मरकुस 7
7
बापदादेया रे रूआज
(मत्ती 15:1-9)
1तेबे फरीसी लोक होर कुछ व्यवस्था स्खाणे वाल़े जो यरुस्लेम सैहरा ले आईरे थे, स्यों यीसू रे चहुँ वखा जो कठे हुए। 2होर तिन्हें यीसू रे चेलेया जो बापदादेया रे रुआजा रे बरखलाफ बगैर हाथ धोये रोटी खांदे देख्या था। 3क्यूंकि फरीसी लोक होर सब यहूदी लोक, आपणे बापदादेया रे रूआजा पर नी मन्नदे, होर जेबे तक ठीक ढंगा किन्हें हाथ नी धोई लैंदे तेबे तक खाणा नी खांदे। 4होर बजारा ले आई किन्हें, जेबे तक स्यों रुआजा रे मताबक आपणे हाथ नी धोई लैंदे थे, तेबे तक स्यों खाणा नी खांदे थे; होर बी बौह्त सारी गल्ला थी, जिन्हारा पालण स्यों रुआजा रे मताबक करहा ऐं थे, जिहां कौलिया, लोटे होर ताम्बे रे भांडे जो धोणा-मांजणा।
5इधी कठे तिन्हें फरीसी लोके होर व्यवस्था स्खाणे वाल़े ये तेस ले पूछेया कि, “तेरे चेले किधियो बापदादेया रे रूआजा पर नी चल्दे, होर बगैर हाथ धोये रोटी खाहें।”
6यीसूए तिन्हा किन्हें बोल्या कि, “यसायाह नबिये तुस्सा रे पाखंडा रे बारे मन्झ बिलकुल ठीक भविस्यवाणी कितिरी, जेह्ड़ा लिखिरा कि,
‘ये लोक आपणे सब्दा किन्हें ता मेरा आदर करहा ऐं,
पर तिन्हारा मन मेरे ले बौहत दूर आ।#7:6 यसा. 29:13
7होर स्यों बेकार मेरी अराधना करहा ऐं,
क्यूंकि स्यों माह्णुंआं रे बणाईरे रुआजा जो परमेसरा रे हुक्म बोली किन्हें लोका जो स्खाहें।’”
8क्यूंकि तुस्से परमेसरा रे हुक्मा जो टाल्ली किन्हें माह्णुंआं रे रूआजा जो मन्हां ऐं।
9होर यीसूए तिन्हा किन्हें बोल्या, “तुस्से बौह्त खरे तरीके किन्हें जाणहां ऐं कि किहाँ तुस्से परमेसरा रे हुकमा जो टाल्हा ऐं! ताकि तुस्से आपणे रूआजा जो मनी सको। 10क्यूंकि मूसे नबिये बोलिरा कि, ‘आपणे माऊ-बापू री इज्जत करा’ होर ‘जो कोई आपणे माऊ-बापू जो बुरा बोले, से मारी दितेया जाणा।’#7:10 निर्ग. 20:12, व्य. 5:16 11पर तुस्से बोल्हा ऐं कि, अगर कोई आपणे माऊ-बापू किन्हें बोले कि, ‘जो कुछ मदद हांऊँ तुस्सा जो देई सक्हा था, से परमेसरा जो भेंट चढ़ाणे रा वादा कितिरा।’ 12होर तुस्से तेस जो आपणे माऊ-बापू री कुछ सेऊआ नी करणे देंदे। 13एस तरहा तुस्से आपणे रूआजा किन्हें परमेसरा रा वचन टाल्ली देहां ऐं, होर एह्ड़े-एह्ड़े बौह्त सारे काम करहा ऐं।”
माह्णुं जो गन्दा करणे वाली गल्ला
(मत्ती 15:10-20)
14होर यीसूए लोका जो आपणे वाले सादी किन्हें तिन्हा किन्हें बोल्या, “तुस्से सभ मेरी सुणा, होर समझा। 15एह्ड़ी कोई चीज नी ई जो माह्णुं जो बाहरा ले अंदर जाई किन्हें गन्दा करही; पर जो चीजा माह्णुं रे मना रे बाहर निकला ई, स्यों ई तेस जो गन्दा करहा ई।” 16होर यीसूए बोल्या, “जो मेरी गल्ला सुणदा लगीरा, से बड़े ध्याना किन्हें सुणें।”
17फेरी जेबे से भीड़ा जो छाडी किन्हें चेलेया साउगी घरा अंदर गया, ता तेसरे चेले एस उदाहरणा रे बारे मन्झ तेस ले पूछेया। 18यीसूए तिन्हा ले पूछेया, “क्या तुस्से भी एह्ड़े नासमझ ऐं? क्या तुस्से नी समझ्दे? कि जो चीज बाहरा ले माह्णुं रे अंदर जाहीं, से तेस जो गन्दा नी करी सक्दी? 19क्यूंकि से तेसरे मना मन्झ नी, पर पेटा मन्झ जाहीं, होर संडासा ले हुई किन्हें बाहर निकली जाहीं?” ये बोली किन्हें तिन्हें सब खाणे जो सुद्ध ठैहराया।
20फेरी तिन्हें बोल्या, “जो माह्णुं रे मना मन्झा ले निकल्हा, सेई माह्णुं जो गन्दा करहा। 21क्यूंकि माह्णुं रे मना मन्झा ले, बुरी-बुरी सोच, व्यभिचार करणा, चोरी करणा, खून करणा, नजायज रिस्ते रखणा, 22लालच करणा, दुस्टता, धोखा देणा, लुचपन, बैर-भाव, बदनामी करणा, बडयाई करणा होर नर्क्कले बणना, जेह्ड़ा ही निकल्हा। 23होर ये सब बुरी गल्ला अंदरा ले ई निकल्हा ई होर माह्णुं जो गन्दा करहा ई।”
सरुफिनिकी देसा री ज्नाने रा विस्वास
(मत्ती 15:21-28)
24यीसू होर तेसरे चेले गलीला जो छाडी किन्हें सुर होर सैदा सैहरा रे ओरले-परले ईलाके मन्झ आया। होर एक घरा मन्झ गया, होर चाहां था कि भीड़ा रे लोका जो ये पता नी चले, पर से ल्हुखी नी सकेया। 25यीसू रे बारे मन्झ सुणी किन्हें एक जन्नाने झटपट आई जेस्सा री छोटी मह्ठी मन्झ जे दुस्टात्मा थी, होर आई किन्हें तेसरे पैरा पर पई गई। 26ये ज्नाने यूनान देसा री थी होर सुरूफिनिकी देसा मन्झ रैहणे वाली थी; होर तेस्से तेस ले अर्ज किती कि, मेरी मह्ठी मन्झा ले दुस्टात्मा काढी दे।
27यीसूए तेस्सा रे विस्वासा जो परखणे रे कठे बोल्या कि, “पैहले मेरे बच्चेया जो यहूदी लोका जो पेट भरी किन्हें रजणे ता दे, क्यूंकि बच्चेया री रोटी लई किन्हें कुत्ते रे अगे नी रखदे।” (यहूदी लोक दूजी जातिया रे लोका जो कुत्ते साहीं समझ्हा ऐं थे)
28पर तेस्से यीसू जो जवाब दितेया कि, “सच्च आ प्रभु, कुत्ते भी ता मेजा थाले पईरे बच्चेया री रोटी रे टुकड़े खाई लैहां ऐं।”
29होर यीसूए तेस्सा किन्हें बोल्या क्यूंकि, “तेरे विस्वास रा पता तेरे बोलणे ले लगी गया, तू चली जा; दुस्टात्मा तेरी बेटी मन्झा ले निकली गयी।”
30होर तेस्से आपणे घरा आई किन्हें देख्या कि मह्ठी मांजे पर लेटिरी होर दुस्टात्मा तेस्सा मन्झा ले निकली गईरी ई।
टऊणें होर हकले माह्णुं रा ठीक हूंणां
31यीसू होर तेसरे चेले फेरी से सुर होर सैदा सैहरा ले निकली किन्हें दिकापुलिस ईलाके ले हुई किन्हें गलील समुद्रा पर पुज्हेया। 32होर लोके एक टौणे जो, जो हकलाहां भी था, तेस वाले आई किन्हें तेस ले अर्ज किती कि, एस जो छुही किन्हें ठीक कर।
33तेबे से तेस्जो भीड़ा ले लग लई गया, होर आपणी गुठिया तेसरे काना मन्झ पाई, होर आपणी गुठिया पर थूक लगाई किन्हें तेस माह्णुं री जीभ छुही। 34होर स्वर्गा वखा देखी किन्हें आह भरी, होर तिन्हें आपणी भासा मन्झ बोल्या, “इप्फत्तह!” यानि “खुल्ही जा!” 35होर से ढंगा किन्हें सुणदा लगेया, होर से ढंगा के बोल्दा लग्या।
36तेबे यीसूए लोका जो बोल्या खबरदार तुस्से केसी किन्हें देख्या बोल्दे; पर जितनी तिन्हा जो नांह किती तितना ज्यादा स्यों गल्ला करदे लगे। 37होर स्यों बौह्त ई हरान हुई किन्हें बोल्दे लगे, “जो कुछ यीसू करहा ऐं था से खरा करहा था; से टौणें जो सुणने री होर टाटे जो बोलणे री ताकत देहां।”
Zvasarudzwa nguva ino
मरकुस 7: MJLNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.