Mbete Luk 23
23
1Nzukri gbam ké ƴo gel-kuŋ salɓay ra ur síɓa mí maŋ Zezu si pol guvener Pilaɗ#23.1 Nzuk suyari le, ziɓri vbuk ke kasaw. Rɔmri ba, i nzukri ké tul kpuh vbatay. Mbete bolkusol Ŋgerzah sɔk ɓahri, nzuk ké hu tul kpuh le, ɓa hul nazi mí ta ni. Sa̧wu mí ziɓri yih ɓay Rɔmri ɓá i Zezu. Kaŋaw mí ku ɓahri se, Zezu ta ɓa Ŋgermbay ya, ɓay hul nazi ké ta ni. Í ki̧ Mbete Galaɗri 3.13 ɓay lah ɓayu.. 2Ku goh Zezu ke ɓay kandɔkay : « Nah ziŋ gun wo̧ro-ay, ke ƴo gbur nzuk sa̧w puh wah ziɓri, ke ƴo gboh púh lampoh hi̧ sezar mbay a luki dara mí ke el ɓahri, a ye gaŋ mí ke ɓa Ŋgermbay, mbay a luki. »
3Mí Pilaɗ vbi ni ɓay ɓahri : « A wo mú-u ɓa mbay ziɓri ra le ? »
Zezu ba, yih nzak ye ɓahri : « Nzak wo mí ɓah-aw. »
4Pilaɗ si ɓah hi̧ ŋgernzuk fe puhna Ŋgerzahri ke daɓa nzukri-aw ɓahri : « Mi ko suya mbew ké mgba tul ye ya. »
5Mí ku ŋgu̧h ɓay woyri ɓahri : « Ke ƴo firma gun Izarayelri láɓ tul kpuhna ké tusiɓa ziɓri-ay gbam, ur ke tusiɓa Galile sa̧ gi ka̧h tusiɓa Zude-ay. »
6Pilaɗ lah kaŋ ba, ke vbi niri ɓahri, nzuk-aw ɓa ziɓ a tusiɓa Galile wa ? 7Mbay Eroɗ ké ɓa mbay ziɓri ra ƴo Zurusalem ɓay ti̧hmbih-i guy buma#23.7 Vul kani Ŋgerzah na Zurusalem. Sa̧wu mí ziɓri ur ke puh woyri puh woyri si vbeh guy buma ké Zurusalem. Sa̧w Eroɗ kara ɓa ziɓ pi.. Pilaɗ lah ɓahri se, Zezu ɓa nzuk ké puh lakna Eroɗ le, ke pih ni si hi̧ Eroɗ.
8Eroɗ ba, lah nzukri ɗi riŋ Zezu doro-u ɗi-ɗih, mí ɗaka ɓay ko Zezu laɓ ni. Ke ko Zezu bale, law ye rih ni keɗ keɗ. Ke ker ɓahri se, ko ya le, Zezu ɓay laɓ fe saŋ hi̧ ni ké ko. 9Ke vbi Zezu ɓayri mah fe, mí Zezu fer ɓay mbew ya.
10Ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ƴo ri pi. Ku goh ni ke ɓay zekre zekre. 11Eroɗ ke soze yeri mgba Zezu ɓa kɔk nzuk. Ku sak ni, ku ndoh ni mah gar mbay a ndu̧yu mgbelek mgbelek, mí ku el pih ni si hi̧ Pilaɗ ra ɓáy.
12Ke seh-u-aw mí Eroɗ ke Pilaɗ mgba nzak nzaw el ti̧h ɓa ya̧hri.
13-14Pilaɗ ɗi ŋgernzuk fe puhna Ŋgerzahri ke ŋgernzuk gun Izarayelri ke nzuk puh woiri ziɓri, gbam mbu̧h hani. Ke el ɓah hi̧ niri ɓahri : « I maŋ nzukay gi keni hi̧ mi. I ɓahri se, ke ƴo gbur puh woiri. Í te wuri suk. Ké nun woiri-ay, mi fakla ɓayu, mí-i ziŋ suya mgba tul ye mbew ya. Ɓayu ta kandɔk ké i goh ni ra ya. 15Eroɗ kara ziŋ suya mbew ya pi. Ɓayu mí ke el pih ni gi hi̧ na. Í lah wuri ɓayay. Nzukay laɓ fe mbew ké mah hul ya. 16Kaŋ dale mi zór ni dara mí-i póŋ ni ɓáy. »
17 # 23.17 Mbete sa̧w nzak gerek ɓa ŋgi̧-u ta ke gun gel ki̧na 17 ya. 18Mí ku vba̧ nzak gɔm ɓahri : « Ɓá ɔr gun wo̧ro-aw hak síɓa, ɓá sel Bar-Abba. »
19Bar-Abba ra ke na vul mgbal ɓay ŋgermu ké-e ruh gbur keni puh hi̧ ŋgomna. Ke i hul pi.
20Mí Pilaɗ el ɓah ɓay ra ziŋ nzukri-aw, kú poŋ Zezu ɓá tɔr. 21Mí ku ur ke ɓay gbaw gbaw : « Ɓar ni ɓar gaŋ, ɓar ni ɓar gaŋ. »
22Pilaɗ ba, el ɓah a bɔk sayu hi̧ niri : « Ɓá ɓar ni ɓay tul fe le ? Suya fe gaŋ mí ke laɓ le wo ? Mi ko salɓay hul ké mgba tul ye ya. Kaŋ dale mi zór ni dara mí-i póŋ ni ɓáy. »
23Mí ku ɓer ɓay ke kusol a mgbe-u ɓahri, ɓar ni ɓar gaŋ. Ɓay woyri-aw mba Pilaɗ mba-mba. 24Mí Pilaɗ mbi ɓay woyri kandɔk kú-u ger ɓayu. 25Nzukbaa ŋgomna ké gbur puh, ké i nzukri ra, ke sel ni kandɔk kú-u yih tul ye, mí ke el ndoh Zezu ndɔk sozeri ɓá laɓ ni kandɔk kú-u vbi.
26Kandɔkaw mí sozeri mgba Zezu si ma gel-ɓar ni. Simu ké Siren ur ke kala gi ma Zurusalem. Sozeri to ni, mí hah ni ke suk kpuh vbatay hul Zezu dih keni fal ye.
27Daɓa nzukri ɓa ŋgi̧-u si fal ye. Wu̧yri vba̧ haŋ woyri zaɗ zaɗ vuh rew keni. 28Mí Zezu sɔɓ nun ma tul woyri, ke ɓahri : « Wu̧y Zurusalemri, í vuh ɓay bi ya. Í vuh wuri ɓay mun woiri ke gun woiri ma. 29Ɓay fe le í ko, nam ƴo gina ké nzukri ɓay ɓahri, pol tehna ɓa nzuku a mahtuhri, ɓil a a̧yri ké tu mbuŋna ya, pam a a̧yri ké gun nzo ya. 30Ur ke seh-u-aw mí nzukri ɓay ɓahri : Kasaw, mú dir ku̧ tul wah. Kpar, mú pɔr na#23.30 Ɓayay na ɓil Mbete Osée 10.8..
31Ɓay fe le aŋay ké kpuh ɓa pa̧wu kú-u laɓ sam fe laɓna-ay, sa̧wseh ké kpuh ho̧k da wa, ɓay na ani ɓáy le ? »
32Sozeri maŋ nzuk suyari seɗe dɔm tul Zezu si keni ma gel-ɓar niri. 33Gel ra ku ɗi ɓa Gbogbotul. Ku ka̧h, mí ku ɓar Zezu ké tul kpuh vbatay. Ku ɓar nzuk suya a mbewu ké fál ndɔk lakna Zezu, nzuk a seɗe-u ba, ké fál ndɔk kperu ye. 34#23.34 Nzuk goso fe tuna sa̧w nzak ɓahri se, Mbete Luk ta ke ɓayay ya : Zezu el goŋ Bah ye ɓahri : « Baah, mú lu salɓay suya ké tul woyri. Ku tu fe kú-u ƴo laɓu ya. » Sozeri fa̧h gar ye kehr ku̧ ke gelu gelu, mí ku nda ɓele keni#23.34 Í mgba Mbete Siŋ (Psaumes) 22.18 tuh ke gel ki̧na-ay..
35Nzukri ƴo, ku ƴo ko kona. Ŋgernzuk woyri gun Izarayelri kara sak ni le, el sak ni ra ɓáy eŋ kɔk nzuk ɓahri, nzuku-ay ya̧ nzukri ya̧. Ŋgerzah mbi ra ni ɓa Ŋgermbay gaŋ le, ké ya̧ mun ye. 36Sozeri kara sak ni sa-sak. 37Ku ndar yim a su̧h-u kan nzak ye, mí ku ɓahri : « A wo-ay, mu ɓa ra mbay ziɓri ɓa ketina gaŋ le, mú ya̧ mun wo. »
38Gbekre kú-u vbeh fe salɓay hul kan ri, ku ɓar fál síɓa tul ye. Salɓayu vbeh kandɔkay : mbay ziɓri mí na-ay.
39Nzuk suya a mbewu kú-u ɓar ni ƴo fah Zezu. Ke ɓahri : « A wo mú-u ɓa Ŋgermbay, kaŋ ya le wo ? Mú ya̧ mun wo, mú ya̧ na pi. »
40Mí nzuk a seɗe-u zɔm mbaŋ ye ra ɓahri : « Hȩkme Ŋgerzah ta nun wo ya lo ? A wah le mbɔl hul ké na tul wah, mí nah puh ziŋ ni pi-ay ? 41Salɓay kú-u kuŋ ké tul wah ɓa ketina, kpaŋndɔk pihna wah mí nah ziŋay. A ye ba, fe laɓna ye mbew ké si gelu ya ra ta-a. »
42Mí ke el ɓah ɓayay hi̧ Zezu ɓahri : « Zezu, seh-u ké mu mbi gel kaɓna wo ɓa Ŋgermbay le, mú yȩkre mi ya. »
43Zezu ɓah hi̧ ni ɓahri : « Ketina mi yȩ́kre mu ya. Mi ƴo ɓah ɓayay hi̧ mu, guri-ay gaŋ mí mu káɓ ziŋ mi ké tusiɓa a suki. »
44-45Seh ƴo tul puh bale, tirima ya̧ gel ké tusiɓa gbam kpu̧ru ka̧h sa̧wseh say bɔklew. Seh zaŋ mba ba, baw gar a yih-u ké kuŋ gel ƴona Ŋgerzah ɓil vul kani gɔh tir ké haŋsekle#23.44-45 Ɓay gar ké kuŋ kona gel ƴona Ŋgerzah ɓil vul kani Ŋgerzah, í ki̧ Mbete Exode mah-u 26 ur ke gel ki̧na 31. Ɓayu na ɓil Mbete Lévitique 21.23 ke 24.3 pi. Nzuk goso fe tuna mbete Ŋgerzah a ɓoruri ɓahri, gar ké gɔh ra ɓa gar a ké nzakful vul kani Ŋgerzah. Ɓay tu ɓay gar a ké nzakful vul kani Ŋgerzah, í ki̧ Mbete Exode 26.37 ke 38.18 ke Mbete Nombres 3.26. Í ki̧ Mbete Ebereri 6.19; 9.3; 10.20 pi.. 46Zezu vba̧ nzak ɓeleŋ, mí ke ɓahri : « Baah, mi poŋ tem bi kan ndɔk wo. »
Ké-e ɓah kaŋ ra, ke ɗer haŋ fo̧h mí hi̧ law ye toh.
47Kumandah ɓá ko fe ké kal le, ke dim Ŋgerzah ɓahri : « Ɓa munɓay, nzukay ƴo mbew ziŋ Ŋgerzah gaŋ. »
48Daɓa nzukri ké mbu̧h ri, kú-u ko feri ké kal, ku el vba̧ haŋ woyri zaɗ zaɗ tɔr keni si puh woyri puh woyri. 49Nzukri ké ƴo ziŋ Zezu ba, ku ƴo ɓa ɗih-u ké gel-ɓar ni. Wu̧yri ké ɓaŋ ni ur ke Galile sa̧ ra ƴo ko feri ké kalaw pi.
50-51Nzuk a hani-u mbew ƴo ri. Riŋ ye ɓa Zezeɓ ké Arimate ké tusiɓa Zude, ke ɓa nzuk lawsuki, ke tu Ŋgerzah ɓa záh ye, mí ke ɓaŋ law ye te tul lák mbay Ŋgerzah. A ye ra ke ƴo haŋsekle ŋgernzuk-kuŋ salɓayri, mí ke mbu̧h nzak ye ɓil salɓay hul kú-u kuŋ kan tul Zezu ra ya. 52Ke si ta̧w Pilaɗ, mí ke vbi ni hul Zezu, 53mí ke si ɗer hul Zezu, ke el kuh hulu ke ladara a taŋ fi̧nak fi̧nak. Mí ke si mbek ké ɓil hoh kasaw kú-u fel lewsa̧ ɓay mbek hulri ɓilu. Hoh-u ku mbek ri hul mbew ya ɓáy#23.53 Ziɓri ké ɓa nzuk a lukiri mí mbek hul woyri ké ɓil hoh kasaw kú-u ɗeh. . 54Namu-aw ɓa nam a titilu ɓil nam ti̧hmbih-i guy buma. Mí seh na nzȩh ɓay riŋna ɓa titil nam a seɗe-u. Nam a seɗe-u ra ɓa baw nam ɔkna. 55Wu̧y Galileri ké ƴo dih fal Zezu, ku yih ɓay ko gel a suŋ mí Zezeɓri ɓay mbek hulu, mí ku si fal woyri ka̧h hoh kasaw-mbek hulri ko. 56Ku el si puh, mí ku lek num-nu̧h hul ke sa̧wkpuh ké ba̧ri-u fu̧ buy buy. Kaŋ mí ku ɔk mun woyri ke baw nam ɔkna ti̧hmbih-u kandɔk ké bolkusol Ŋgerzah sɔk.
Zvasarudzwa nguva ino
Mbete Luk 23: SIAFNK
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Wycliffe Bible Translators, Inc. All rights reserved.