Mattheos 4
4
1Hehan Jesus woniya on ḣewoskan makoce kin ekta ayapi, Wakanśica iyutanye kta e heon.
2Unkan wanna anpetu wikcemna topa qa hanyetu wikcemna topa wote śni un, hehan wotektehda
3Unkan wawiyutanyan kin en hi qa heciya; Wakantanka Cinhintku kin he niye hecinhan, inyan kin dena aguyapi icage kta keya wo.
4Tuka iye ayupte c̣a heya; Aguyapi ecedan on wicaśta ni kte śni, tuka wicoie otoiyohi Wakantanka i eciyatanhan enanpe cin hena on, hecen wowapi kagapi qon.
5Henan Wakanśica otonwe wakan kin ekta aya, qa tipi wakan oinkpa wan akan ehde;
6Qa heciya; Wakantanka Cinhintku kin he niye hecinhan, hetanhan kun eḣpeic̣iya wo; kaken wowapi en kagapi ce; Taohnihde kin niye on econ wicaśi kta, hecen nape ohna niyuhapi kta, inyan wan en siha iboniṭo kte śni.
7Tuka Jesus heciya; Akeś wowapi en kagapi; Itancan Wakantanka nitawa kin he iyutanyaye kte śni.
8Hehan ake Wakanśica paha wan tehanwankantuya kin he ekta aya, qa maka akan wokiconze kin owasin wowitan ko kipazo;
9Qa heciya; Makata eḣpenic̣iye c̣a ohomayada kinhan, dena owasin cic̣u kta ce.
10Hehan Jesus heciya; Satan miḣeyata ya wo; Itancan Wakantanka nitawa kin he ohoyada kta, qa iśnana wowidagniye kta ce, eya owapi tuka qon.
11Hehan Wakanśica ayuśtan; unkan iho, maḣpiya ohnihde kin en hipi qa okiyapi.
12Unkan Johannes kaśkapi he naḣon hehan Jesus Galile ekta iyaya:
13Qa Nazareth eḣpeya iyaye c̣a Kapernaum en hiyanka, he mde kin icahda, Zabulon qa Nephtalim opapun kin hetu.
14Hecen Isaya oie qon yuecetupi kta;
15Zabulon makoce qa Nephtalim makoce, mde kahda ocanku kin, Jordan akasanpa tanhan, Galile Ikcewicaśta ounyanpi kin:
16Oyate otpaza en iyotanke ciqon he iyoyanpa tanka wanyakapi, qa tona wiconṭe makoce qa ohanzi kin en iyotankapi kin hena iyoyanpa awicahinanpa ce.
17Unkan hetanhan Jesus woyaka aye c̣a heya ece; Ihduecetu po, maḣpiya wokiconze kin wanna kiyedan u ce.
18Unkan Galile mde kin icahda mani icunhan, wicaśta nom sunkakiciyapi wanwicayaka, Simon, Inyan eciyapi, qa sunkaku Andrew eciyapi, ho wan mde kin en iyeyapi; hena hopsicapi kin hecapi:
19Unkan hewicakiya; Miyahna u po, kinhan wicaśta wicadupsicapi ece e kta cicagapi kta ce.
20Unkan ecahankeya ho kin eḣpeyapi qa ihakam iyayapi.
21Unkan hetanhan iyoopta ye c̣a, nakun nom sunkakiciyapi wanwicayaka, Jakob Zebede cinhintku qa sunkaku Johannes, wata kin ohna atkukupi Zebede kici unpi qa ho piyapi; unkan hena wicakico.
22Iś eya wata kin atkukupi ko oḣankoya eḣpeyapi qa ihakam iyayapi.
23Unkan Jesus Galile owancaya iyaya, omniciye tipi yuhapi kin ohna waonspewicakiye c̣a, wokiconze wotanin waśte kin oyaka ece, qa oyate kin en wowayazan owasin qa wicocante śica owasin asniyan ece.
24Unkan oḣan kin Suriya owancaya oyakapi; hecen tona śicaya yukanpi, qa tona wowayazan ocaje owasin on wayazanpi, qa teḣiya unpi, qa tona taku wakan śica yuhapi, qa ṭaṭapike cin hena koya owasin en awicahipi; unkan asniwicaya.
25Hecen oyate ota ihakam yapi ece, Galile etanhan, qa Dekapolis qa Jerusalem qa Juda etanhan, qa Jordan akasanpa tanhan.
Zvasarudzwa nguva ino
Mattheos 4: DAKOTANT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Copyright 2015 American Bible Society. All Rights Reserved.