KISAH RASUL-RASUL 7
7
Pidato Stepanus
1Imam Agung beketuan léq Stepanus, “Napi selapuq saq tesampéang siq dengan nike kenaq?” 2#Kej. 12:1 Jawab Stepanus, “Semeton-semeton dait bapaq-bapaq! Dengahang tiang! Sendéqman Ibrahim, leluhurte nike ngalih ojok Haran, sewaktu ie masih ndot léq Mesopotamia, Allah saq Mahemulie rauh tipaq ie 3dait bemanik, ‘Bilin negerinde dait selapuq kadang jarinde. Lumbar ojok negeri saq gen Tiang petitoqang léq side.’ 4#Kej. 11:31, 12:4 Make Ibrahim bilin negeri Kasdim, terus ngalih ojok Haran. Sesampun bapaqne Ibrahim ninggal, Allah manikang Ibrahim ngalih malik ojok negeri niki, saq semeton-semeton dait bapaq-bapaq taoqin mangkin niki. 5#Kej. 12:7, 13:15, 15:18, 17:8 Léq waktu nike ndéq araq separone léman negeri niki saq Allah icanin tipaq Ibrahim jari dowéne, timaqne sejengkak, ndéqne teicanin tipaq ie. Laguq Allah bejanji bahwe Ie gen ngicanin tipaq Ibrahim jari dowéne dait jari dowé keturunanne. Waktu nike Ibrahim ndéqman bedowé bije. 6#Kej. 15:13-14 Laguq niki saq temanikang Allah tipaq ie, ‘Keturunande gen ndot sebagé dengan pendateng léq negeri dengan lain. Dengan-dengan negeri nike gen jariang ie pade panjak dait perlakuang ie pade secare kejem samas taun ngonéqne. 7#Kel. 3:12 Laguq Tiang gen hukum bangse saq jariang ie pade panjakne, dait ie pade gen sugul léman negeri nike dait gen nyembah Tiang léq taoq niki.’ 8#Kej. 17:10-14, 21:2-4, 25:26, 29:31–35:18 Beterus Allah ngicanin tipaq ie perjanjian sunat. Make sesampun Ishak, bije Ibrahim tebijeang, Ibrahim sunat ie sewaktu ie beumur baluq jelo. Beterus Ishak éndah sunat bijene, aranne Yakub. Dait Yakub éndah sunat kedue olas bijene, saq jari bapaq-bapaq leluhur bangse Yahudi.
9 #
Kej. 37:11, 28, 39:2, 21 Bapaq-bapaq leluhurte nike talon até léq Yusup, sehingge ie pade sepakat jual Yusup jari hambe léq Mesir. Laguq Allah araq bareng-bareng kance ie, 10#Kej. 41:39-41 Allah bébasang ie léman selapuq kesusahanne dait ngicanin ie hikmat dait kebijaksanean sewaktu ie ngadep Piraun, raje Mesir, sehingge Piraun jariang ie gubernur negeri Mesir dait penguase istane Piraun. 11#Kej. 42:1-2 Terus araq bahle kelapahan saq beléq léq selapuq negeri Mesir dait Kanaan sehingge dengan menderite gati. Leluhurte ndéqne bau mauq keloran. 12Make sewaktu Yakub dengah araq gandum léq Mesir, ie suruq bije-bijene, leluhurte, lumbar ojok derike. Nike saq penembéq. 13#Kej. 45:1, 16 Sewaktu ie pade lumbar saq kedue kaline, Yusup bebadaq tipaq semeton-semetonne nike bahwe ie setetune Yusup. Waktu nike baruq tewikanang siq raje Mesir mengenai keluarge Yusup. 14#Kej. 45:9-10, 17-18, 46:27 Beterus Yusup ngirim berite tipaq Yakub, bapaqne jari tunas ie kance selapuq keluargene ngalih ojok Mesir -- selapuqne araq pituq pulu lime dengan. 15#Kej. 46:1-7, 49:33 Sesampun nike Yakub ngalih ojok Mesir dait léq derike ie kance selapuq leluhurte ninggal. 16#Kej. 23:3-16, 33:19, 50:7-13; Yus. 24:32 Beterus jenazah ie pade tejauq tulak ojok Sikem dait temakamang léq makam saq sampun tebayah kadu képéng siq Ibrahim léman suku bangse Hemor léq Sikem.
17 #
Kel. 1:7-8
Sewaktu gen dateng waktune Allah nepatin janji-Ne tipaq Ibrahim, bangsente léq Mesir sampun sayan luwéq. 18Ahirne sopoq raje lain saq ndéq kenal Yusup, mréntah léq Mesir. 19#Kel. 1:10-11, 22 Licik gati entan raje nike tipaq bangsente dait kejem léq leluhurte. Ie paksaq ie pade adéqne netéh bebéaq-bebéaq saq baruq teanakang, adéqne karé-aré dait maté. 20#Kel. 2:2 Léq waktu nike Musa tebijeang; ie bebéaq saq solah gati. Telu bulan ngonéqne ie tepeliharaq léq balé bapaqne, 21#Kel. 2:3-10 dait sesampun ie tetetéh, putri Piraun bait ie, beterus ie tepeliharaq maraq bijene mésaq.
22Selapuq ilmu bangse Mesir teajahang tipaq ie dait ie jari dengan saq bekuase gati dalem ucapan dait perbuatan.
23 #
Kel. 2:11-15
Waktu Musa beumur petang dase taun, ie beniat lumbar serioq keadaan bangsene dengan Israel. 24Beterus serioqne sopoq dengan léq antare bangse Israel teaniaye siq sopoq dengan Mesir; terus ie béle dengan saq teaniaye nike, dait matéq dengan Mesir nike. 25Musa paran bangsene gen ngerti bahwe Allah ngutus ie jari bébasang ie pade. Laguq ie pade ndéq ngerti. 26Jemaqne, ie serioq éndah due dengan Israel kenyeke besiaq, terus ie berusahe daméang ie pade. Basene, ‘Side pade niki besemeton kembéq side pade besiaq?’ 27Laguq dengan saq ngempuk baturne nike jelek Musa ojok sedi dait bebase, 28‘Sai saq ngangkat side jari pemimpin dait hakim tiang pade? Napi side mélé matéq tiang éndah maraq side matéq dengan Mesir nike rubin?’ 29#Kel. 18:3-4 Waktu Musa pirengang napi saq teucapang siq dengan nike, ie pelai léman Mesir terus ndot léq negeri Midian. Léq derike ie mauq due bije.
30 #
Kel. 3:1-10
Petang dase taun sesampun nike sopoq malaékat rauh tipaq Musa léq padang gurun dékét Gunung Sinai. Malaékat nike rauh dalem api léq bebenes saq kenyeke nyale. 31Musa bengaq cingakin hal nike, make ie dateng ngerapetin taoq nike adéqne wikanang napi setetune nike. Terus pirengangne suare Tuhan bemanik, 32‘Tiang Allah leluhurde, Tiang Allahne Ibrahim, Ishak dait Yakub.’ Musa jari ngijik siq takutne, terus ndéqne bani malik cingakin bebenes nike. 33Beterus Tuhan bemanik malik, ‘Lepas sandel saq side kadu nike, séngaq tanaq saq taoq side nganjeng nike tanaq saq suci. 34Tiang sampun serioq dait merhatiang paitne penderitean umat Tiang, léq Mesir. Tiang sampun dengah keluhan, dait Tiang gen turun bébasang ie pade. Mangkin, silaq! Tiang gen ngutus side tulak ojok Mesir.’
35 #
Kel. 2:14
Musa niki ie saq ndéq teakuq siq bangse Israel dait saq tetolaq siq ucapan niki, ‘Sai saq ngangkat side jari pemimpin dait hakim tiang pade?’ Laguq malahan ie saq teutus siq Allah jari pemimpin dait penyelamat, langan malaékat saq rauh tipaq ie léq tengaq bebenes saq nyale nike. 36#Kel. 7:3, 14:21; Bil. 14:33 Musa nike saq mimpin bangse Israel sugul léman Mesir siq care piaq keajaipan-keajaipan dait hal-hal saq luar biase léq Mesir, léq Segare Béaq dait léq padang gurun petang dase taun ngonéqne. 37#Ul. 18:15, 18 Musa niki éndah saq bebase léq bangse Israel bahwe, ‘Allah gen ngutus sopoq nabi maraq tiang niki tipaq side pade léman bangsende mésaq.’ 38#Kel. 19:1–20:17; Ul. 5:1-33 Musa nike saq araq léq tengaq-tengaq bangse Israel léq padang gurun, jari perantare tipaq malaékat saq bemanik léq ie léq Gunung Sinai kance leluhurte. Ie saq nerimaq léman Allah manik saq idup jari tesampéang tipaq ite.
39Timaq maraq nike leluhurte nénten kayun taat léq ie. Ie pade nolaq Musa dait ie pade melét tulak ojok Mesir. 40#Kel. 32:1 Ie pade bebase léq Harun, ‘Piaqang tiang pade déwe-déwe, adéq déwe-déwe nike mimpin tiang pade. Séngaq tiang pade ndéq nenaoq malik napi saq nimpe Musa, saq pimpin tiang pade sugul léman Mesir!’ 41#Kel. 32:2-6 Terus léq waktu nike ie pade miaq sopoq tetato anak sampi, beterus ie pade ngaturang kurban tipaq tetato nike dait ngaraqang gawé jari nyembah barang saq ie pade piaq mésaq. 42#Am. 5:25-27 Make Allah bilin ie pade dait menengang ie pade nyembah bintang-bintang léq langit. Nike pade maraq saq tetulis léq dalem kitab nabi-nabi. Maraq niki,
‘Hai dengan-dengan Israel!
Ndéqne umaq Tiang
side nyembeléh dait ngurbanang binatang
sengonéq petang dase taun
léq padang gurun.
43Kémah berhale Molok saq side jauq-jauq
bareng-bareng kance tetato bintang berhalende, Repan;
nike tetato saq side piaq jari tesembah.
Keranaq nike Tiang gen tetéh side jangke dateng itoqan, léq negeri Babel.’
44 #
Kel. 25:9, 40 Kémah taoq Allah rauh tipaq manusie araq léq leluhurte léq padang gurun. Kémah nike tepiaq siq préntah léman Allah tipaq Musa dait menurut conto saq tepetitoqang siq Allah tipaq ie. 45#Yus. 3:14-17 Beterus kémah nike tejauq siq leluhurte sewaktu ie pade bareng kance Yusak lumbar ngerebut negeri niki léman kekuasean bangse-bangse saq tetundung siq Allah léq julun ie pade. Kémah nike araq léq derike jangke dateng jaman Daud. 46#2Sam. 7:1-16; 1Hik. 17:1-14 Daud nyenengang Allah, dait tunas léq Allah adéqne teijinang miaq sopoq gedéng umaq Allah saq tesembah siq Yakub nike. 47#1Raj. 6:1-38; 1Hik. 3:1-17 Laguq Nabi Sulaiman saq piaq gedéng umaq Allah.
48Laguq Allah saq Maheagung nénten meneng léq dalem gedéng saq tepiaq siq manusie; maraq saq tesampéang siq nabi,
49 #
Yes. 66:1-2
‘Langit nike tahte Tiang,
dait gumi lamak naén Tiang.
Gedéng napi gen side piaqang Tiang?
Léq mbé taoq Tiang mentelah? Maraq nike manik Tuhan.
50Tekan Tiang mésaq saq cipteang selapuqne?’
maraq nike Manik Allah.
51 #
Yes. 63:10
Hai dengan-dengan saq pagah, saq keras até dait kedok, side tetep nentang Roh Suci, pade maraq leluhurde, maraq nike éndah side. 52Napi araq nabi saq ndéq teaniaye siq leluhurde? Ie pade nyematéq utusan-utusan léman Allah saq laéq sampun nyampéang bahwe Dengan Kenaq léq arepan Allah nike gen rauh. Terus mangkin side pade matéq dait behianat léq Ie. 53Malaékat-malaékat sampun nyampéang Hukum Taurat tipaq side pade, laguq side pade ndéq mélé taat léq hukum nike!”
Stepanus tepeléwas kadu batu
54Sesampun anggote-anggote Mahkamah Agame nike pirengang selapuqne saq tesampéang siq Stepanus nike, ie pade jari sakit angen dait gedek gati léq ie. 55Laguq Stepanus saq tekuasein siq Roh Suci, serioq andang langit. Ie serioq kemuliean Allah dait Deside Isa ngadeg léq sedi kanan Allah. 56Pade serioq basen Stepanus, “Tiang serioq sorge kebukaq dait Bije Manusie nganjeng léq sedi kanan Allah!”
57Anggote-anggote mahkamah nike nyumpel kentokne sambil nyurak-nyurak, terus beriuk nyerang Stepanus. 58Ie pade oros Stepanus sugul ojok luah kote, beterus peléwasne kadu batu. Saksi-saksi noloq jubah ie pade léq julun naén sopoq terune aranne Saulus. 59Sewaktu ie pade peléwas Stepanus, Stepanus bekuih, “Junjungan Saq Mulie Deside Isa, terimaq roh tiang!” 60Terus ie sujut dait bekuih siq suare saq beléq, “Junjungan Saq Mulie, sampunang dose niki tetanggungang tipaq ie pade!” Sesampun bebase maraq nike, ie ninggal.
Zvasarudzwa nguva ino
KISAH RASUL-RASUL 7: LAISAS
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda