SIONE 13
13
I Jisas mo kwisomi na garu na nona ngwalagelo
1A rani mo maravuti hinea mavukona a Kanikani* na Tivekiana nona gwaloana noi Isrel*. I Jisas u kikilai vunu ba kwara a tarona u maravuti vae ne tiraki na varamana ne mule hake taliku vaki mai Tamana. Tigwaravu u lagwa mana nona tangaloi hinea rau hugu lo varamana, vae u tuku lagwa maira vaki tuai, mo vanovano mo tiraki na maurianana hurira. #a Mat 26.45; Mak 14.41; Sione 12.23; 17.1; b Sione 16.28
2I Jisas mana nona ngwalagelo rau kanikani tabulutaki. I Setano* u boloki ba lolo domi i Sutas Iskariot, i natu i Saemon, kwara ne tiraki Jisas tilo kaba na nona tavaluivuro. #Luk 22.3; Sione 13.27 3I Jisas u kikilai vunu ba kwara i Tamana u tau vunuvunuhi na kinau tilo kabana, vake u kikilai u rovo ba kwara u vanamai ti God vunu ne mule taliku vaki mai God. #a Mat 11.27; Luk 10.22; Sione 3.35; b Sione 16.28 4Hikani i Jisas mo maraka tina tevo, mo teri na lugwana tavalavarea mo taura, vunu mo lavi na tauele mo baribarikinia. 5Vunu mo lavi na disi mo lilingi na kwai tilolona, mo tinakaki mo kwisomi* na garu na nona ngwalagelo, vunu mo kwasu mamahaki na garuga kina tauele hi mo baribarikinia. #Luk 7.44; Sione 12.3 6Mo vanamai vaki mai Saemon Pita, i Pita mo kwaha maia mo viti “?Hugwe*, ku vai kwara kona kwisomi na garugu?”
7I Jisas mo daraki lakwae mo viti kwara, “Hika lai nga kohe kikilai tea kwara nu vai a havakinau, vae konari kikilai vaki takuni.” #Sione 13.12
8I Pita mo viti lakwae viti, “!Hete vohoki! !Konahe kwisomi na garugu tea!”
I Jisas mo viti kwara, “Diko nahe kwisomi na garumu tea, i nigo vae konahe kwareki te nogu ngwalagelo.”
9I Saemon Pita mo viti lakwae kwara, “Hugwe. Diko kwehi, ko hatu kwisomi na garugu kehekeheki, vae ko kwisomi na kabagu mana gwatugu vake.”
10I Jisas mo kwaha maia mo viti kwara, “Ihe hi u ngwada ba, nehe kwisomi na tarabehina doluaki te taliku. U ngwasara ba. Vae aia neri kwisomi kehekeheki na garuna taliku. I kamu vunu tulu ngwasara, vae katukwale tikamu he ngwasara tea.” #Sione 15.3 11I Jisas u kikilai vunu ba kwara vae katukwale tiura ne tirakinia tilo kaba na nona tavaluivuro. Vae huri hi, mo viti kwara, “I kamu vunu tulu ngwasara, vae katukwale tikamu he ngwasara tea.” #Sione 6.64,70-71
12I Jisas mo kwisomi na garuga mo rovo, vunu mo lugwaki na lugwana taliku mo halebohi mo hugu taliku mana tevo. Mo uduhuri kinira kwara, “?I kamu tulu kikilai na kinau hika nomo vaia lakwakamu hika? #Mat 28.8,10 13I kamu tulu kwarekiau kwara i nau a Tisa, vunu vake kwara i nau a Hugwe. Tulu kwarekiau kwehi u bakoto, huri i nau a nomiu Tisa, vunu vake a nomiu Hugwe. 14I nau a nomiu Hugwe, vake a nomiu Tisa, vae nu kwiso garumiu. Vae i kamu vake tulu ne kwisokwiso garumiu. #a Luk 22.27; b Mat 20.28; 1 Tim 5.10 15I nau nu tau a tanoigaru lakwakamu kwara vae tulu ne vai a kinau hokinia hi nomo vai. #Vil 2.5; 1 Pita 2.21 16Kareaki na viti lakwakamu, hete tangaloi boloki kwara u lakua sileti na nona masi, hete kaihora na leo kwara u lakua sileti na nona tangaloi hinea mo horae. #Mat 10.24; Luk 6.40; Sione 15.20 17Hikani i kamu tulu kikilai na leo hika u rovo ba. Diko tulu ne boloki kwehi tigwaravu, vae ne havutikamu haburu. #Sem 1.25
18“I nau nohe viti tea hurikamu doluaki. Nu kikilaira aira hi nomo mataira. Vae a Uliuli* Kokona ne mule luna hi mo viti kwara, ‘A tangaloi aia hinea keru mo kanikani lo laha katukwale, vae ne vai vuro vovohiau.’ #Sam 41.9 19Hika nu viti lakwakamu tomuaki vunu neri mule luna, kwara vae lo taro hi ne mule luna tulu neri hauhuri kwara i nau i Tatoka. #13.19: I nau Tatoka. Kona tagai na leo hi lo savta 8.24 lo leo hinea evina halaradu. 20Kareaki na viti lakwakamu, ihe hi ne lai tabetabekinia hinea nomo horae, u lai tabetabekiau. Aia hinea u lai tabetabekiau, u lai tabetabekinia hinea mo horeau.” #Mat 10.40; Mak 9.37; Luk 9.48; 10.16
I Jisas mo viti terekaki kwara katukwale tiura ne tirakinia tilo kaba na nona tavaluivuro
(Mat 26.20-25; Mak 14.17-21; Luk 22.21-23)
21I Jisas mo viti kwehi mo rovo vunu mo rongo hati haburu lolo domina, mo kwaha taliku mo viti kwara, “Kareaki na viti lakwakamu, katukwale tikamu vae ne tirakiau tilo kaba na nogu tavaluivuro.” 22A nona ngwalagelo ramo tagataga harora, ramo lengalengakinia kwara i Jisas u viti ihe kwara vae ne tirakinia. 23Katukwale tina nona ngwalagelo, aia hi i Jisas u lagwa maia haburu, #13.23: A tangaloi rusa rau domi kareaki kwara a tangaloi hi i Jisas u lagwa maia haburu aia i Sione hinea mo uli na buku hika, vae u viti kwehi kwara ne tavunikinia sibona. Kona taga vake lui Sione 19.26, 35; 21.20. u hugu tavaluki maia. #Sione 19.26; 20.2; 21.7,20 24I Saemon Pita mo kwaha maia ki kabana mo viti kwara, “Ko uduhuri kinia kwara u tuku viti huri ihe.”
25Hikani a ngwalagelo hi mo olo vaki garagarani mai Jisas mo uduhuri kinia, mo viti “?Hugwe, ihe?” #Sione 21.20
26I Jisas mo daraki mo viti “Na tuli na mahigwai bereti* hika lolo suvu vae na betea lakwae. A tangaloi aia hi.” Hikani mo tuli na mahigwai bereti hini, mo betea lakwai Sutas i natu i Saemon Iskariot. 27I Sutas mo lavi na bereti hi, vunu heheriki i Setano* mo soro tilolo domina. I Jisas mo viti lakwae kwara, “Ku domi kwara kona vai aha ko vai heheri.” #Luk 22.3; Sione 13.2 28Aira hi rau hugu dali na tevo na kanikani, hete kwara te katukwale u kikilai utuhakinia kwara kworohokinia i Jisas mo viti na leo hi lakwae. 29I Sutas u tagahuri na noga mane*, vae a ngwalagelo noi Jisas ratuaki rau domi kwara i Jisas u hora i Sutas kwara ne va voli te hinaka vaki lolo kanikani, diko u viti lakwae kwara ne va bete te kinau lakwa na tangaloi hinea rau kakaravika. #Sione 12.6 30I Sutas mo lavi na bereti hi vunu mo soro heheriki tivarea. Hi u bongi ba.
A tulikileo karagwa
31I Sutas mo ngwalua tiura, vunu i Jisas mo viti kwara, “Hikani i nau a Natu* na Tangaloi nu tabe hakekiana vae luna hi i nau nu tabe hakeki na hina i God. 32Diko i nau nu tabe hakeki na hina i God, vae i God neri tabe hakekiau maia. Vae ne tabe hakekiau nehe tuai tea. #Sione 12.23; 17.1,5 33Raranatugu. Hika na hugu maikamu nehe tuai tea. I kamu tulu ne soro haroau, vae na viti lakwakamu hikani hokinia nu viti ba lakwa na kaitomuaki nona gwaloana noi Isrel* kwara, ‘I kamu tulu nehe vano lai te vaki lo vanua hinea i nau na vano eia.’ #Sione 7.33-34; 8.21 34A tulikileo karagwa i nau nu hilea lakwakamu u viti ‘Tulu lagwalagwa maikamu.’ Hokinia i nau nu lagwa maikamu, vae i kamu tulu ne lagwalagwa maikamu vake. #a Sione 15.12,17; 1 Sione 3.23; b 1 Sione 2.8; 2 Sione 5 35Diko i kamu tulu lagwalagwa maikamu, vunu a tangaloi doluaki ranari kikilai luna hi kwara i kamu a nogu ngwalagelo.” #1 Sione 3.14
I Jisas mo viti terekaki kwara i Pita ne herevunikinia
(Mat 26.31-35; Mak 14.27-31; Luk 22.31-34)
36I Saemon Pita mo uduhuri kinia kwara, “Hugwe*. ?Kona vano vaki ave?”
I Jisas mo daraki lakwae mo viti kwara, “I nigo konahe huri laviau tea hika vaki lo vanua hinea i nau na vano eia, vae konari huriau vaki takuni.” #a Sione 7.35; b Sione 7.34,36
37I Pita mo uduhuri kinia taliku mo viti “Hugwe. ?Kworoho hi nahe huri laviko te hika? I nau nu rarai kwara na mate huriko.”
38I Jisas mo daraki mo viti kwara, “?I nigo ko masinge kareaki kwara kona mate huriau? Kareaki na viti lakwako. A toa nehe tarere te radu nga vae i nigo kona herevunikiau vakaitolu kwara kohe kikilaiau tea.”
Zvasarudzwa nguva ino
SIONE 13: HWT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Havakinau New Testament © Bible Society of the South Pacific, 2016.