मरकुस 5
5
देय्यम पीतोन बेस कियमळ
(मत्तयाल 8:28-34; लूकाल 8:26-39)
1अस्के ओर समुद्रमता हब्बेटा बाजुंक मनना गिरासेन इनना एरियक एव्तुर. 2येसु डोंगाताल रेयतस्के वरोर देय्यम पीता मनकल तापळन बोग्ळाताहेंदाल वासि येसुंक कलियतोर. 3-4ओन बच्चुंगो मल्कां बेडिने, गोल्सुकुने दोहचि वाटतुर, गानि ओर बेडिन उराहचि पोहतोर, गोल्सुकुन नेम्हाचि पोहतोर. ओन बोरे आपा पराहिल्लुर. ओर तापळानेन मनुंदुर, ओन बोरे गोल्सुकुने दोहा पराकोंदुर. 5ओर नर्का-पिय्यल तापळाने, गुट्टाने तिरियसेक वरगेयसेक मनुंदुर. ओनद ओरे बंडाने कोह्ककुंचि नोप्पिं कीकुंनुंदुर.
6ओर लक्कुटाले येसुन हूळसि, विच्चि वासि ओना काल्क मोळ्कतोर. 7-8अस्के, “ओनागटाल पलाते पेय्सा,” इंचि येसु आ मनकन पीता देय्यमतुन इत्तोर. अदुनहाटीं ओर येसुन, “ए अन्निटकन्ना पेद्दा पेनदा मर्रि येसु, नातोनि नीकु बता कबळ? निमे नाकुन तकलिप किय्योन इंचि पेनदा ओट्टु तिंचि वेहा,” इंचि जोरसे वरगेयसि इत्तोर. 9मर्रा, “नीवा पोरोल बतल?” इंचि येसु पूसकीतोर. अस्के ओनालोप्पो मत्ता देय्यम, “मोमोट वेल्लेन मंदा आसि मंतोम, इंचि नावा पोरोल ‘मंदा’ आंद,” इल्हा जवाब हीता. 10ओनालोप्पो मत्ता देय्याल्क, “माकुन इद एरियाताल पलाते गेदुममा,” इंचि येसुन बच्चोरो विनंति कीतां. 11अद वेलाते गुट्टा पक्काते पद्दिना मंदा मेय्सेके मत्ता. 12पजा, “माकुन आ पद्दिना मंदाते होनाहीम,” इंचि आ देय्याल्क येसुन विनंति कीतां. 13अस्के येसु अवुन होना वेहतोर अय्ते, आ देय्याल्क ओनागटाल पेय्सि पद्दिना मंदाते होत्तां. अव पद्दिं रोंडु वेयकुनदाका मत्तां. पजा आ पद्दिना मंदा समुद्रम ओड्डुन पोर्रोटाल हिळतुक वित्सि समुद्रमते मुळ्गिसि हासोत्तां.
14अद हूळसि पद्दिं मेहानोर वित्सि होंचि, सहरते, पक्का पीसि मत्ता नाह्कुने अगा जर्गतद वेहतुर. अस्के आ देय्याल्क पीतोरद बतल आता इंचि लोकुल्क हूळालय अगा वातुर. 15येसुनगा वासि हूळतुर अय्ते, देय्याल्क पीसि मत्ता मनकल पुरागा बेस आसि, कपडिं केर्सि उद्दिसि मत्तद ओर्क दिसतोर. अल्हा मत्तद हूळसि ओर्क वेर्रे दल्गता. 16येसुना कबाह्कुन हूळतोर अगा बोर अय्ते मत्तुरो ओर, देय्याल्क पीसि मत्ता मनकल बल्हा बेस आतोर, पद्दिंक बल्हा-बतल आता इवन्नि पोल्लें लोकुल्कुंक वेहतुर. 17इवन्नि पोल्लें केंजसि, “निमे मा एरियाताल पेय्सि होन,” इंचि लोकुल्क येसुन विनंति कियालय दल्गतुर.
18अस्के येसु होनालय डोंगाते उदसेके मननेंके, देय्याल्कुनाल बेस आता मनकल वासि, “नाकुन नीवातोनि वाया हीम,” इंचि येसुन विनंति कीतोर. 19गानि येसु ओप्कुन्ना हिल्लोर, “सामि नीपोर्रो दया कीसि नीहाटीं बल्हा बतल कीतोरो, लोन होंचि नीवा लोतोर्कुंक इंचि वेहा,” इंचि इत्तोर. 20अय्ते ओर मनकल अगटाल देकापोलिस एरियाते होंचि, येसु ओनाहाटीं बतल-बतल कीतोरो अव अन्नि पोल्लें वेहालय दल्गतोर. अद केंजसि अंटोर इचंत्रम आतुर.
