मत्ती 23
23
व्यवस्था स्खाणे वाल़े होर फरीसी लोका ले चतन्न
(मरकु. 12:38-39; लूक. 11:43-46; 20:45,46)
1यीसूए भीड़ा रे लोका होर आपणे चेले किन्हें बोल्या, 2“व्यवस्था स्खाणे वाल़े होर फरीसी लोक मूसा री व्यवस्था जो हका किन्हें स्खाणे रे कठे माहिर ये; 3इधी कठे स्यों तुस्सा किन्हें जो कुछ बोले तेह्ड़ा ई करेया, होर मन्या। पर तिन्हा साहीं काम देख्या करदे, क्यूंकि स्यों बोल्हा ऐं ता जरुर ऐं पर करदे नी। 4स्यों आपणे कई किस्मा रे हुकमा जो माह्णुंआं रे खऊये पर रख्हा ऐं जो तिन्हारे कठे गर्के बजना साहीं आ। पर स्यों आपु तेता जो मनणे रे कठे कोसिस भी नी करदे। 5स्यों आपणे सारे काम लोका जो दसणे रे कठे करहा ऐ: स्यों आपणे ताबीज (स्यों पट्टिया पर पवित्र सास्त्र जो लिखी किन्हें आपणे माथे होर बाहिंयां पर बान्हा ऐं थे) चौड़े करहा ऐं, होर आपणे कपड़े री झालरा बडी करहा ऐं। 6होर धामा मन्झ खास-खास जगहा, होर यहूदी सभा मन्झ खास-खास आसना मन्झ बैठणा पसंद करहा ऐं। 7होर बजारा मन्झ नमस्कार होर माह्णुं रे बीचा मन्झ गुरु बणना तिन्हा जो खरा लग्हा। 8पर, तुस्से गुरु देख्या बणदे, क्यूंकि तुस्सा रा एक ई गुरु आ: होर तुस्से सारे भाई बैहण एक ऐं। 9होर धरती पर केसी जो आपणा बापू (लोक धार्मिक अगुवे जो होर महान गुरुआ जो बापू बोल्हा ऐं थे) देख्या बोल्दे, क्यूंकि तुस्सा रा एक ई बापू आ, होर जो स्वर्गा मन्झ परमेसर आ से ही तुस्सा रा आत्मिक बापू आ। 10होर तुस्से माल्क भी देख्या कैहलांदे, क्यूंकि मसीह तुस्सा रा एक ई माल्क आ। 11जो तुस्सा मन्झ बडा हो, से तुस्सा रा सेवक बणे। 12जो कोई आपणे आपा जो बडा बणाहंगा, से छोटा कितेया जाणां। होर जो कोई आपणे आपा जो छोटा बणान्घा, से बडा कितेया जाणा।”
व्यवस्था स्खाणे वाल़े होर फरीसी लोका रे पाखंड
(मरकु. 12:40; लूक. 11:39-42)
13हे व्यवस्था स्खाणे वाल़े होर फरीसी लोको तुस्से पाखंडी ऐं, तुस्सा जो बौह्त सजा मिलणी! तुस्से माह्णुं रे कठे स्वर्गा रे राजे रे दुराजे बन्द करहा ऐं। तुस्से ना ता आपु ई तेस मन्झ दाखल हुंहाँ ऐं, होर ना तेस मन्झ होरी जो दाखल हूंणां देहां ऐं। 14हे पाखंडी व्यवस्था स्खाणे वाल़े होर फरीसी लोको, तुस्सा जो बौह्त सजा मिलणी! तुस्से विधवा जो ठगी किन्हें तिन्हारे घर-बार होर जायदाद आपणे कठे लई लैहां ऐं, होर दिखावे रे कठे बड़ी देरा तक प्रार्थना करदे रैंहयां ऐं। इधी कठे परमेसरा तुस्सा जो सजा देणी। 15“हे पाखंडी व्यवस्था स्खाणे वाल़े होर फरीसी लोको तुस्सा जो बौह्त सजा मिलणी! तुस्से एक आदमी जो आपणे पन्था मन्झ ल्याऊणे रे कठे समुद्र होर धरती जो पार करी किन्हें दूर-दूर चली जाहें, होर जेबे से तेस पन्था मन्झ आई जाहाँ, ता तुस्से तेस जो आपणे ले दो गुणा नरका रे भागी बणाई देहां ऐं।”
