मत्ती 18
18
स्वर्गा रे राजा मन्झ बडा कुणहां?
(मरकु. 9:33-37; लूक. 9:46-48)
1तेस ई टैम चेले यीसू वाले आई किन्हें पुछदे लगे कि, “स्वर्गा रे राजा मन्झ बडा कुणहां?” 2एता पर यीसूए एक बच्चा आपणे वाले सादेया होर तिन्हारे बीचा मन्झ खड़ा करी दितेया। 3होर तिन्हें बोल्या, “हांऊँ तुस्सा किन्हें सच्च बोल्हा, अगर तुस्से नी बधल्गे होर एस बच्चे साहीं नम्र नी बणघे, ता स्वर्गा रे राजा मन्झ तुस्सा दाखल नी करी पाणा। 4जो कोई आपणे आपा जो एस बच्चे साहीं नम्र करघा, तेस स्वर्गा रे राजा मन्झ बडे हूंणां। 5होर जो कोई मेरे साउगी प्यार रखी किन्हें एक एह्ड़े बच्चे जो अपनाहां, से मुंजो अपनाहां।”
पाप करणे री परखणी
(मरकु. 9:42-48; लूक. 17:1,2)
6“जो कोई इन्हा छोटे मन्झा ले जो मेरे पर विस्वास करहा ऐं, तिन्हा मन्झ केसी एकी ले भी पाप कुराये ता तेसरे कठे खरा आ कि एक बड़ा चक्की रा पाट तेसरे गला मन्झ टांग्या जाए होर तेस जो समुद्रा मन्झ सट्टी दितेया जाए। 7संसारा रे कठे ये डरावणी गल ई कि लोका आपणा विस्वास खोई देणा! एह्ड़ा ता हमेसा हुन्दा रैंह्णां; पर तिन्हा लोका जो बौह्त सजा मिलणी! जिन्हां माह्णुंआं री वजहा ले लोका आपणा विस्वास खोई देणा।”
8“अगर तेरा हाथ या पैर तेरे ले पाप कुराणे जो त्यार हुई जाए ता तिन्हा किन्हें पाप करणा बंद करी दे एथी तक कि अगर तुजो आपणे हाथ पैर काटणे पई जाए ता तिन्हा जो तू काटी दे। ताकि तू पाप नी करहे, दो हाथ या दो पैर रैहन्दे हुए तूजो अनंत नरका मन्झ पाणे ले ता तेरे कठे ये खरा आ कि, तू टूण्डा या लंगड़ा हुई किन्हें अनंत जिन्दगी मन्झ दाखल करहे होर परमेसरा साउगी रहे। 9होर अगर तेरी हाख तुजो पाप कुराणे जो त्यार हुई जाए ता तेस हाखिया ले पाप करणा बंद करी दे, होर तुजो से हाख काढणी भी पई जाए ता तू एह्ड़ा ई कर। दो हाखिया हुंदे हुए तूजो नरका री आगा मन्झ पाए जाणे ले ता ये खरा आ कि तू काणा हुई किन्हें अनंत जिन्दगी मन्झ दाखल करहे।”
ल्हुखी री भेडा रा उदाहरण
(लूक. 15:3-7)
10“देखा, तुस्से इन्हा छोटे बच्चे मन्झा ले केसी जो बेकार देख्या जाणदे; क्यूंकि हांऊँ तुस्सा किन्हें सच्च बोल्हा कि, स्वर्गा मन्झ तिन्हारे स्वर्गदूत मेरे स्वर्गीय बापू रे साम्हणें हमेसा हाजिर रैंहयां ऐं। 11क्यूंकि हांऊँ माह्णुंआं रा मह्ठा भटकिरे लोका जो बचाणे रे कठे आईरा।
12तुस्से क्या समझ्हा ऐं? अगर केसी माह्णुं री सौ भेडा हो, होर तिन्हा मन्झा ले एक गुआई जाए, ता क्या तेस तिन्हा नड़िनूऐं जो प्हाड़ा पर छाडी किन्हें, तेस से गुआई री भेड नी तोप्णी? 13होर अगर से गुआई री भेड तेस जो मिली जाए, ता हांऊँ तुस्सा किन्हें सच्च बोल्हा कि, तेस तिन्हा नड़िनूऐं भेडा रे कठे जो भटकीरी नी थी इतना खुस नी हूंणां, जितना कि एस्सा भेडा रे कठे खुस हूंणां। 14एह्ड़ा ई तुस्सा रे बापू री जो स्वर्गा मन्झ आ, ये इच्छा नी ई कि, इन्हा छोटे मन्झा ले एक भी नास हो।”
कलीसिया रे लोका री गलतिया रा सुधार
15“अगर तेरा विस्वासी भाई तेरे बरखलाफ गुनाह करहे, ता जा होर कल्हे जे गलबात करी किन्हें तेस जो समझाई दे; अगर से तेरी सुणी किन्हें आपणे पापा जो मनी ले ता तैं आपणा भाई वापस जीती लेया। 16होर अगर से तेरी नी सुणे, ता एक दो जणा जो आपणे साउगी लई जा, क्यूंकि मूसा री व्यवस्था रे मताबक हर एक सिकायत दो या तीन गुआहा रे ज्रीए सच्च साबित हूणा चहिए। 17अगर से तिन्हारी भी नी सुणे, ता कलीसिया किन्हें बोली दे, पर अगर से कलीसिया री भी नी सुणे, ता तू तेसके एह्ड़ा व्यवहार करा जिहां तुस्से गैर-यहूदी होर चुंगी लैणे वाल़ा साहीं करहे।”
रोकणा होर मौका देणा
18“हांऊँ तुस्सा किन्हें सच्च बोल्हा, जो कुछ तुस्से धरती पर बानघे, तेस स्वर्गा मन्झ बझी जाणा होर जो कुछ तुस्से धरती पर खोल्घे, तेस स्वर्गा मन्झ खुल्ही जाणा। 19फेरी हांऊँ तुस्सा किन्हें बोल्हा, अगर तुस्सा मन्झा ले दो जण धरती पर केसी गल्ला जो एक मन हुई किन्हें मांगे, ता से मेरे बापू री तरफा ले जो स्वर्गा मन्झ आ तिन्हारे कठे हुई जाणी। 20क्यूंकि जेथी केथी दो या तीन लोक मेरे चेले हूंणे रे नाते कठे हुंहाँ ऐं तेथी हांऊँ तिन्हारे बीचा मन्झ हुंहाँ।”
माफ नी करणे वाल़े सेऊआदारा रा उदाहरण
21तेबे पतरसे नेडे आई किन्हें, यीसू किन्हें बोल्या, “हे प्रभु, अगर मेरा विस्वासी भाई गुनांह करदा रहे, ता हांऊँ कितनी बारी तेस जो माफ करूं, क्या सात बारी?”
