Génesis 40
40
Pʉaro masa ti cahãrire quihõno yahuha José
1Jia tiha pʉaro mʉa faraõ to cahamaca. Cʉ̃iro sehe tirore se co wa cohtaina pʉhtoro jia tiha. Pairo sehe tirore pão dahrebasa cohtaina pʉhtoro jia tiha. Cʉ̃ dacho faraõ to dutiro seheta yoaeraha tina. 2To dutiro sehe ti yoaerachʉ ñʉno, faraõ sehe tina mehne sua yʉhdʉa wahaha. 3Ã suaro, peresu ti yoari wʉhʉpʉ tinare biha dapo dutiha. Ti peresu yoari wʉhʉ pʉro sehe faraõre ñʉ wihbo cohtaina pʉhtoro Potifar jia tiha. Tí wʉhʉpʉta José cʉ̃hʉ peresu jia tiha. 4Tinare to biha dapo dutichʉ ñʉno, Potifar sehe Josére tina cʉ̃hʉre ñʉ wihbo dutiha. Ti biha dapori baharore tina sehe payʉ dachori peresu jia tiha.
5Ã yoa cʉ̃ ñami faraõre se co wa cohtaina pʉhtoro jimariro, ã jichʉ pãore dahre cohtaina pʉhtoro jimariro cʉ̃hʉ cahãha. Ti cahãri sehe soro ni yahu duaa jiha. 6Ti ã cahãri ñami bohrearoi José sehe ti cahapʉ sãa sʉha. Sãa sʉ, tinare to ñʉchʉ, tina sehe bʉjʉa witiina jiha. 7Ti ã jiina jichʉ ñʉno, tiro sehe õ sehe ni sinitu ñʉha tinare:
—¿Dohse yoana mʉsa ã bʉjʉa witiina jijari? —ni sinitu ñʉha.
8To ã ni sinitu ñʉchʉ, tina sehe õ sehe ni yʉhtiha:
—Micha ñami sã cahãrire cahyana nica sã. “¿Dohse jiro baro sã õ sehe cahãari?” ni, masi duana nimaja. Sãre yahuboriro sehe mariahna —ni yʉhtiha tirore.
Ti ã ni yʉhtichʉ tʉhoro, José sehe õ sehe niha tinare:
—Mʉsa cahãrire Cohamacʉ dihta quihõno yahu masica. Tirore ño payoriro jija yʉhʉ. Ã jina mʉsa cahãrire yʉhʉre yahuga —niha tinare.
9-10To ã nichʉ tʉhoro, faraõre se co wa cohtaina pʉhtoro jimariro sehe to cahãrire Josére yahuha:
—Yʉhʉ õ sehe ñʉrucui cahãhi. Yʉhʉ potoi secʉ cʉ̃dʉ tia dʉpʉ dʉpʉri tidʉre ñʉhi. Yʉ ñʉchʉta, tí dʉpʉri sehe noano pũri ti mʉa waha, tuhsʉ, noano cohori ti mʉa wahahre. Baharo tí cohori sehe se tõhori dojo mʉa waha, dói noano ñia tõhori waha mʉa wahachʉ ñʉrucui cahãhi yʉhʉ. 11Ã wahachʉ ñʉcʉ, yʉhʉ sehe faraõ to sihniri wahware cjʉahi. Ã jii yʉ basita tí tohõrine na, tí wahwapʉ wipe sãa, tirore tí core warucui cahãhi yʉhʉ —ni yahuha.
12To ã ni yahuchʉ, José õ sehe ni yʉhtiha tíre:
—Mʉ cahãri õ sehe ni duaro nina. Tia dʉpʉ, se dʉpʉri tia nʉmʉ quihõno nia. 13Tia nʉmʉ baharo, tiro mʉsa pʉhtoro faraõ sehe mʉhʉre peresupʉ jirirore wiorohca. Wio tuhsʉ, mʉ dahrariro cjiro seheta pari turi mʉhʉre cũnohca tjoa. Ã jicʉ mʉhʉ sehe mʉ dahramariro seheta pari turi faraõre se co wa cohtariro jiihca tjoa —ni yahuha tirore.
14-15Ã ni tuhsʉ, õ sehe ni namoha:
—Mʉ pʉhtoro mehne pari turi dahrai, yʉhʉ cʉ̃hʉre wacũ curega. Yoadohoga yʉhʉ cʉ̃hʉre. Yʉhʉ sehe buhiri marieno õpʉre peresupʉ jii nija. Tuhsʉ, hebreo masa ya yahpapʉ yʉ jisinichʉ cʉ̃hʉre wiho warota paina tuaro mehne ti yaca tariro jija yʉhʉ. Ahri quitire yʉhʉre yahubasaga mʉ pʉhtoropʉre. Tí quitire tʉhoro, yʉhʉ cʉ̃hʉre wioboca tiro —niha José.
16-17Ã yoa noaa quiti tirore to yahuchʉ tʉhoro, pãore dahre cohtaina pʉhtoro jimariro cʉ̃hʉ to cahãrire Josére yahuha:
—Yʉhʉ cʉ̃hʉ õ sehe cahãhi. Cahãnopʉre tia bati, pão posa tia batirire tju payo, faraõpʉre naabasai nihti. Tí batiri buipʉ pisari batiro sehere payʉ pão sãahti. Tí sehe paye soro sehe bajua, paye cʉ̃hʉ soro sehe bajua jia peri jihre. Ã yoa yʉ tju payo wahcãrucuro wato, minichahca peri sehe wʉ dija pja sʉ, tí batiropʉ sãare chʉ pahñochʉ ñʉrucui cahãhti yʉhʉ —ni yahuha Josére.
18To ã ni yahuchʉ tʉhoro, José sehe to cahãrire tirore õ sehe ni yahuha:
—Mʉ cahãri mʉhʉ sehere õ sehe ni duaro nina. Tia bati, mʉ ñʉa batiri sehe tia dacho quihõno nia. 19Tia dacho baharo, faraõ mʉhʉ cʉ̃hʉre peresupʉ jirirore wiorohca. Wio tuhsʉ, mʉhʉre wajã cohãnoca dutirohca. Tuhsʉ, mʉ pjacʉ cjirore yucʉcʉpʉ pihõ yo dutirohca. Baharo yucaa dija taa, mʉ pjacʉ cjirore chʉ pahñonocaahca —ni yahuha tirore.
20Ã yoa pʉa nʉmʉ yʉhdʉ, tia nʉmʉ waharo waroi faraõ to masa bajuari dacho cjiro jiha. Ã jiro tí dachore yʉhdoro taro, jipihtina to doca macaina pʉhtoare pji cahmachu, tinare sʉho chʉro taro niha. Ã jiro pjíro chʉare yoa dutiha tiro. Ã yoa tí dachoihta to doca macaina pʉhtoa ti ñʉrocaroi, peresupʉ jiinare tirore se co wa cohtaina pʉhtorore, ã jichʉ pãore dahre cohtaina pʉhtoro cʉ̃hʉre wio dutiha. 21To wio dutiri baharo, se co wa cohtaina pʉhtorore to dahrari cjirireta pari turi dahra dutiha. Ã jiro tiro sehe pari turi faraõre se co wa cohtariro jiha tjoa. 22Pãore dahre cohtaina pʉhtoro sehere wajã cohãnoca dutiha. Tuhsʉ, to pjacʉ cjirore yucʉcʉpʉ pihõ yo dutiha. José ti cahãrire to yahuriro seheta waharo niha. 23To niriro sehe wahachʉ ñʉparota, faraõre se co wa cohtaina pʉhtoro sehe Josére ne wacũ payoeraha.
Zvasarudzwa nguva ino
Génesis 40: GVC
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Todo os direitos são reservados a:
©Missão Novas Tribos do Brasil
Rua Itália, Qd. 57 L. 5-7 – Santa Isabel
75083-310 Anápolis, GO