16“हे काणे अगुवो, तुस्सा जो बौह्त सजा मिलणी, जो बोल्हा ऐं कि अगर कोई मन्दरा री कसम खाये ता कुछ नी आ, पर अगर कोई मन्दरा रे सोने री कसम खाए ता तेस कस्मा जो मनणा जरूरी आ। 17हे नर्क्कलेयो, होर काणेयो, कुण बडा आ, सोना या से मन्दर जेस ले सोना पवित्र हुंहाँ? 18फेरी बोल्हा ऐं कि अगर कोई बेदी री कसम खाए ता कुछ नी आ, पर जो भेंट बेदी पर ई, अगर कोई तेता री कसम खाए ता से आपणी कस्मा किन्हें बन्धी गया। 19हे काणेयो, कुण बडा आ भेंट या बेदी, जेस ले भेंट पवित्र हुंहाँ ईं? 20इधी कठे जो बेदी री कसम खांहां, से तेस्सा बेदी री, होर तेता पर रखिरी चीजा री कसम खांहां। 21होर जो मन्दरा री कसम खांहां, से मन्दरा री होर मन्दरा मन्झ रैहणे वाली चीजा री भी कसम खांहां। 22होर जो स्वर्गा री कसम खांहां, से परमेसरा री राजगद्दी री होर तेता पर बैठणे वाल़े परमेसरा री भी कसम खांहां।”
23“हे पाखंडी व्यवस्था स्खाणे वाल़े, होर फरीसी लोको, तुस्सा जो बौह्त सजा मिलणी! तुस्से पदीने होर सूम्फ होर जीरे रा दस्वांस देहां ऐं। पर तुस्से मूसा री व्यवस्था री जरूरी गल्ला जिहां कि न्याय, दया होर विस्वास छाडी दितिरा। करणा ता एह्ड़ा चहिए था, तुस्सा जो दस्वांस ता देंदे रेहणा चहिए, पर तुस्से व्यवस्था री जरूरी गल्ला जो भी नजरअंदाज करी दे। 24हे काणे अगुवो, तुस्से पाणी पींदे टैमा बड़े ध्याना किन्हें मच्छरा जो ता छाणी देहां ऐं केतकी तुस्से तेता जो निगली नी लो, पर परमेसरा री व्यवस्था री जरूरी गल्ला जो टाल्ई देहां ऐं जो तुस्सा रे कठे ऊंटा जो निगल्ने रे बराबर आ।”
25“हे पाखंडी व्यवस्था स्खाणे वाल़े, होर फरीसी लोको, तुस्सा जो बौह्त सजा मिलणी! तुस्से तिन्हा भांडेया साहीं ऐ, जो बाहरा ले साफ होर अंदरा ले गंदे। तुस्से लोका साम्हणें आपणे आपा जो ता धर्मी दस्हा ऐं, पर तुस्सा रा मन न्ह्यारे मन्झ आ, होर आपणे आपु पर काबू नी रखदे। 26हे काणे फरीसी लोको, पैहले कौली होर थालू अंदरा ले मांजा ताकि स्यों बाहरा ले भी साफ हो।”
27“हे पाखंडी व्यवस्था स्खाणे वाल़े लोको, होर फरीसी लोको, तुस्सा जो बौह्त सजा मिलणी! तुस्से चुना कितरी कब्रा साहीं ऐं जो ऊपरा ले ता खरे सुझ्हा ऐं, पर अंदरा ले मरिरे रे हाड़के किन्हें होर सभ किस्मा री गंदगी किन्हें भर्हिरे। 28इंहां ईं तुस्से भी तिन्हा कब्रा साहीं ऐं, जेबे लोक तुस्सा जो देख्हा ऐं, स्यों सोच्हा ऐं कि तुस्से धर्मी ऐं, पर अंदरा ले तुस्से पाखंडी होर परमेसरा रे हुक्म नी मनणे रा पाप करहा ऐं।”
व्यवस्था स्खाणे वाल़े होर फरीसी लोका पर सजा री भविस्यवाणी
(लूक. 11:47-51)
29“हे पाखंडी व्यवस्था स्खाणे वाल़ेओ, होर फरीसी लोको, तुस्सा जो बौह्त सजा मिलणी, तुस्से नबिया री कब्र स्जाहें जिन्हा जो तुस्सा रे बापदादे मारी दितरा था होर धार्मिक लोका जो सम्मान देणे रे कठे कब्र बणाहें। 30होर बोल्हा ऐं कि, अगर आस्से आपणे बापदादा रे टैमा मन्झ हुन्दे ता नबिया रा खून करणे मन्झ तिन्हारे साझीदार नी हुन्दे। 31एता ले ता तुस्से आपणे खिलाफ ई गुआही देहां ऐं कि, होर तुस्से तिन्हारे बंस ऐं जिन्हें जे नबिया री हत्या कितरी। 32होर हांऊँ जाणा कि तुस्से आपणे बापदादा रे पापा रा घड़े भरी देणे। 33तुस्से लोक जैहर्ले कीड़े रे बच्चे साहीं ऐं, तुस्सा नरका रे दण्डा ले नी बचणा। 34इधी कठे मां तुस्सा वाले नबी होर बुद्धिमान होर व्यवस्था स्खाणे वाल़े भेजणे। होर तुस्सा तिन्हा मन्झा ले कुछ लोक मारी देणे, होर दूजे लोक क्रूसा प्रयाल्हे चढ़ाणें। होर कुछ लोका जो आपणी यहूदी सभा मन्झ कोड़े मारणे, होर एक गांऊँआं ले दूजे गांऊँआं तक तिन्हारा पीछा करदे रैंह्णां। 35ताकि धर्मी माह्णुं हाबिला ले लई किन्हें बिरिक्याहा रे मह्ठे जकरयाह नबी तक, जेस जो तुस्से मन्दरा होर बेदी रे बीचा मन्झ मारी दितिरा था। होर जितने धर्मी लोका रा खून धरती पर बहाया गईरा, तुस्सा तिन्हारी मौता रे जिम्मेदार खुद हूंणां। 36हांऊँ तुस्सा किन्हें सच्च बोल्हा, ये सारी खूना री सजा एस्सा पीढ़ी रे लोका पर आई जाणी।”
यीसू रा यरुस्लेम सैहरा रे कठे रोणा
(लूक. 13:34-35)
37“हे यरुस्लेम सैहर रे लोको, हे यरुस्लेम सैहर रे लोको! तुस्से पैहल्के नबी मारी दिते, होर जो तुस्सा वाले भेजे गये, तिन्हा जो पत्थरवाह कितेया। कितनी बारी मैं चाहेया कि जिहां कुकड़ी आपणे बच्चे जो आपणे फान्खा हेठ कट्ठा करहा ई, तिहां ईं हांऊँ भी तेरे लोका जो बचाऊं, पर तुस्से एह्ड़ा नी चाहेया। 38तुस्सा रा घर तुस्सा रे कठे पूरी तरहा ले उजड़ी जाणा। 39इधी कठे हांऊँ तुस्सा किन्हें बोल्हा कि, ऐबे ले जेबे तक तुस्सा नी बोलणा कि, धन्य आ से, जो प्रभु रे हका ले आहूँआं, तेबे तक तुस्सा हांऊँ दबारा नी देखणा।”
Zvasarudzwa nguva ino
मत्ती 23: MJLNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.