22यीसूए तेस किन्हें बोल्या, “हांऊँ तुध किन्हें ये नी बोल्दा कि, सात बारी, पर साता ले सत्तर गुणा तक तेस जो माफ करा।
23इधी कठे स्वर्गा रा राज एस उदाहरणा साहीं आं। एक राजा था जिन्हें आपणे सेऊआदारा ले लेखा लैणा चाहेया। 24जेबे से लेखा लैंदा लग्या, ता एक जण तेसरे साम्हणें ल्यान्देया जेस पर दस हजार तोड़े#18:24 एता रा मतलब ये आ कि एक तोड़ा लगभग बी साला री ध्याड़ी रे बराबर आ रा कर्ज था, जो से सेऊआदार कधी भी नी देई सक्दा था। 25जेब्की चूकाणे रे कठे तेस वाले कुछ नी था, ता तेसरे राजे ये हुक्म दितेया कि ये होर एसरी लाड़ी होर एसरे बाल बच्चे होर एसरा सभ कुछ बेची दितेया जाए, होर से कर्जा चुकाई दितेया जाए।”
26“तेबे तेसरे सेऊआदारे तेसरे पैरा पर पई किन्हें तेस ले अर्ज किती, होर बोल्या हे राजे, सब्र रख, मां सब कुछ चुकाई देणा। 27तेबे सेऊआदारा रे राजे तेस पर तरस खाधी होर से छाडी दितेया, होर तेसरा कर्जा माफ करी दितेया।
28पर जेबे से सेऊआदार बाहर निकल्या, ता तेसरे संगी सेऊआदारा मन्झा ले एक तेस जो मिल्या, जो तेसरा सौ ध्याड़े री मजदूरी रा कर्जदार था; तिन्हें से पकड़ेया होर तेसरा गला घुटेया, होर बोल्या, ‘जो कुछ तैं लईरा से मुंजो वापस देई दे।’ 29एस्सा गल्ला पर तेसरा संगी सेऊआदार झुकी किन्हें, तेस ले अर्ज करदा लग्या कि, सब्र रख मां सभ चुकाई देणा। 30पर से नी मन्या, पर तिन्हें जाई किन्हें से जेल्हा मन्झ पाई दितेया; ताकि जेबे तक से कर्जा नी चुकाए, तेबे तक से तेथी रहे। 31तेसरे संगी सेऊआदार ये देखी किन्हें बौह्त दुआस हुए, होर तिन्हें जाई किन्हें आपणे राजे जो पूरा हाल दसी दितेया।”
32“तेबे तेसरे राजे तेस जो सादी किन्हें तेस किन्हें बोल्या, ‘हे दुस्ट सेऊआदार,’ तैं मेरे ले बिनती किती, होर मैं तेरा पूरा कर्जा माफ करी दितेया? 33इधी कठे जिहां मैं तेरे पर दया किती, होर तेरा कर्ज माफ कितेया तिहां ईं तुजो भी आपणे संगी सेऊआदारा पर दया करी किन्हें तेसरा कर्ज माफ करणा चहिए था। 34होर राजे गुस्से मन्झ आई किन्हें तेस सेऊआदारा जो सजा देणे वाल़े रे हाथा मन्झ सौंपी दितेया, ताकि जेबे तक से सारा कर्जा चुकाई नी दे, तेबे तक से तेथी रहे।”
35“इंहां ईं अगर तुस्सा मन्झा ले हर एक आपणे विस्वासी भाई रे पाप मना ले माफ नी करघे, ता मेरे बापू जो स्वर्गा मन्झ आ, तेस तुस्सा साउगी भी एह्ड़ा ही करणा।”
Zvasarudzwa nguva ino
मत्ती 18: MJLNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.