Matyu 3
3
To panangasaba nito Juan nga Mammautisar
Mar. 1:1-8; Luk. 3:1-18; Juan 1:19-28
1Ket itun nga timpu, nagpakaemmu nge̍ Juan nga Mammautisar. Nangaskasaba enna away iya prubinsiya nga Hudya, 2nga kinunen na, “Masapul nga agbabawi kayu kadiya basbasul nu, ta dandani yin ya panangituray niya Nailangitan,” kunen na. 3E̍ Juan mettas to kinunen nito mammadtu nga Isayas itun, ito kinunen na,
“Enna away,
uwed mangip-ipkaw nga kunen na,
‘Isagana nu ya dalan niya Apu!
Palinteggen nu ngarud ya dalanen na!’”
4Ket to Juan, nagkawwes met ka kawwes nga naariman ka dutdut kame̍lyu, se̍ nagbarikes ngas ka lalat. Ket ya kanen na, sisibew se̍ digu yukan. 5Ket nawe̍ nagdengngeg igina diya toltoley nga gayat ka He̍rusale̍m se̍ diya amin nga il-ili niya prubinsiya nga Hudya se̍ diya il-ili nga agsumbangir iya wangag Hordan. 6Nagipakaemmu da met nga situtulnug kadiya basbasul da, ket binautisaran ne̍ Juan da enna wangag Hordan.
7Ket ito nasingen ne̍ Juan nga adu diya Parisiyu se̍ Sadusiyu nga umbe̍t agpabautisar, kinunen na met igida, “Arig kayu ngas nga putputut diya nagita nga malaga! Ape̍? Nagan kad ya nangibaga dakayu nga masapul nu nga ilisi diya beggi nu iya maadpangan nga pannakaukum? 8Diya wangwangel nga tumutup iya napudnu nga panagbabawi kuma lugud ya ipasingen nu iya panagbiyag nu. 9Ket di nu met ipagarup nga kustu no kunkunen nu iya lemlemmet nu nga, ‘Orey a, ta e̍ Abraham met to am-ama mi.’ Bay-an nu ngarud ya agten iyan nga panpanunut. Ta ya kinapudnu na, orey didi ngas nga batu, mabalin met pe̍ nga pagbalinen ne̍ Apu Diyus nga an-anac nito Abraham, no gabay na. 10Ngem ita, arig nga uwed met mailaylayat nga wasey yin nga maikelleng kadiya gamgamut diya kayu. Dikad pe̍ diya amin nga kayu nga madi mamisic ka nabaru, macleng da ngarud, se̍ maitemsit da iya apuy.
11“Ket iyaken ita, danum ya pamautisar ku dakayu gapu iya panagbabawi nu. Ngem uwed nad umbe̍t nga sumarunu iyaken nga dacdackel ya pannakabalin na ngem iyaken, ket di yac pe̍ maikari nga orey no mangabsin ngas iya palloka na para igina. Ket igina, ya Ispiritu Santu se̍ apuy met ya pamautisar na nad dakayu. 12Ta arig met nga ic-icman nan ya pagsap na ka in-gikan, ket urnungen na nad ya in-gikan na, se̍ na italipen iya alangin. Ngem ya essap nga gennung, ipoor na met ka apuy nga di pulus nga makusep,” kunen na.
To pannakabautisar ne̍ Je̍sus
Mar. 1:9-11; Luk. 3:21-22
13Ket itun, inumbe̍t nge̍ Je̍sus antuni nga gayat ka Galilya. Ket nawe̍ met iya wangag Hordan, ito edyan ne̍ Juan, tasun agpabautisar igina. 14Ngem e̍ Juan, gabay na nga lapdan, nga kinunen na, “Rebbeng ku met ya pabautisaran kuma ikew. Bekken met nga rumbeng nga ikew ya umbe̍t agpabautisar iyaken!” kunen na.
15Ngem kinunen ne̍ Je̍sus igina, “Ala kad lugudin, ta rumbeng met no tungpalen ta amin diya nalinteg nga panggep ne̍ Apu Diyus,” kunen na. Dikad pe̍ nayat mettas nge̍ Juanin.
16Ket kalpasan nito pannakabautisar ne̍ Je̍sus, gimacdang mettas nga sigida, ket pag-isu met nga arig nga nalukatan ya langitin. Ket nasingen na ya Ispiritu ne̍ Apu Diyus nga agpaspasegged nga agten iya kalapati, ket dinumsag met igina. 17Ket itun, uwed met timec nga nagicna antuni nga nagtaud ka langit, nga kinunen na, “Itu yani ya Anac ku nga dungdungnguwec. Igina ya pakaay-ayuwac,” kunen na.
Zvasarudzwa nguva ino
Matyu 3: YBT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 1990 New Tribes Mission, Sanford, FL 32771-1487, USA.
Printed in the Philippines.