Kejadian 32
32
Yakub en Esau emin mesikmu la’boluogoluk degelegei wene
1At Yakub ebela ’bekhit weigoluk wagoma, malaikat enebe logon e’bek legesa. 2Legesema, at il yerentesirik e, disogo egei,
“Yu esan logolak Allah a’ge o sum a’ge werik poluk welagaimu hegi,” oluk egeitik, o eba onuk Mahanaim tualegei.
3Asogo arat tualegeirik, osi Esau e’bek o Edom eba louwagoluk naduk peragenebesi. 4Asogo peragenebasulat, disogo mo’gulentesi,
“An nue Esau ano Yakub en e, disogo egei oluk mo’gulomup o. An hot Laban nemin welegerik o. 5Welegerik e, an yogodak an en a’ge wam sapi emin, keledai emin, domba emin, kambing emin, ye, neragam a’ge emin, oruak o. Nue hede op erinogoluk wene nak naduk perakpou wegi ai o, oluk egei, oluk mo’gulomup o,” oluk mo’gulentesi.
6Is ap yo’go peragenebesi a’ge ebano legesarik wegesarik e, Yakub disogo mo’guligisa,
“Nis hat hue Esau e’bek arat legema, at nonue hat he’bek weigoluk osi enebe 400 a’ge enemin wagokhwe wege o,” oluk mo’guligisa.
7Asogo mo’gulegisema Yakub esa’go hwelegeirik ogorlok a’bik agarik, alik a’bik weregei. Alik weregeitik, aphwami emin wegesa a’ge ’gerelak ’biren logologo enebesirik, uam domba emin, kambing emin, sapi emin, unta emin, ’gerelak ’biren logologo enebesiat. 8Asogo enebesi ai, ede disogo epesirik,
“At Esau wagalat, ’gerelak mesik warenebiso holuk e, ’gerelak mesik enelaluk elit lebema epegi,” oluk epesirik asogo tegei.
9Asogo tegeirik, se’ban disogo egei,
“Allah ne’ba Abraham en emin, naik Ishak en emin, erlikhobogwi a’ge, naik. Niak hesa’go hwelip o. Hat en an nowi pam narilak nuelak ene’bek togolik louwagoluk mo’gulnigen ai re, hat enat an di ’gela’ge yu ’gela’ge op a’ge taknebaigoluk wene werak nebegen ai o, naik. 10Hat en an disogo taknobo modok mia a’ge, nebe hede en disogo taknebasu modok welegen ai o, naik. An ik Yordan etle akhit en di a’ge yu a’ge wo erlakma en, we ’bouwa’gun nak woluk wegi a’geat de, yogodak togolik laigoluk, ’gerelak ’biren pulogo wogonoboluk lasu legi yu i o, naik. 11An nue Esau wagalat, nis ap ’berlegat watnenebiselat, hwami malik neneminat watnonobu ai en, an nogorlok a’bik ago ai en, hat en delnenebinogoluk niak nerlagaiksogo ’gonu mo’gulhegis o, naik. 12#Kej. 22:17Hat en e,
An en di ’gela’ge yu ’gela’ge obap hebiselat, hat en dogo’gwe a’ge re, enebe modok a’bik, aphwami ene’gik wenaru modok mia a’ge, ik al laut ye’gelak esa’goma welago ai ’gela’ge wokheik, oluk wene werak nebegen ano hede eberin o, naik,” oluk se’ban egei.
13-15Asogo egeitik arat nogoluk e, Yakub uam Esau wogoum a’ge pulogo pesi. Asogo wogoum a’ge pulogo pesi ai ebe re: kambing holou a’ge re, 200 pam, ye, ierak a’ge re, 20 pam, ye, domba holou a’ge re, 200 pam, ye, ierak a’ge re, 20 pam, ye, unta emalik agamu nasumu 30 emalik eminat, ye, sapi holou a’ge re, 40 pam, ye, ierak a’ge re, 10 pam, ye, keledai holou a’ge re, 20 pam, ierak a’ge re, 10 pam pulogo pesi. 16Asogo pesirik, ’gek-’gek hundomok pil-pil lagarik, eragam a’ge enebe lo’bok enil pam woluk wemagoluk disogo mo’gulentesi,
“His naduk woluk lagalat, wam degelhe’gik pege a’ge ai enemin la’buk osoma no oluk e, hwerlisogo ’gek-’gek woluk lu o,” oluk mo’gulentesi.
17Asogo mo’gulentesirik, eragam a’ge naduk lo a’ge disogo mo’gulesi,
“Lasumu, an nue Esau hemin sarlok toguptik, at en e,
Hat hue sa. Hebe ’geba laigoluk. Wam yema sa en a’ge woluk waga legen, oluk mo’gulhoso holuk hat en e, 18Yema hot Yakub en a’ge ue hat wokheigoluk perakpou wagarik, at ebe pobuk nene’berlik wago yo, oluk mo’gulomup o,” oluk mo’gulesi.
19-20Asogo mo’gulesi ai, Yakub ede en e,
“Wam Esau wogeik a’ge yu naduk perakpoma re, at ede op ema. Ede op emarik, an pobuk lasumu, wene nebam pesi a’ge ano erlagapsogo ukpouwa,” oluk ede epesi ai en e, eragam a’ge mesik naduk louwa a’ge ano emin, at mesik at e’berlik louwa a’ge emin, pobuk at mesik at e’berlik louwa a’ge emin, is logon wam orogole ’bal-’bal woluk louwagoluk yo’go enebesi a’ge ’berlegat emin en e,
“Nonue nene’berlik wago yo,” oluk, wene mesigat a’ge ai nak mo’gulontuagoluk mo’gulentesi. 21Asogo mo’gulentesirik, wam Esau wogoum a’ge ebano naduk woluk wemagoluk perakpou wagarik, at Yakub ebe o sum owi wusogo nogogei.
Yakub Allah emin ebagase ’belak yeik pegesa wene
22O hup ai erligeat, at Yakub elaluk agarik e, ugwami enebe ’biren eriano emin, is eneragam a’ge hwami enebe ’biren eriano emin, eiyagai enebe 11 ebano emin, wogonoboluk ik Yabok ’balogo etle akhit o’gwe liplau wegesa. 23Liplau wegesarik, at Yakub togolik ik ’balogo libagarik e, a’ge di a’ge yu a’ge ’berlek ebano wokho lebikpou waga. 24#Hos. 12:3,4Asogo lebikpou wagarik, at emategat eba mo egeitik oruakma, ap a’ge mesik wagarik, e’birek enebagase ’belak yeik ’buk ogumu en ogumu en ’bekhit o hup eigoluk tegei. 25Asogo tegeimu, ap ano ogola en e,
“An nanni erlak ema hegi,” oluk epesirik, Yakub ’go’bu awe ologun ’goboksogo weregei. 26Asogo weregeitik disogo mo’gulesi,
“O arat dakha emma re, he’gik uknebemin o,” oluk mo’gulesimu, at Yakub en e,
“Nue, aphwami en mu’gat wusogo enebam pogwi ’gela’ge, hat en obapnebagun holuk nak e, ukhebaik o,” oluk mo’gulesi. 27Asogo mo’gulesimu, at ap ano en e,
“Hat honuk sa,” oluk hin wesimu, at Yakub en e,
“An nonuk Yakub o,” oluk mo’gulesi. 28#Kej. 35:10Asogo mo’gulesimu, at ap ano en e,
“Hat en an Allah emin nenebagase ’belak yeik ’buk ogulat, aphwami a’ge henemin henebagase ’belak yeik ’buk ogulat, tigen a’ge re, hat hanni e’gen ai en, honuk e, Yakub ogu lema puk. Israel ogu lema o,” oluk onuk tuelak pesi.
29 #
Hak. 13:17,18 Asogo onuk tuelak pesimu, at Yakub en e,
“Hat honuk sa. Mo’gulnemin o,” oluk hin wesi a’ge re, ap ano en e,
“Hat en,
Hat honuk sa, oluk mo’gulnum mia o,” oluk mo’gulesirik, aphwami en mu’gat wusogo enebam pogwi ’gela’ge, Yakub obap pesi.
30Asogo tigisarik, at Yakub en e, disogo egei,
“An Allah emin sarlok tigerik orogole nil hegi a’geat de, nebe warom erlakma en nelaluk welegi o,” oluk egei ai en, o eba onuk Pniel tualegei.
31Tuelak poluk, o dakha egeimu at Yakub wagoma ’go’bu awe ologun ’goboksogo weregeimu no oluk e, da hek ya hek waga. 32Ap ai en Yakub ’go’bu awe ologun ’goboksogo weregei ai en, aphwami Israel en dogo’gwe a’ge holuk, wam di a’ge yu a’ge awe ile’gerlim eme’gen en sebelak a’ge hwerli yogodak en modok no’gwi erlak.
Zvasarudzwa nguva ino
Kejadian 32: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda