Kejadian 24
24
Ishak ugwe wogigisa wene
1Abraham ebe arat sebal modok aga. Ye, Allah en Abraham di a’ge yu a’ge tisokhwe obap taga laga. 2Asogo Obaptiso oruakma agauwa mesik erlige at Abraham en e, eragam a’ge ’berlegat onue mesik en a’ge Abraham en a’ge di a’ge yu a’ge e’gik pam welat taga laga a’ge ai disogo mo’gulesi,
“Ho’buk ’balogo he’gik naga’gu pam pemen o. 3He’gik paguntik e, Nenaik ’gain Onuk Logo a’ge Allah ’bogorl ’gwiang e’gik pam welago a’ge ano onuk pam ho’buk disogo oluk ’balin o,
An en Abraham omlogo Ishak ugwe aphwami o Kanaan yema a’ge heratik erlak o. 4We, togolik hat hebe dagegenma hwe hue hari a’ge holuk hera esi laik o, oluk ho’buk ’balin o,” oluk mo’gulesi.
5Asogo mo’gulesimu, eragam a’ge ano en e,
“Hwele ai en,
An nowi pam ukpoluk hat he’berlik o eba lo re, nebit o, oluk oso holuk no’gosogo tu. Hat homlogo ebe woluk hat howi pam hebe dagegenma eba lo elit a? Mia ya,” oluk hin wokhesi.
6Asogo hin wokhesimu, at Abraham en e,
“An nomlogo ebe woluk eba lagun modok erlak o. Nebit o. 7Naik ’gain Onuk Logo a’ge Allah ’bogorl e’gik pam welago a’ge ano en e, nue nari oruakma naik owi pam eba en woknoboluk liplau wagalat, o welegema yema paget ho’buk disogo ’balogo mo’gulnesi,
O eba hat en dogo’gwe a’ge wogentaik, oluk mo’gulnesi a’ge ano enat, hat en hwe an nomlogo ugwe o naik owi pam eba a’ge woluk werinogoluk, malaikat mesik he’bek perakpou wagoam lethiouwayat o. 8Hwe ai he’berlik wom ebit holuk, ho’buk ’balogun a’ge ai ogo hebam selagat o. Holuk e, an nomlogo modok woluk lagun erlak o,” oluk mo’gulesi. 9Asogo mo’gulesimu, Abraham eragam a’ge ano e’gik Abraham aga’gu pam pesirik e, Abraham en mo’gulesi a’ge hegitsogoat tigoluk ho’buk ’balegei.
10Ho’buk asogo ’balegeirik e, eragam a’ge ano en wam unta Abraham en a’ge 10, ye, a’ge di a’ge yu a’ge o’go a’bik a’ge emin, ebano wesirik e, ap Nahor ebe elaluk welat welagama o Mesopotamia en abel o’borl akhit eba laga. 11Arat lagarik, o kota esa’goma ebe ik omugwe pelakma eba lagarik, set hwaligoluk wam unta ebano ebayat mo uagoluk mo’gulesirik welaga. Oruakma o arat hopmu agama hwami ik ai na’gu aga legesa hegirat aga. 12Hegirat agama, Abraham eragam a’ge ano se’ban disogo egei,
“An nue Abraham aik Allah ’gain Honuk Logo a’ge, naik. Hat at ebe hedesogo welegen ano en, pobuk hedeap paguntik, an heratil wegi ano, demat emagoluk ’gonu mo’gulhegis o. 13Hwelani o kota en ik omugwe pelakma na’guogoluk wom hegitsogo oruakhwe, an ik omugwe pelakma yu edik welegi yu hil yetniemin o, naik. 14Is hwelani ai wagaiam e, an en hwele is a’ge mesik disogo mo’guleik,
Hwele yu, nagalogo yo. Hat ige’be pam ik logon nangnemin o, oluk mo’gulosoam, at en e,
Hat hebe nangheikmu nasuam e, huam unta eba mesik nouwagoluk e, nangentaigat o, oluk osoam, naik ’gain Honuk Logo a’ge en heragam a’ge Ishak paget, hwe ai pulogo woknigen hegi, oluk epaik o. Ai demat ago holuk naik ’gain Honuk Logo a’ge en nue Abraham hedesogo welegen ano hedeap tigen, oluk epaik o,” oluk mo’gulesi. 15-16At se’ban asogo osoam hwele Ribka ebe op a’ge ap wogo erlak a’ge salesik owan oruakma, ige’be emarlo pamsogo woluk ik omugwe pelakma ano waga. At Ribka aik e, onuk Betuel. Ye, Betuel aik e, Nahor, ye, ia re, Milka. Ye, at Abraham ue Nahor ai o. A’ge re, hwele ano ik omugwe pelakma ning-nang togolik laigoluk tegei. 17Asogo tagoam e, at Abraham eragam a’ge ano e’bek pungtak wagarik e, disogo mo’gulesi,
“Hwele yu, nagalogo yo. Ik hegeik ebe pam ne’gak a’ge mesik woknemin o,” oluk mo’gulesi.
18Asogo mo’gulesimu, at hwele ano en e,
“Naik, logon men o,” oluk mo’gulesirik, ik ne’gak a’ge ano emarlo pam en perleneat ’belabu agarik, ige’be e’gik tenak welat Abraham eragam a’ge ano nouwagoluk wogesi. 19Wogosoam, arat ne’geimu re, at hwele Ribka en e,
“Hat huam unta eba ’berlegat ik onogum ningsogo nouwagoluk, logon nangentaigat o,” oluk mo’gulesi. 20Asogo mo’gulesirik, ik ogorlukmu a’ge wam unta ebano ik noma herlilogo hwikholuk e, togolik ik omugwe pelakma ano pungtak lagarik e, wam unta ebano ’berlegat ik onogum ningsogo nouwagoluk ik loksogoat na’gwegei. 21At asogo tisokhwe, Abraham eragam a’ge ano iak pam u erlakma en e, ogola en nak pobi taga laga. Pobi tagalat,
“Naik ’gain Onuk Logo a’ge en letnioma an heratil wegi ano demat ema ya? Sogwi ema ya,” oluk aluk emagoluk il pasu laga.
22At hwele ano en wam unta ebano ’berlegat ik wogentesimu onogum ningsogo ne’gesema re, at Abraham eragam a’ge ano en enalli a’ge emas o’go a’bik a’ge logon wesirik e, hwele ano e’biang pam erlelik pasulat, tigene emas a’ge logon e’gik pam egeik pasulat, tegei.
23Asogo egeik pesirik e, hwele ano disogo mo’gulesi,
“Hwele yu nagalogo yo. Hat haik sa. Mo’gulnemin. Ye, haik owi pam eba an emin, an nosi emin, nenemin nogoumu oruak a? Erlak a,” oluk mo’gulesi.
24Asogo mo’gulesimu, at en e,
“An naik onuk e, Betuel, Nahor omlogo. Ye, at ia onuk e, Milka. 25Ye, nonowi pam e, henebe nogoumu emin, wam sabul e’ga emin, onso’boru emin, elit oruagat o,” oluk mo’gulesi. 26Asogo mo’gulesimu, at Abraham eragam a’ge ano odogorlu pam hweriogo welat Nenaik ’gain Onuk Logo a’ge erliktagalat disogo egei,
27“Nue Abraham aik Allah Honuk Logo a’ge erlikhebise legi o, naik. Hat en woknoboluk nue Abraham ue ari onowi pam yema wegentik, an nue Abraham iak hologo hedesogo welegen ano hedeap pegenma hiegi o,” oluk mo’gulesi.
28Pobuk at hwele ano pungtak toluk ia owi pam lagarik wene aga a’ge ano ’berlegat mo’gulentai laga. 29-30Hwele Ribka ue re, onuk Laban. At Laban en e, wene at Abraham eragam a’ge en egei a’ge ot en mo’gulosoma esa’go hwelegeirik, at alli a’ge e’biang pam emin, e’gik pam emin, wantak oruakma il hesi. Asogo hesirik, o pam en pungtak liplau wagarik, Abraham eragam a’ge ano emin sarlok tul oluk waga ’gal e, Abraham eragam a’ge ano wam unta ebano ’gwelakharok ik omugwe pelakma ano eragamat oruakma waga.
31Wagarik e, disogo mo’gulesi,
“Naik, hat e, Allah en obap hebasu a’ge hiegi o. Holuk hat o o’borlma yema wolorogun erlak o. An nowi pam louwok o. An nowi pam, hat hebe paget emin, huam unta paget emin, o arat degelogo pegema oruak o,” oluk mo’gulesi.
32Asogo mo’gulesirik, at Laban emin owi pam legesa. Legesarik e, at Laban en di a’ge yu a’ge wam unta ebano o’borl pam herle ’betesogo poluk woluk laga a’ge hebilogo pesirik e, sabul e’ga dalhegeik, so’boru wogeselat, tegei. Asogo tegeirik, Abraham eragam a’ge ano emin, aphwami emin legesa a’ge emin, onoyuk petne emeronobuogoluk ik woluk wegesa. 33Woluk wegesarik, enebaget so’boru seni sagentigisema re, at Abraham eragam a’ge ano en e,
“An wene wusogo peraknobou egesa a’ge wene mo’gulhonto erlakma en so’boru naduk naik erlak o,” oluk mo’gulentesimu, at Laban en e,
“Wene ai mo’gulnentemin o,” oluk mo’gulesimu, 34at Abraham eragam a’ge ano en wene edipmu en mo’gulentil wagalat e,
“An e, Abraham eragam a’ge wegi o. 35Nenaik ’gain Onuk Logo a’ge en e, an nue ai modok obap pasulat, ebe modok ’gain a’ge di a’ge yu a’ge modok a’bik takpasulat, tegei o. Nenaik ’gain Onuk Logo a’ge en, wam domba emin, kambing emin, sapi emin, unta emin, keledai emin, uang perak emin, emas emin, aphwami at eragam a’ge welemagoluk ap emin, hwami emin, wogesimu oruak o. 36Ye, an nue ugwe Sara ai ebe modok sebal pam emalik ap deregeimu re, an nue en a’ge di a’ge yu a’ge ebano ’berlegat omlogo wogesi. 37-38Asogo wogesimu, an nue ai en e,
An en mo’gulheik a’ge niak hologo togun en e, ho’buk disogo ’balip o, egei.
Hat homlogo ugwe hwelani o Kanaan a’ge yema mesik heratik erlak o. We, haik ue ari etleba a’ge herati laik en e, perleneat laik o, oluk ho’buk ’balin o, oluk mo’gulnesi.
39Asogo mo’gulnesimu, an en e,
Hwele ai an ne’berlik wom erlakma en mo oso holuk e, no’gosogo tik, oluk hin wokhegimu, 40at en e,
Hat en hwe ai elit woluk werinogoluk e, an naik ’gain Onuk Logo a’ge iak hwelak poluk nak taga legi a’ge ano en at malaikat mesik he’bek perakpouma o. Perakpouma, at en lethiau wemma re, demat ema. An nomlogo ugwe naik ue ot eba a’ge mesik hemin sarlok togubat o. 41A’ge re, hat en mo’gulentagun a’ge is en wokhogwi erlak holuk, hat en ho’buk ’balogun a’ge ai hebam selak o, oluk mo’gulnesi.
42Asogo mo’gulnesimu, ho’buk asogoat ’balegis. ’Belak poluk waga legirik, ik omugwe pelakma wegirik, se’ban nogola en disogo eselat welegi o,
Nue Abraham aik Honuk Logo a’ge Allah naik o. Hat en e, an hwe heratil wegi a’ge ano woknomup o. 43An e, nebe ik omugwe pelak a’ge esa’gomayat edik oruakma, hwele mesik ik na’gwigoluk womma, ik logon woknemagoluk ’gonu mo’guleik o. 44An en ’gonu mo’gulosoam, at en,
I o, oluk eselat, an en a’ge wam unta eminat ik wogoso holuk e, naik ’gain Honuk Logo a’ge en an nue omlogo ugwe pulogo wogigen a’ge ebe yuat hegi, oluk epaik o, oluk mo’gulegis. 45Se’ban nogola en asogo eselegirik owan ologun ’balogo u erlakma, at hwele Ribka en ige’be emarlo pam woluk lagarik e, ik omugwe pelakma ano na’gwil ’gwegei. Asogo na’gwil ’gwegeimu an en e,
Hwele yu, nagalogo. Ik logon naik en nangnemin o, oluk mo’gulegis. 46Asogo mo’gulegismu, at en perleneat ige’be emarlo pam en po ’bu agarik e, disogo mo’gulnesi,
Logon men o. Hat hebe nasuam e, huam unta yema logon wogentaigat o, oluk egeitik an nebe woknesimu arat ne’gimu re, nuam unta wogentesimu arat ne’gesayat o. 47Arat asogo tegeimu, an en e,
Hat haik sa, oluk hin wokhegimu, at en e,
An naik e, Betuel, Nahor omlogo yo. Ye, at ia re, Milka, oluk mo’gulnesimu, an en e, alli a’ge emas a’ge e’biang pam erlelik pasulat, sigene e’gik pam egeik pasulat, tegis o. 48Asogo egeik pegirik, nodogorlu pam hweriogo welat nue Abraham aik ’gain Onuk Logo a’ge Allah hau weriselat, erliktagalat, tegis. At Allah en an nue ue ot hene’bek yema woknoboluk wagama re, hwele yu an nue omlogo ugwe arat nemin sarlok tige o. 49His en e,
At ue ai, ebe nis a’ge, oluk at ebaget wene opsogo ogulat, obap pogulat, tu epegep holuk e, mo’gulnomup o. Asogo mo’gulnum mia holuk e, an no’gosogo tik, oluk nede se’gek uagoluk mo’gulnumat o,” oluk mo’gulentesi.
50Asogo mo’gulentesimu, is Laban Betuel e’birek en e, disogo mo’guligisa,
“Wene aga a’ge e’gen eba re, at Nenaik ’gain Onuk Logo a’ge en tegeimu re, nis en disogo yusogo mesik u mia o. 51At hwele Ribka ebe yu oruak yu re, at Nenaik ’gain Onuk Logo a’ge u’gwarek en egei hegitsogoat hue omlogo ugwe emagoluk e, hemin lagup o,” oluk mo’guligisa. 52At Abraham eragam a’ge ano wene asogo mo’gulegisema esa’go hwelegeirik e, odogorlu pam huragarik Allah erliktegei. 53Erliktegeirik sum emin, enalli a’ge perak a’ge emin, emas a’ge emin, ’berlegat ebano hwele Ribka wogesi. Asogo wogesirik, di a’ge yu a’ge o’go a’bik ’balogwi a’ge logon Ribka ue emin, ia emin, wogentesiat. 54Asogo arat wogentesirik e, Abraham eragam a’ge ano emin, aphwami at emin legesa a’ge emin so’boru emin, ik emin ne’gesarik nogogisa. Nogogisarik, hubet o’gwe o dakha egeimu enelaluk egesarik e, at Abraham eragam a’ge ano en e, disogo egei,
“Hat hue e’bek lit o. Op o, oluk mo’gulnentemit o,” oluk mo’gulentesi. 55Asogo mo’gulentesimu re, is Ribka ue emin, ia emin en e,
“At Ribka re, se’ban mesigat de a, agauwa 10 de a, nis nenemin yema welemarik en louwak o,” oluk mo’guligisa.
56Asogo mo’guligisa a’geat de, at Abraham eragam a’ge ano en e,
“An tenak nebagup erlak o. An heratil wegi a’ge ai Allah en arat woknesimu re, nue e’bek togolik louwagoluk peraknebemit o,” oluk mo’gulentesi. 57Asogo mo’gulentesimu re, is en e,
“Ribka ede epesi a’ge mo’gulnontuagoluk e, emdema wokhuogoluk worlhouwok o,” oluk mo’guligisa. 58Asogo mo’guligisarik, Ribka worlhogwiam wagama re, hin disogo wokhegesa,
“Hat ap yu hemin lagup a? Hebit a,” oluk mo’gulegisema, at en e,
“Nemin lo nagai o,” oluk mo’gulentesi. 59-60Asogo mo’gulentesimu re, is en Ribka ebe perakpogulat, eragam a’ge ebe lethogulom a’ge mesik emin louwagoluk Abraham eragam a’ge emin, aphwami enemin legesa a’ge emin, enemin perakpou wegesa. Asogo perakpou wagalat, Ribka Allah en obap pasu lemagoluk disogo mo’guligisa,
“Ribka nagalogo. Allah en obap hebisokhwe aphwami modok a’bik enia ’gela’ge omup o. Ye, hat en dogo’gwe a’ge en eneselei a’ge onowi kota sebelil laga lemak o,” oluk mo’guligisa. 61Asogo mo’gulegisema, at Ribka en e, hwami at eragam wolom a’ge wogenebegeitik e, enemin wam unta ebano o’borl pam ligegesarik, Abraham eragam a’ge ano emin wegesa.
62Is owan wagaihwe, at Ishak o leimu en lagarik, ik omugwe pelak a’ge onuk,
“At en letniesi,” oluk ogumu eba lagarik, ebe o Kanaan ik o’but hegit waga. 63Wagarik welat, agauwa mesik erlige o hopmu akhit ’gela’ge o sum owi werikmu en so’boru owi yogo’gwe nese leigoluk libagarik, wam unta wagoma il yethesi. 64Yethasuam, at Ribka en Ishak il yethesi ’gal e, wam unta o’borl pam en ’golokho ’bu aga. 65’Bu agarik, at Abraham eragam a’ge ano disogo hin wokhesi,
“Ap a’ge yabukmu en nene’bek wago ai sa,” oluk hin wokhesi. Hin wokhesimu at en e,
“An nue egi ano re, ebe ai o,” oluk mo’gulesimu, at Ribka ano sum kain a’ge wesirik e, orogole hethesi.
66Asogo orogole hethesimu, at Abraham eragam a’ge ano en e, wene aga a’ge ebano Ishak ’beli’gogo mo’gulesi. 67Asogo arat mo’gulesimu, at Ishak en Ribka woluk e, ia Sara sum owi a’ge pam welagama ebano Ishak ’gwegeitik e, ugwe hwerlesi. Asogo hwerlesi ai pam, ia waragama en ede wiak welaga a’ge, ugwe Ribka hwerlesirik ede op agarik, ede hwedik modok welaga.
Zvasarudzwa nguva ino
Kejadian 24: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda