Kejadian 30
30
1Asogo a’geat de, hwe Rahel emalik dakhorlo erlakma enat abeli welaga. Asogo welaga ai en, ue emin modok hektak ’gela’ge il ’belak welegesa. Asogo welat Yakub disogo mo’gulesi,
“An nemalik mesik woknemin o. Woknorogun erlak holuk an nebe wareik o,” oluk mo’gulesi. 2Asogo mo’gulesimu, at Yakub en e, hwe Rahel wene yageselat disogo mo’gulesi,
“An yu nebe Allah puk o. At enat hat hemalik derisoma no oluk tiso yo,” oluk mo’gulesi. 3Asogo mo’gulesimu, at hwe Rahel en e,
“An neragam a’ge Bilha yu oruak o. At emalik mesik doruagoluk hemin nogwip o. Asogo dorogunmu re, malik ai, ia re, anat eik o,” oluk mo’gulesi. 4Asogo mo’gulesirik en, hwele Bilha ano Yakub wogesimu emin nogogisa. 5Asogo emin nogogisema, at Bilha emalik ogola agarik e, emalik ap deregei. 6Asogo deregeimu at hwe Rahel en e, disogo egei,
“Allah en wene an nebaget hwalogo pesirik, nemalik ap woknesi o,” oluk egeitik onuk Dan tualegei. 7Asogo tualegeimu, pobuk at Bilha emalik ogola agarik emalik ap mesik deregeiyat. 8Asogo deregeimu, at hwe Rahel en disogo egei,
“An nue Lea emin il ’belak welat, nanni wiak wene ’balogu lege ano an aiyat nanni egi o,” oluk egeitik emalik ano onuk Naftali tualegei. 9Asogo tegeimu, at hwe Lea ogo re, emalik pobuk doru mia aga oluk u’gwarek enaluk agarik, eragam a’ge hwele Zilpa at Yakub ugwe emagoluk wogesi. 10Asogo wogesimu, at Zilpa emalik ogola agarik emalik ap deregei. 11Asogo deregeimu, at Lea en e,
“An arat saburegis o,” oluk egeitik, emalik ano onuk Gad tualegei. 12Asogo tualegeimu re, pobuk at hwe Zilpa emalik ogola agarik, emalik abat deregei. 13Asogo deregeimu, at hwe Lea en e, disogo egei,
“Hwami ’berlek en e,
Hwe Lea ogola agai houwak o, oluk mo’gulnema ai en e, an nogola nagai hegi o,” oluk egeitik, emalik ai onuk Asyer tualegei.
14Asogo tuelak poluk, gandum e’gen egesu erligeat e’gen ’balogumu at Ruben o leimu aphwami erlakma lagarik, owi hwami enemalik doruagoluk wogwi a’ge yogo oruakma hesirik ia Lea wogosu aga. Asogo wogosu agama, at hwe Rahel en Lea disogo mo’gulesi,
“Hat hemalik en owi yogo a’ge ano hwiaregeitik wokhosu aga a’ge ai wei nak logon an woknemin o,” oluk mo’gulesi. 15Asogo mo’gulesimu, at Lea en disogo mo’gulesi,
“Hat an nogun ebe wegen ai mia epegen a? Pobuk owi enemalik doruagoluk wogwi a’ge mesik wokhemagoluk e’gen yema re!” oluk mo’gulesi.
Asogo mo’gulesimu, at Rahel en e,
“Owi ano hat homlogo en woluk waga ai woknigen holuk, yogodak hat Yakub hemin nogo u o,” oluk mo’gulesi. 16Asogo mo’gulesimu, oruakma, hopmu’gwe at Yakub o leimu aphwami erlakma en wagoma, hwe Lea en at Yakub ebe hau wusogo wesirik e, disogo mo’gulesi,
“O yogo hup hat an nemin nogo uogoluk owi an nemalik en woluk waga a’ge o’go ’balegistikmu re, nemin nogo uok o,” oluk mo’gulesimu, Yakub at emin nogogisa.
17Asogo nogogumu, at Lea se’ban egei a’ge Allah esa’go hwelegeimu re, hwe Lea emalik ogola agarik emalik naduk a’ge enebe ugan dagenebegeitik en pobuk mesik dakhwerlesiat. 18Asogo deregeitik, at hwe Lea en e, disogo egei,
“An en Zilpa nogun wogegis ai en, Allah en o’go woknesi o,” oluk egeitik, emalik ai onuk Isakhar tualegei. 19Pobuk Lea emalik ogola agarik, emalik huaben naduk dagenebegeitik en pobuk mesik deregeiyat. 20Asogo dakhwerlesirik disogo egei,
“Allah en nemalik op a’ge woknesimu, nemalik ap enebe hebarlik pam dakhwerlegi ai en nogun en iak sakhosogo mo’gulnema o,” oluk egei. Asogo egei ai en emalik ai onuk Zebulon tualegei. 21Asogo arat dagenebegeitik, pobuk emalik hwele mesik deregeitik onuk Dina tualegei.
22Pobuk at Allah en, hwe Rahel ebam eberegeitik, se’ban egei a’ge iak esa’go hwelegeirik e,
“At emalik elit dakhorlouwak,” oluk epesi. 23Asogo epesimu, at hwe Rahel ano emalik ogola agarik emalik ap deregei. Asogo dakhwerlesirik disogo egei,
“Aphwami en an onogola en asogo mi-miarak nobogwi a’ge Allah en erlagap pesi o. 24Asogo erlagap pesirik, naik ’gain Onuk Logo a’ge en nemalik ap akhen woknemagat o,” oluk egei ai en emalik ai onuk Yusuf tualegei.
25At hwe Rahel ano en Yusuf at deregeimu, at Yakub en ami Laban ano mo’guleselat e,
“An nowi edip dagegimu ebano laigoluk, mo’gulnemin o. 26Is an nugwami wogenebik oluk, hat hiabuk nannisogo takhebasu legi ano, hat halugatma re! Yogodak an nugwami emin, neiyagai dogo emin, enebe ’berlegat wogonoboluk laik en e, Lak o, oluk mo’gulnemin o, nami,” oluk mo’gulesi. 27Asogo mo’gulesimu at Laban en,
“Hat yema nemin welege eriano pam, at Allah ede aganhan nebam pasulat, selakmayat hwalogo woknese laga a’ge nalugatma re, hat en hedeap noboluk nemin ya wolomok o, nomlogo. 28Ye, yabuk taga legen a’ge o’go nak wokheik en, mo’gulnemin o,” oluk mo’gulesi. 29Asogo mo’gulesimu, at Yakub en,
“Nami o. Hiabuk nanni modok muat ’gela’ge til lasulat, huam degelise legi ano pam, no’gosogo takpasukhwe hasu legen no. Halugat ani o. 30An hat he’bek wom erlakhwe huam ai we, wei nagat welaga a’geat de, yogodak modok a’bik lok aga ai, an yema oruakhwe at Allah enat ede aganhan hebam pasulat tegei a’ge ai obat a’ge re, an nugwami neiyagai enemin nak e, leronto puk aga o,” oluk mo’gulesimu, 31at Laban e,
“Asogo e’gen holuk e, an no’gwe a’ge wokheik o,” oluk mo’gulesimu, at Yakub en e,
“Nami o. Hat en o’go woknemagoluk mo’gulheselegi erlak o. At e, an wene mesik mo’gulheselegi yu nak e, op o, mo’gulnosoam e, huam ’gwelabogo welat, degelise leigat o. 32Hat huam a’bik oruakma re, an laiktik, domba emalik enasu sing holuk, kambing domba enasu sing dape’gektak a’ge nak e, an hwerlaik o. An yabuk taga legi o’go aiyat horloma re, pulogo pei laik o. 33Pobuk hat laguntik, o’go woknigen ano ’gwelakhasulat kambing domba enasu ’gut a’ge oruak holuk, hat en e,
An en a’ge at yogorlia wesi, epagun ani o,” oluk mo’gulesi. 34Asogo mo’gulesimu, at Laban en e,
“Obat o. E’gen a’ge hegitsogo togu lomok o,” oluk wene werak pesi. 35Asogo wene werak pesi a’ge re, agauwa ai pamat, at Laban en, kambing ierak asu dape’gek ’belak holuk emin, kambing holou a’ge asu dape’gek ’belak a’ge emin, domba asu sing a’ge emin, ’berlek woluk lasulat, ’gut a’ge holuk ukpoluk laga. Asogo tegeimu, at eiyagai ebano en degelogo woluk louwagoluk mo’gulentesi. 36Asogo mo’gulentesimu at eiyagai ebano en Yakub ebe ukpoluk domba kambing woluk hup henagan nogwil waleksogo eba pei legesa. Is ebano pei legesarik oruakhwe, Laban uam ado pema ukpoluk legesa a’ge ebano, Yakub en ’gwelakharok welaga.
37At Yakub ano emategat uam ebano oluk esan ’gwelakharok welat, e e’gik ’get a’ge ’gela’ge onuk ’ba’gwe emin, we’gi emin, ’babi emin, e eriano ebagase agap no’gorlak poluk pesimu, ’gut hebarligen agalat, sing hebarligen agalat, tegei. 38Tegeimu, is kambing domba ik nau wagalat, e agap no’gorlak a’ge ano kambing domba ik no’gwi a’ge ebale hele’gik a’ge ano hegitsogo ena’gul pe’bilo hegit eriano pesi. 39E ano pil lagama, kambing domba ebano wegesarik ik ne’gesa eriano pam en wam ebano ie nasuam emalik til lagarik asu sing ’gut dape’gek legenak a’ge detil laga.
40Asogo toluk at Yakub en domba kambing ebano degelogo pesirik enasu sing a’ge emin, dape’gek legenak a’ge emin, wokho Laban uam oruakma ebano ena’gul hwalogo pei lasu laga. Asogo tegei pam Laban uam oluk esan at Yakub en hwerlaik epesi a’ge nak a’bigat lok agama Laban uam emin la’bulogo po erlak. At uam holuk emategat tenakho welaga.
41Ye, at Yakub en, at uam kambing domba ie no a’ge we’gerlagalat, wam ebam op a’ge anni holuk ie no a’ge hegit ago holuk, e agap no’gorlak a’ge ano wam ik no’gumu loruk hupmu pei lasu laga. 42Ye, kambing domba we onuak ha’buktak erlak welat, enanni erlak holuk e, e agap no’gorlak a’ge ano pasu laga erlak. Ukpasu lagama, wam enanni erlak a’ge dogo ebano re, Laban eiye aga. Ye, wam ebe op a’ge anni a’ge holuk e, at Yakub eiye agalat tegei. 43Asogo tegei ai pam at Yakub ano ap ’gain a’ge ’gela’ge e’gik oruak agarik wam kambing domba emin, keledai unta emin, a’bigat eiye otluk, eragam a’ge hwami ap a’bigat sennentarok welaga.
Zvasarudzwa nguva ino
Kejadian 30: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda