Luka 23
23
Yesu i Wang’ Pilato
(Mt 27:1-2, 11-14; Mk 15:1-5; Yoh 18:28-38)
1Man udulgi ceke ai malu, gikele i wang’ Pilato. 2E gimaku dote, giwacu kumae, Wanwang’u ng’atu maeni beroco thek mwa, man ebekwero ya ku jumi ajok ni Kaisari, ewacu de nia en e m’e Kristu m’ubimo. 3E Pilato penje, ewacu kumae, In i Ubimo mi Juyahudi? Man edwoko lembe ire ewacu kumae, Iwacu. 4Man Pilato wacu ni julam ma dongo kud udul dhanu kumae, Anwang’u dubo ngo i ng’atu maeni. 5Ento gijai ma sagu, giwacu kumae, Ethubo i dhanu, eponjo cil i Yahudi ceke, ugambre i Galilaya cil kakeni.
Yesu i Wang’ Herode
6Ento ka Pilato winjo maeni, epenjo tek ng’atuni en e Jagalilaya. 7E kan eng’eyo nia eni the pokolembe pa Herode, eore ba Herode, ma en bende eni i Yerusalem i ceng’ maeni.
8Nie ka Herode neno Yesu, anyong’a nege dit: kum ava nene gamu time con, kum ewinjo pire; man egeno y a ebineno musana moko m’utimbre ni kume. 9E epenje ku lembe dupa; ento eloko lembe ngo ire. 10E julam ma dongo ku jugorcik gicungo, gibedote apila. 11Herode de kud asikari pare ging’ale, gicaye de, man ka gironye ku kendi ma ber giore edok ba Pilato. 12Man i ceng’ maeno Herode ku Pilato gicamu rimo: kum naka adegi nii kindgi.
Jung’olo Tho wi Yesu
(Mt 27:15-26; Mk 15:6-15; Yoh 18:39-19:16)
13E Pilato lwong’o julam ma dongo man jubim ku dhanu de karacelo i bang’e. 14Man ewacu igi kumae, Wukelo ng’atuni i bang’e calu ng’atu acel m’uroco dhanu: man nen, an, m’aluro i lembe pare i vutwu, anwang’u dubo ngo i ng’atu maeni pi gin maeno ma wudote pire: 15ungo, kadok Herode: kum edwoke i bang’wa; man nen, etimo gin moko ngo m’uromo ku tho. 16Ka kumeno abifode, man abigonye. 17Nie ekoegony jakol acel igi be i agba. 18Ento kagi ceke gikok karacelo, giwacu kumae, Ter ng’atu maeni cen, gony iwa Baraba: 19en e ng’atu acel ma jubole i odkol kum ethubo ali i adhura, man kum negonek. 20Pilato yero igi kendo, m’eyenyo egony Yesu; 21ento gikok, giwacu kumae, Gure, gure. 22E ewacu igi wang’ adege, Nedi, gin ma rac ang’o ma ng’atuni timo? Anwang’u lembe moko ngo i bang’e ma romo ku tho: ka kumeno abifode abigonye de. 23Ento gijai giwoi ku dwandgi ma tek, ma gipenjo ko nia jugure. E dwandgi sagu. 24Man Pilato ng’olo nia dong’ jutim gin ma gipenjo. 25Man egonyo ng’atu ma jubole i odkol kum athube ku nek, en e ng’atu ma gikwaye; ento Yesu emie ni yeny migi.
Maram Juguro Ko Yesu wi Yen M’athara
(Mt 27:32-44; Mk 15:21-32; Yoh 19:17-27)
26E ka gipeye woko, gimaku ng’atu acel ma nyinge Simon ma Jakurene, m’uai i thim, e giketho yen m’athara i wie, kara eyei elub ko ng’ei Yesu.
27E udul dhanu ma dit ulubo ng’eye, ku mon m’ugoyo nduru m’uywak de i kume. 28Ento Yesu lokre i bang’gi ewacu kumae, Nyig Yerusalem, kud wuywak i kuma, ento wuywak i kumwu giwu, man pi nyithindho mu. 29Kum nen, ceng’ bibino, ma gibiwacu i ie kumae, Mugisa ni mugumba, ku ic ma fodunyol ungo de, man thuno ma fodi judhodho ngo. 30#Hos 10:8; Nyu 6:16I nindo maeno gibimaku wacu ni gudi kumae, Podh i wiwa; ni ungulu got ke kumae, Umwa. 31Kum tek gitimo gin maeni i yen ma numu, ang’o ma bitimbre i yen m’uthwo?
32Juario mange bende ginuti, ma gi judubo, ma jupeyogi, gikugi jubecinegogi.
33E ka giwok i ka ma julwong’o Upokowic, gigure keca, ku judubo de, acel yo ku cing’ ma yor acwic acel ke yo ku cing’ ma yor acam. 34#Zab 22:18E Yesu wacu kumae, Vwa, wek lem migi rwiny; kum ging’eyo ngo gin ma gitimo. Man gipoko kendi pare i kindgi, gigoyo ku jara. 35#Zab 22:7Dhanu de cungo gibeneno. Jubim de ging’ale, giwacu kumae, Ebodho jumange; wek ebodhre gire, tek en e Kristu pa Mungu, m’egoyo nyinge. 36#Zab 69:21E asikari bende gicaye, ma gibino i bang’e, gimio picwa ire, 37giwacu de kumae, Tek in i Ubimo mi Juyahudi, bodhri giri. 38Ramblembe bende ni yor i wie kumae, MAENI UBIMO MI JUYAHUDI.
39E jadubo acel ma julierogi ecaye, ewacu kumae, In i Kristu ngo? bodhri giri ku wan de. 40Ento wadi dwoko lembe, ejuke, ewacu kumae, E ilworo cil Mungu de ngo, in m’ini i lembapoka ma rac ma cal aceli? 41E wan ebedo iwa pwe andha; kum wanwang’u sukulia m’uromo ku tic mwa: ento ng’atuni timo gin moko ngo ma rac. 42Man ewacu kumae, Yesu, poi pira kan imondo i ker peri. 43E ewacu ire kumae, Andha awacu iri kumae, Tin wabibedo wakudi i Paradis.
Tho pa Yesu
(Mt 27:45-56; Mk 15:33-41; Yoh 19:28-30)
44 #
Ai 26:31-33
I kinde maeno e calu saa mir abusiende, e mudho yutho wi ng’om ceke cil i saa mir abung’wende, 45der ceng’ de jik: kusika mi bongu m’i hekalu de kak dra. 46#Zab 31:5Man Yesu, m’ukok ku dwande ma tek, ewacu kumae, Vwa, aketho tipona i cingi: e kan ewacu maeni, eweko cwinye kadhu. 47E ka jego neno gin m’utimbre, eyungo Mungu, ewacu kumae, Andha ng’atu maeni e ng’atu ma pwe. 48E udul dhanu ceke coltri karacelo kum neno maeni, e ka gineno gin m’utimbre, gidok ku dhongo korgi. 49#Lk 8:2, 3E dhanu ceke ma ging’io kugi, ku mon m’ulubo ng’eye kud i Galilaya, gicungo ku cen, gineno gin maeni.
Kuny pa Yesu
(Mt 27:57-61; Mk 15:42-47; Yoh 19:38-42)
50Man nen, ng’atu ma nyinge Yusuf, m’e ng’atu acel ma kind dilo, en e ng’atu ma ber ma pwe de 51(eyio lembapora migi ku tic migi de ngo), en e ng’atu ma Arimathaya, adhura mi Juyahudi, m’ebekio ker pa Mungu: 52ng’atu maeni eidho ba Pilato, man ekwayu avuj Yesu. 53Man efudhe piny, eboye de i bongu ma nwang’, ekethe de i liel ma juroko i cana, ka ma avu dhanu fokuvuto i ie ngo. 54Man en e ceng’ Yikopiny, ceng’ sabatu de dhingo. 55E mon, m’ubino kugi kud i Galilaya, gilubo ng’eye, man gineno liel ma juroko i cana, man maram juketho ko avuje. 56#Ai 20:10; Poi 5:14E gidwogo, giyiko udok ma ng’wice ng’ar ku mo de.
I ceng’ sabatu de giyom calku lembang’ola.
Zvasarudzwa nguva ino
Luka 23: AB1970
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
The Holy Bible In Alur (Lur), Revised Orthography © United Bible Societies, 1970.