 33Lephan khɛ́n ábha nɛn salé mɛ́n mɛpɔ́bhá oliá, lephan lókɔn ánman gɛ mɛ́n mɛpɔ́bhá; lókhɛ́n lephan tɛɛ ábha nɛn salé mɛ́n bo mɛ́n mɛpɔ́bhá ɔn, lephan lókɔn, mɛ́n mɛpɔ́bhá bha liá. 34Mɛɛ́n kranmán hɔ́n salé, kasé lephan mɔn la sɔ́nfa brɛ tho lómréci brɛ lókɔn: wo bhá hɔ́n bɛn, ló wo bhá yɔ́ bɛn ká. 35Ńmie mɔn khɛ́n elɔ́ yí ábhú brɛ tho ɔn: wo bhá hɔ́n bɛn, ló wo bhá yɔ́ bɛn ká. [ 36Ńsɛ mɔn khɛ́n ábha bhá bithe: wo bhá hɔ́n bɛn, ló wo bhá yɔ́ bɛn ká.]
37Ló yíchwɛmán bhi nkɛ sa:
– Hwánthe, bánne nɔn lóyí bha tɛ́ ɛ?
Ló Jezwi kranman nkɔn sa:
– Kɔnthewo si aka ɔn, lóne nɔn khrokpé lɔ bhurɛhɛ́n.
Zvasarudzwa nguva ino
LWIKHI 17: ENT96
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Ebrié New Testament © Bible Society of Côte D'Ivoire, 1996.