मत्ती 11
11
ईशू और युहन्ना डुबकी दैणैं आल़अ
(लुका 7:18-35)
1ज़ांऊं ईशू आपणैं बारा च़ेल्लै का खोज़ी बोली करै नाठअ तिधा का ईशू तिन्नें नगरी लै शिक्षा दैंदअ और प्रच़ारा करदअ।
2युहन्ना डुबकी दैणैं आल़ै शूणअ मसीहे कामों समाद और आपणैं च़ेल्लै छ़ाडै तेऊ सेटा पुछ़दै, 3“ज़ुंण सह एछणैं आल़अ त, सह मसीहा तूह ई आसा कि अज़ी हाम्हैं कसा होरी न्हैल़ै रहूंमै लागी?”
4ईशू दैनअ तिन्नां लै ज़बाब, “ज़ुंण बी तम्हैं भाल़अ और शूणअ, तिन्नां गल्ला खोज़ा युहन्ना का कि 5कांणै लागै भाल़ै, लाट्टै लागै हांढदै-फिरदै। कोल़्हे बमारी आल़ै करा राम्बल़ै और टौणैं लागै शुणदै। मुल्दै लागै ज़िऊंदै हंदै और दुखी दल़िदरा का खोज़ा खुशीओ समाद। 6परमेशरा दैणीं तेऊ लै बर्गत ज़ुंण मेरै काम भाल़ी और शिक्षा शूणीं मुंह दी भरोस्सअ करा और बैहम निं करे।”
7ज़ांऊं युहन्ना छ़ाडै दै दूत तिधा का नाठै, ता ईशू बोलअ तिधी कठा हुऐ लोगा का युहन्ने बारै इहअ “तम्हैं बणैं उज़ल़ ज़ैगा युहन्ना सेटा किज़ू भाल़ै नाठै तै? बागरी करै च़ुकदी नगाल़ै ज़िहै मणछा भाल़ै ज़ुंण आपणीं गल्ला तेभा-तेभी बदल़ा? 8तै तम्हैं किज़ू भाल़ै नाठै तै? भाल़ा, तम्हां का आसा राम्बल़ै करै थोघ ज़ुंण नरम झिकल़ै बान्हां, तिंयां रहा राज़ मैहला दी। 9तै तम्हैं किज़ू भाल़ै नाठै तै? कसा परमेशरे गूरा भाल़ै? हाँ, हुंह खोज़ा तम्हां का सत्त कि तम्हैं नाठै परमेशरे गूरा का बी बडै भाल़ै।
10 “अह आसा सह ई युहन्ना ज़सरै बारै शास्त्रा इहअ आसा लिखअ द, (मलाकी 3:1)
‘भाल़ा मंऐं छ़ाडअ आपणअ दूत ताह आजू-आजू,
ताकि सह ताल्है तेरै एछणें धैल़ी लै लोग तैर करे।’
11 “हुंह खोज़ा तम्हां का सत्त कि ज़ुंण बेटल़ी का ज़ल्मैं दै आसा, तिन्नां मांझ़ै निं युहन्ना डुबकी दैणैं आल़ै का बडअ कोहै आथी। पर ज़ुंण स्वर्ग राज़ा दी होछ़ै का होछ़अ आसा, सह आसा तेऊ का बडअ।
12 “युहन्ना डुबकी दैणैं आल़े ज़मानैं ओर्ही एभै तैणीं दैनअ स्वर्ग राज़ा दी डेऊणा लै बडअ भारी ज़ोर। पर जोधै मणछ चुटा तेता छ़ड़ैऊंदै। 13युहन्ना तैणीं रहै परमेशरे सारै गूर और बधान आजू हणैं आल़ी गल्ला प्रगट करदै लागी।
14 “तम्हैं मना च़ाऐ नां मना, अह युहन्ना आसा सह एलियाह ज़सरै बारै परमेशरे गूरै आसा बोलअ द कि सह एछणअ। (मलाकी 4:5) 15ज़ै तम्हैं एता समझ़णअ च़ाहा, तै दै एसा गल्ला दी धैन कि मंऐं एभै तम्हां का किज़ै बोलअ।
16 “एऊ जुगे लोगा हुंह किहै खोज़ूं कि किहै आसा? तिंयां आसा तिन्नां शोहरू-माठै ज़िहै ज़ुंण बज़ारै बेशी करै एकी दुजै लै हाक्का लाई इहअ बोला
17 ‘हाम्हैं बाज़ी तम्हां लै सरनाई
और तम्हैं निं नाच़ै,
हाम्हैं किअ हिक्का पटाकी शोग
पर तम्हैं निं लेरै।’
18 “किल्हैकि युहन्ना डुबकी दैणैं आल़ै नां होरी लोग ज़ेही भांती-भांतीए रोटी खाई और नां अंगूरो रस झुटअ और तम्हैं बोलअ इहअ कि तेऊ दी आसा भूत?
