Kejadian 33
33
Yakub Esau emin sarlok tigisa wene
1At Esau osi 400 enemin wagaihwe at Yakub en il lagaksogo yerentesi ’gal e, at eiyagai ebano ado me’gisogo re, hwe Lea pam ano pasulat, ado pema me’gisogo re, hwe Rahel pam pasulat, ado pema hwami lerontogwi a’ge ebano enebam pasulat, tegei.
2At en hwami lerontogwi a’ge ebano enemalik enemin naduk pasulat, is ene’berlik Lea malik enemin ebam pasulat, is ene’berlik o’borl akhit Rahel malik Yusuf emin enebam pasulat, tegei. 3Asogo tegeirik, at Yakub en is onlogotma ebano naduk wagarik e, hau weriselat e’gik sabit hebarligen odogorlu pam ’gwiangma ’bou til-til e, at ue oyuk edipmu waga. 4Asogo tegei a’geat de, at Esau ano Yakub e’bek pungtak wagarik e, ebe tenak poluk hau parliksogo weriselat e, emde motok-motok hau weriselat, tegei. Asogo tagalat e, is enebe ’biren lo’gu maregisa. 5Asogo tigisarik e, pobuk at Esau en il lagaksogo yerentesi ’gal e, disogo hin wesi,
“Aphwami etleba hemin wegep ai salak?” oluk hin wesimu, at Yakub en e,
“Aphwami eba re, naik Allah en hot woknesi a’ge o,” oluk mo’gulesi. 6Wene ano arat egesarik e, naduk e, hwami lerontogwi a’ge enemalik ebano enemin, Esau ologotma legesarik enebe ’gonu ogulat hau werigisa. 7Is ene’berlik e, Lea emalik enemin ’gonu ogulat, hau werigisa. Pobuk ologun ’goboksogo re, malik Yusuf emin, ia Rahel emin asogoat ’gonu ogulat hau werigisa.
8Hau werigisema, at Esau en e, hin disogo wesi,
“Ye, naduk e, kambing domba logolak a’bik enemin sarlok tegis ano, hogola no’gosogo epasu legen,” oluk mo’gulesi.
Asogo mo’gulesimu, at Yakub en e, disogo mo’gulesi,
“Hat hede op emagoluk woluk wegi o, nue,” oluk egei.
9Asogo egeimu, at Esau en e, disogo mo’gulesi,
“A. An yogodak ne’gikmu elirat oruak o, not. Hat tenak welegen a’ge ebano ’berlegat tenak welemin o,” oluk mo’gulesi.
10Asogo mo’gulesimu, at Yakub en e,
“Nue, asogo ogun! Hat an nebaget hogola arat op aga holuk e, di a’ge yu a’ge wokheigoluk woluk wegi a’ge yu wemin, nue. Yogodak nebe opsogo hau watnebigenma no oluk e, hat horogole yethasu legi ano Allah orogole ’gela’ge yethasu legi o. 11Ai holuk e, nue, an weat wokheigoluk woluk wegi a’ge yu ’berlegat hwerlemin o. Naik Allah ebabut op en, an di a’ge yu a’ge nagai a’ge ano arat elit woknesi o,” oluk eselat e, pobuk Esau horluagoluk ede ningsogoat ’gagalegeimu pobuk hwerlesi.
12Hwerlesirik e, pobuk at Esau en e, disogo mo’gulesi,
“Nis ’bok louwogoluk di a’ge yu a’ge degelogo pul o. An en e, ebela pam naduk laik o,” oluk mo’gulesi.
13Asogo mo’gulesimu, at Yakub en e,
“Nue o. An nogola eberiselat e, malik wei a’ge yu re, yogodak enanni modok erlak epegi o. Ye, mesik e, kambing domba emin, enemalik agamu no’gwi a’ge enemin, is enebaget nogola eberise legi o. Agauwa mesik pam nak e, perleneat sil hul holuk e, enebe ’berlek warema o. 14Nue, hat e, nadugat lu o. An e, kambing domba emin, malik wei a’ge emin, ebela pam elit lo op ’gela’ge ago holuk e, he’berlik orogat weik o. Wagalat e, hat he’bek o ebale onuk Edom weik o, nue,” oluk mo’gulesi.
15Asogo mo’gulesimu, at Esau en e, disogo mo’gulesi,
“Not o. Asogo e’gen holuk e, obat o. A’ge re, an nosi pema hat hemin onoboluk laik o,” oluk mo’gulesi.
Asogo mo’gulesimu, at Yakub en e, disogo egei,
“Erlak o, nue. Asogo tu puk o. An nagai e, hat hede op welemagoluk ai nak nagai o,” oluk mo’gulesi.
16Asogo mo’gulesimu, at Esau ano agauwa ai pam owi Edom togolik laigoluk tegei. 17At asogo laga a’geat de, at Yakub ano o Sukot eba lagarik, o u’gwarek owi weriselat, uam owi weriselat, tegei. Ai paget en, ebale ano onuk tualiselat e, onuk Sukot oluk tualegei.
18Yakub en ebela pam Mesopotamia en togolik owi pam wagalat e, o kota Sikhem Kanaan eba re, op nak waga. Wagarik e, ebayat o leimu o leget o’borl akhit mo egeitik sum owi werise laga. 19#Yos. 24:32; Yoh. 4:5O lei ’gwiang ai at en ap Hemor at Sikhem aik dogo’gwe a’ge ebam o’go uang perak a’ge 100 pam o’go ’balegei. 20O’go ’balegeirik, helep Allah paget di a’ge yu a’ge narlisolom a’ge weregeitik e,
“Helep hele’gik a’ge yu onuk e, Allah Israel a’ge enaik o,” oluk onuk tualegei.
Zvasarudzwa nguva ino
Kejadian 33: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda