Juɛl a pwɔdɛn tɛ Mak 13
13
1TƐ wun atɛn ta tempal, minɛ botɛn a ciɛlɔ gɔkjɛn Eke ti: Minɛ lotɛ, gwɔlɛ, gwiy a nɛnɛ ɔci ɣon a nɛnɛ ɣeyɛn ballɛ a ɔki! 2Ɔci Yecu gɔkjɛn eke ti: I gɔrtɛ ɣorgɛ a tolɛn a nɛnɛ? ɣorgɛ noŋdɛ dɛmdɛ, ɔci gwiy dɛmdɛ wakɛnda, aginɛ yɔdɛ bawɛ.
3Ɔci tɛ Eke cocɛn pom ti, pom Ɔliba tɛ tempal taŋɛ ti, Peter ɔci Jakob ɔci Jɔn ɔci Andru pokɛn tocɛn Yecu ti: 4Ɔn myitkɛ, wakɛ ɔŋ naŋɛn nɛ tuwɛ? ɔci wakɛ a nɛnɛ noŋdɛ bɛyɛ yowɛrtin ikin a ɔki? 5Ɔci Yecu noŋɛ gɔkjɛn eken ti: Waŋ tiicɛ, dalɛ minɛ lɔdɛ ɣɛke ɔntɔ bɛ. 6Makɛ coŋɛn bɛdɛ tɛ yintɛ Ya, gɔktɛ, Ya a minɛ; ɔci makɛ a coŋɛn edɛn ɔntɔ amam. 7Ɔci tɛ ɣɛke tiŋdɛ lakɛ ballɛ, ɔci juɛl lakɛ ballɛ, na yumgɛn yaidɛ bɛ: dalɛ nɛnɛ agdɛ bɛdɛn; ɔci tɛra badɛ min bɛ. 8Ɔci ma a ciɛlɔ jɔŋdɛ nhogdɛ makɛ pokɛn, ɔci ken a ciɛlɔ nhogdɛ kɛn a pokɛn: ɔci tɛra noŋdɛ wupɛ tɛ non a coŋɛn; ɔci konyɛ bɛdɛ tɛ bunkɛ a coŋɛn: nɛnɛ akɛ jɔcɛn tɛ yanɛn.
9Waŋ tiicɛ tɛ wakɛ ɣɛke: ma muktɛn ɣɛke ɔci ɣɛke edɛn agdɛ noŋdɛ gadiya; ɔci ɣɛke dwɔdɛn tɛ cinagog; ɔci ɣɛke akɛ yɔdɛn tɛ mudir nyamɔ ti ɔci melek nyamɔ ti tha Ya, aŋkɛ ma gɔrcɛ jithɛ ballɛ ɣɛke ti. 10Ɔci juɛl a pwɔdɛn tɛ Yecu Kitho akɛ myinɛn tɛ ma bunkɛ warɛda. 11Ɔci tɛ ɣɛke edɛ ma gadiya ti, ɔci ɣɛke mwugɛn kan, na bwɔdɛ bɛ tha juɛl akɛ gwɔgdɛn: tɛ ɣoŋ a nɛnɛ juɛl a gwɔktɛ ballɛ tɛ ɣɛke akɛ gɔktɛ: minɛ a gɔktɛ a ɣɛke bɛ, a minɛ Boŋ a Bɔwɛn. 12Ɔci minɛ mugdɛ mod eken akɛ nhugdɛ, ɔci wegen mugdɛ kacɛ eke akɛ nhugdɛ; ɔci kegen nhowɛ wegen ɔci megen, akɛ ma nhugdɛn. 13Ɔci ma lonyɛ ɣɛke ti nɛ penyɛn tɛ yintɛ Ya: dalɛ minɛ a yaddɛ a yannɛ, eke yuɔdɛ dokɛ.
14Ɔci tɛ ɣoŋ ɣɛke gɔrcɛ minɛ yayɛn a yɛyɛn, minɛ a nhogdɛ wan, yɔdɛ tɛ non a yayɛn ikin ti (minɛ wɛragɛ yowɛrnɛ nhijɛn), dalɛ ma ballɛ tɛ Judaya yuŋdɛ pom jidɛn: 15ɔci dalɛ minɛ ballɛ ɣon winyu ti kacɛn inyu, otɛn kacɛ ɣora bɛ, akɛ wakɛ edɛ bɛ: 16ɔci minɛ ballɛ bal ji, dɔkɛ ban ji bɛ, akɛ buruŋ edɛ bɛ. 17Ɔci mongɛ lɛcɛ tɛ ɣoŋ a nɛnɛ a pwɔdɛ bɛ, ɔci mongɛ kacɛ ballɛ tɛ biŋkɛ a pwɔdɛn bɛ. 18Ɔci cɔkɛ minɛ ti akɛ ɣoŋ a nɛnɛ bɛdɛn tɛ jwɔm a luwɛ bɛ. 19Tɛ ɣoŋkɛ a nɛntɛ ma yanɛ a yadɛ nɛ penyɛn, wakɛ ɔŋ yowɛrnɛ ma nyamɔ bɛ, tɛ ɣoŋ Juɔŋ a Tolɛn jɔcɛn tɛ cɔndɛ wakɛ yanɛ ballɛ ɔŋ bɛ, ɔci na wutɛ ɣoŋgɛti bɛ. 20Kan Ciagɔn Tolɛn noŋɛ ɣoŋkɛ a nɛnɛ aŋkɛ badɛ bɛ, makɛ wakɛ a yoŋ yɔdɛ bɛ: ɔci tha makɛ yowɛrnɛn Juɔŋ a Tolɛn, makɛ mwugɛ Eke, ɣoŋkɛ badɛ tɛ eken. 21Wontɛ kan minɛ gɔktɛ ɣɛke ti, Dalɛ Kitho ballɛ wɛni; ɔci dalɛ Kitho ballɛ aŋan; na jithɛ bɛ: makɛ labɛn a coŋɛn ballɛ bɛdɛn, gɔkjɛn, 22eken bɛnɛ ta Juɔŋ a Tolɛn, ɔci makɛ noŋdɛ nebi tɛ labjɛn, ɔci noŋdɛ wakɛ a tɛyɛn, aŋkɛ ma punɛn, ɔci ma edɛn ɔntɔ amam, ɔci noŋdɛ mugdɛ makɛ yowɛrnɛn Juɔŋ a Tolɛn. 23Waŋ tiicɛ: gwɔlɛ, Ya minɛ ɣɛke tɛ juɛl wakɛnda tɛ nyamɔ.
24Tɛ ɣoŋkɛ a nɛnɛ, tɛ yanɛ badɛ, ɣoŋ waŋ akɛ ɣolɛn, ɔci pan akɛ diɛgdɛ bɛ, 25ɔci keltɛn dɛmɛn ta nyalɔ, ɔci wakɛ tɛyɛn ballɛ nyalɔ noŋdɛ wupɛ. 26Ɔci wontɛ ma gɔrcɛ Minɛ Tɔl Maban bɛyɛn puɔlɛ ji yakɛn aginɛ tɛyɛn a tɛyɛn ɔci aginɛ pwɔnɛn a pwɔnɛn. 27Ɔci wontɛ Eke cwonɛ makɛ enjel akɛ dɔldɛ makɛ yowɛrnɛn Juɔŋ a Tolɛn ta non jwɔm ŋwoykɛ ti a ŋanɔ ta tɛra twuŋkɛ ti, ta puɔlɛ twuŋkɛ ti.
28Aca nɛntɛ gɔrcɛ jan kɔba aŋkɛ laltɛn tɛ parabɔl: tɛ kerkɛ wonɛ yulkɛn, ɔci aamkɛ ballɛ wonɛn, can jidɛn ballɛ bɛyɛn, nhijɛn ɣɛke. 29Dalɛ ɔŋ, tɛ ɣɛke gɔrcɛn wakɛ nɛnɛ naŋkɛn, minɛ ballɛ bɛyɛ, ballɛ toka ti, nhijɛn ɣɛke. 30Ya gɔkɛ ɣɛke ti a warɛ, kegen aca tuwɛ nyamɔ bɛ, wakɛ nɛnɛ naŋdɛ kan. 31Puɔlɛ nyalɔ yakɛn tɛra akɛ badɛ: ɔci juɛl Ya aŋkɛ badɛ bɛ. 32Ɔci ɣoŋ a nɛnɛ ɔci car a nɛnɛ nhijɛn minɛ bɛ, kwiyɛ makɛ enjel nyalɔ daŋkɛn, kwiyɛ Kacɛ Juɔŋ a Tolɛn, aŋkɛ nhijɛn Wegen parɛ. 33Waŋ tiicɛ, cocɛ tɛɛtɛ ɔci cɔkɛ Juɔŋ a Tolɛn ti: ɣoŋ a nɛnɛ kwiyɛ ɣɛke. 34Ballɛ ba minɛ, ban dulɛn, atɛ ciyɛ ban a parɛ, ɔci gɔkjɛn kɛngɔn eke ti aŋkɛ minɛ da noŋdɛ kaŋŋɛ eke, minɛ da noŋdɛ kaŋŋɛ eke, ɔci gɔkjɛn minɛ gɔrcɛ ban ji akɛ eke cocɛn tɛɛtɛ. 35Aŋkɛ cocɛn tɛɛtɛ, tɛ ɣoŋ ban wegen dɔktɛn nhijɛn ɣɛke bɛ; kan eke bɛyɛ tɛ ɣoŋ ɣocɛn, walɛ bɛdɛn tɛ wɛn ji, walɛ bɛdɛn tɛ kɔkɛ lilkɔ, walɛ bɛdɛn tɛ lidɔ; 36aŋkɛ bɛdɛn liedɛ eke mɔktɛn ɣɛke wicɛn. 37Ɔci juɛl a gwɔŋɛ Ya ɣɛke ti Ya gɔkjɛ ma ti wakɛnda: Cocɛ tɛɛtɛ.
Zvasarudzwa nguva ino
Juɛl a pwɔdɛn tɛ Mak 13: MFZ1947
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
First published by British and Foreign Bible Society in 1947.