19 “हुंह मणछो शोहरू आअ खांदी-पिंदी। तिंयां बोला इहअ भाल़ा, छ़ाकू और साबा का बाधू अंगूरो रस झुटणैं आल़अ मणछ। साबा का बाधू कारै मांगणैं आल़ै और पापी मणछो साथी। पर तेऊओ थोघ लागा तेऊए कामां करै कि सह केतरअ सिध्द आसा।”
बिश्वास नांईं करनै आल़ै लै एछणी खरी
(लुका 10:13-15)
20तेखअ बोलअ ईशू तिन्नां नगरीए लोगे बारै ज़ेथ तेऊ बडै भारी च़मत्कारे काम किऐ तै। किल्हैकि तिन्नैं निं आपणअ मन अज़ी बी बदल़अ आथी।
21 “खुराजीन और बैतसैदा नगरीए लोगो तम्हां लै हणीं बडी खरी। ज़ुंण शगतीए काम तम्हां दी किऐ, ज़ै तिंयां काम सूर और सैदा नगरीए होरी ज़ातीए लोगा मांझ़ै किऐ हंदै, तिन्नां छ़ाडणअ त खिंथल़ै पल़ेटी करै छ़ारे रूल़ी प्रैंदै बेशी पाप करनअ।
22 “पर हुंह खोज़ा तम्हां का सत्त कि ज़ेभै परमेशरा सोभिओ न्याय करनअ तेभै दैणीं तेऊ सूर और सैदा नगरीए पापी लोगा लै सज़ा। पर थारी दशा हणीं तिन्नां का बी खास्सी बूरी।
23 “हे कफरनहूम नगरीए लोगो, तम्हैं निं इहअ सोठा कि थारअ हणअ स्वर्गै होरी लोगा का खास्सअ अदर? पर तम्हैं डेऊणैं उंधै नरका लै ज़िधी तम्हां सज़ा भेटणीं। ज़ुंण नछ़ैण और च़मत्कार ताह सेटा किऐ दै आसा, ज़ै तिंयां सदोम नगरी दी किऐ हंदै ता सह रहणअ त आझ़ तैणीं बणीं।
24 “पर हुंह खोज़ा तम्हां का सत्त ज़ेभै परमेशरा सोभिओ न्याय करनअ तेभै दैणीं तेऊ सदोम और अमोरा नगरीए पापी लोगा लै सज़ा। पर तेरी हणीं तेता का बी खास्सी बूरी दशा।”
बोझ़ा दी दाभूऐ दै लोगा लै राआम
(लुका 10:21,22)
25तेखअ बोलअ तेभी ईशू, “हे मेरै बाप्पू परमेशर, स्वर्गै और पृथूईए मालक। हुंह करा तेरअ शूकर कि तंऐं डाही ईंयां गल्ला ज्ञैनी और समझ़कार मणछा का च़ोरी और इना लान्हैं दी की तंऐं प्रगट। 26हाँ मेरै बाप्पू, किल्हैकि ताह भाऊंआ इहअ ई।
27 “मेरै बाप्पू आसा सभाल़ी दी मुखा सोभ गल्ला। शोहरू निं बाप्पू का सुआई कोहै बछ़ैणदअ। बाप्पू बी निं कोहै बछ़ैणदअ पर शोहरू बछ़ैणा तेऊ और तिंयां बी बछ़ैणा ज़हा दी शोहरू प्रगट करनअ च़ाहे।”
28 “तम्हैं सोभै एछा मुंह सेटा लै ज़ुंण शास्त्री और मुखियै खोज़ै दै बधाना मनणें भरपूर कोशिश करा ज़ुंण तम्हां प्रैंदै बोझ़ आसा हुंह दैंऊं तम्हां लै तिन्नां सोभी गल्ला का राआम।
29 “मेरअ जूँ च़का आपणीं कान्हा, और मुखा शिखल़िया; किल्हैकि हुंह आसा शरीफ और दिला का भोल़अ, और तम्हां भेटणीं आपणैं प्राणा दी शांती। 30किल्हैकि मेरअ जूँ आसा सान और मेरअ बोझ़अ आसा हल़कअ।”
Zvasarudzwa nguva ino
मत्ती 11: OSJNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.