Matiu 28
28
NA SOPENA 28.
1Na sapat mosori tau, vahatea irani me na majihana pohi hi na uik, Mere Maktalin me Mere motatea teranumai sura leleo na vonae hi ra taha mate. 2Tau na mui tahajia momalua; suria na enjel hi Na Moli mosumai majuri me na tailahi, monumai, mohurehuretuhe na sule, mosihe toho ae. 3Na epena mopala tive, na visivisina movoe pala sno: 4sura ine nie ra tajua taha mata temaherehere, tepala i ra tajua taha mate. 5Tau na enjel motami, moaso ta me ra hajae, moaso, Oratena ine: suria inau apinisi amurua oratiro i Iesu, moape mine me na hau palatusi. 6Mosanie nai; suria motamaraha, palaia moaso mine. Oranumai, oraleleo na vonae hi Na Moli mosinavu ae mine. 7Tau oravano vilevileahi, oravetia ta me ra uluo hina, oraaso, Motamaraha me na mate; movano majiha himiu me Kalili; otorenia pa me na vanua neeno: inau avaraiamurua. 8Tau teralaho vilevileahi ture na vonae hi ra taha mate, teraine, teraejieji tohova, terarovorovo toho sura lavi na taveti hina me ra uluo hina. 9Tau Iesu movaripahoi merarua, moaso, Amurua, tuaja. Tau teranumai, teraau na ena, teralotu mea. 10Tau Iesu moaso ta merarua, Oratena ine: oravano, oravarai ra tuau tivano me Kalili, tireniau me na vanua neeno. 11Teralaho toho, na valura tajua taha mata tenumai me na vanua, tevetia ta me ra varese hi na lotu ra sanu temalua mine. 12Tau tenumai huhurahi valui ra varie, tevali suria tau, terahu na sule motavere ta me ra tajua hi na jumu, 13teaso, Otoaso pa, Ra uluo hina tenumai me na pohi, amamanavu tohoreji, tepalihoe. 14Tau va na varese iroho ia, amamaiaso tahonae mea, tau amiu otosaninima nie suria. 15Suri a telavi na sule, tevei palahi hire tepisera: teveti na leo naa ta me ra Ju, terohoe naanoi mono.
16Maa ra uluo hi Iesu na havulatea na vana motea tevano me Kalili, me na vuti motea Iesu mopisera mine. 17Tau terenia tau, telotu mea: maa na valura hira tesarohoroho mea. 18Tau Iesu monumai mera, moaso ta mera, moaso, Na hauhaua vunuvunu me na tailahi me na ulu mosipilau. 19Suri a otovano, otove ra tanoho me ra vanua vunuvunu tiuluo hiu, otopaptaisira mena liise i Tata me Matuna me Na Talume Tapu: 20otoaso pipisera tive ra sanu vunuvunu inau aaso mine ta meamiu: inau aitoho valuiamiu tuitui, io, aitoho valuiamiu me na rani hi na ulu isori pa.
Zvasarudzwa nguva ino
Matiu 28: TLM9109
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This is a historic text maintained by the British and Foreign Bible Society.