उंदि मुरतटुन बेस कियमळ
(मत्तयाल 9:18-26; लूकाल 8:40-56)
21येसु डोंगाते उद्दिसि समुद्रमता हब्बेटा ओड्डुंक मर्रा मल्सि होत्तोर. ओन हूळसि वेल्लेटुर लोकुल्क ओनगा जमा आतुर. ओर समुद्रम ओड्डुनगा मत्तोर. 22अस्के दर्मसास्त्रम कराहना लोता वरोर याईर पोरोलतोर अदिकारि येसुनगा वातोर. वासि ओना काल्कुनपोर्रो अर्सि, 23“नावा सिन्ना मिय्यड बेस हिलाका हायनाल आसि मंता. निमे वासि दानपोर्रो कय इरते, अद बेस आसि दाना जीवा पिस्संता,” इंचि विनंति कीतोर. 24येसु आ अदिकारिनतोनि होत्तोर. ओना पज्जो वेल्लेन मंदि पेय्सि ओना सुट्टु वेल्ले गर्दि कीसि पोर्रो-पोर्रो अर्रालय आयुंदुर. 25आ गर्दिते पन्नेंड वर्सानाल उंदेतीर कप्पिड आयना उंदि मुरतळ मत्ता. 26अद वेल्लेटुर वैदकुल्कुंक हुपिस्ता. दानगा मत्ता कोत्तांता मार्तां गानि दाना बिमार बेस आयाका एक्कोने आसेके होत्ता. इल्हा अद वेल्लेने तकलिप बोगांचेक मत्ता. 27-28अद मुरतळ येसुना बारेमते केंजसि मत्ता. दाना मनसुने, “नना सिराप येसुना कप्पिडतुन इट्टिनागानि बेस आंतन,” इंचि इनकुत्ता. अदुनहाटीं गर्दिते येसुना पज्जो वासि ओना कप्पिडतुन इट्ता. 29इट्ता इट्टुडे दाना कप्पिड आयमळ बंद आसि बिमार बेस आता इंचि दानकु अनपिस्ता.
30अदे वेलाते येसुंक ओना लोप्पोटाल ताकत पेय्सता इंचि अनपिस्ता. अस्के पज्जो मल्सि, “नावा कपडितुन बोर इटतुर?” इंचि येसु पूसकीतोर. 31ओना सिस्युल्कु ओन, “गर्दिते लोकुल्क वरोनपोर्रो-वरोर अर्रानद निमे हूळसेक मंचिगुडा, नावा कपडितुन बोर इटतुर? इंचि पूसकीसेके मंतिन,” इंचि इत्तुर. 32गानि, “नाकुन बोरन्ना इटसि मंदगोम,” इंचि येसु अंटोरहेके हूळसेक मत्तोर. 33अस्के अद मुरतळकु, बेस आतद तेळियताहाटीं, वेर्रेक वनकुसेक येसुनगा वासि ओना काल्कुना पोर्रो अर्सि अगा जर्गतद सत्तेम-सत्तेम वेहता. 34अस्के येसु आ मुर्ताटुन, “पेगिटुना, नीवा विस्वासमे नीकुन बेस कीता. इसोंटा बिमार मर्रा बस्केने वायो, सांतिते होन,” इंचि इत्तोर.
येसु हाता पेगिटुन जीवा अरहमळ
35येसु अल्हा वळ्कसेक मननेंके, दर्मसास्त्रम कराहना लोता आ अदिकारिना लोताल इच्चुर लोकुल्क वासि, “नीवा मिय्यड हाता, इंदके गुरुन तकलिप कियमा,” इंचि वेहतुर. 36ओर वळ्कानदुन केंजवाप कीसि येसु आ दर्मसास्त्रम कराहना लोता अदिकारिनतोनि, “निमे वेरियमा, विस्वासम इर्रा,” इंचि इत्तोर. 37येसु अगटाल पेय्सनेंके पत्रुन, याकोबुन आनि याकोबुना तम्मुर योहानुन ओनतोनि पीकुत्तोर. ओर्क तप्पा बोने ओना पज्जो वाया हिया हिल्लोर. 38ओर दर्मसास्त्रम कराहना लोता अदिकारिना लोन होत्तस्के अगा लोकुल्क इरगा अळानद, मोत्कुनानद हूळतोर. 39अस्के येसु लोप्पो होळियसि, “मिमेट अडमळ-मोत्कुनमळ बारि कीसेक मंतिर? अद पेगिळ हाया हिल्ले, मींडसि मंता,” इंचि इत्तोर. 40अल्हा इत्तद केंजसि ओर येसुन कव्तुर. गानि येसु ओर अंटोर्कुन पलाते लोहतोर. पेगिटा तल्लुर-बाबोन, ओनतोनि बोर अय्ते मत्तुर ओर्कुन पीकुंचि पेगिड मींडसि मत्ता अर्राते होत्तोर. 41होंचि अद पेगिटा कयदुन पीसि, “तलिता कुम” इंचि इत्तोर. इत्ते, “पेगिटुना, नना वेहासेक, तेदा!” इंचि अर्तम. 42अल्हा इत्ता इनुडे, आ पन्नेंड वर्साना पेगिड तेदिस ताकालय दल्गता. अदुन हूळसि, अगा मत्तोर वेल्लेन इचंत्रम आतुर. 43“इगे जर्गतद बोर्के तेळिया मनि” इंचि ओर्कु गट्टिगा हुकुम हीतोर. पजा “अद पेगिड्क बतलन्ना तिनालय हीम्टु,” इंचि वेहतोर.
Zvasarudzwa nguva ino
मरकुस 5: ESG
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Wycliffe Bible Translators, Inc. All rights reserved.