Jenesii̱s 11
11
Bi̱ tsꞌén kamánda ngo tarié ki̱a̱ na̱xi̱ńdá Babee̱l
1-2Kó ngije kijí xotaa̱ xtji̱e̱e̱n nínga fotjo tsꞌueé, kasakoo̱ ngo ngi̱ndie nínga són ki̱a̱ nangi Babilonia̱, kó ki̱a̱ kisꞌińdo. Kui ni̱xtjin jàn ta̱ ngo són én tsíchji̱a̱ ngayeje xotaa̱ kui nga̱sondiee̱. 3-4Kó ja̱kꞌi̱e̱ ja̱ngaján bi̱ katsoó xkjín:
«Si̱ꞌanda ngo na̱xi̱ńdáꞌniú ko̱jo ngo tarié, kó ngaskande nkꞌajmii̱ ngatjachó, bo̱a̱ tsꞌén nga xcha̱ndikónná, tsi bo̱a̱jín si̱ꞌán yàjín ñá tsi ngayeje nga̱sondiee̱ si̱ꞌantsojoboáná».
Kó kui xotaa̱ ítsꞌi̱yanii̱ kui xaá, sꞌe̱ ńdiekachján xi ti̱ kuii̱ katsꞌénda xi ndi̱jo̱ katsꞌén, kó tjingóxkjà ítꞌajo̱ni nga iskjininkꞌa xoó. 5Kó nga jatjajen Néná tꞌanangii̱ nga askotsijee̱n ni xi ndyi̱tsꞌènda xotaa̱, 6bi̱ katsó:
«Ta̱ ngo tsí má kui na̱xi̱ńdaá, kó ta̱ ngo són én xí chji̱a̱, kó jè ítsꞌi̱yanii̱ nga ndyi̱tsꞌèn kuí xaá, kó jmíjín xi ku̱i̱ꞌíchjaá nga sa̱ꞌín ni xi ndyi̱tsꞌènkjó. 7Ta̱sá tjianjayá, kó si̱ꞌantsobéjíi̱n én xí ndyi̱chji̱a̱ tsi̱ꞌe̱ nga ngojín xi ka̱makjiín ni xi ndyi̱chji̱a̱jo xkjín».
8-9Kó bo̱a̱ tsꞌén ki̱a̱ ítsꞌi̱yanii̱ Néná nga katsꞌéntsojoboa kui xotaa̱ ngayeje són nga̱sondiee̱, kó ijñátꞌiuá na̱xi̱ńdáꞌniú xí ndyi̱tsꞌènda katsaki. Ki̱a̱ boá nínga Néná katsꞌéntsobéjii̱n én xí tsíchji̱a̱ xotaa̱ ngayeje són nga̱sondiee̱, kuíni nga Babee̱l kiꞌmí kui na̱xi̱ńdaá.
Xota̱ tji̱e̱ xi kisꞌiee̱ See̱n
10Kuí bí xi̱ꞌbi̱ xi xota̱ tji̱e̱e̱ See̱n:
Kjiꞌanga kamá úchán noó See̱n kisꞌiee̱ ngo ndí xí Arfajaa̱nd kiꞌmí. Kui nii̱ xi kamá jó nó ngije kamá stsé xí ta̱nisién ꞌniú xí katsꞌénkjié nga̱sondiee̱. 11Kó See̱n kisꞌie ngasee̱ ndí xí xi̱ꞌin ko̱jo ndí xí ínchjín. Jaskan ngije katsen Arfajaa̱nd, See̱n ngi ún úchán nó kisꞌijña nga̱sondie.
12Kjiꞌanga kamá kantjiꞌún noó Arfajaa̱nd, kisꞌiee̱ ngo ndí xí Sélaa̱j kiꞌmí, 13kó kisꞌie ngasee̱ ndí xí xi̱ꞌin ko̱jo ndí xí ínchjín. Jaskan ngije katsen Sélaa̱j, Arfajaa̱nd ngi nijón úchán ko̱jo ján nó kisꞌijña nga̱sondie.
14Kjiꞌanga kamá kantié noó Sélaa̱j, kisꞌiee̱ ngo ndí xí Ebee̱r kiꞌmí, 15kó kisꞌie ngasee̱ ndí xí xi̱ꞌin ko̱jo ndí xí ínchjín. Jaskan ngije katsen Ebee̱r, Sélaa̱j ngi nijón úchán ko̱jo ján nó kisꞌijña nga̱sondie.
16Kjiꞌanga kamá kantié nijón noó Ebee̱r, kisꞌiee̱ ngo ndí xí Pelee̱j kiꞌmí, 17kó kisꞌie ngasee̱ ndí xí xi̱ꞌin ko̱jo ndí xí ínchjín. Jaskan ngije katsen Pelee̱j, Ebee̱r ngi nijón úchán ko̱jo kantié nó kisꞌijña nga̱sondie.
18Kjiꞌanga kamá kantié noó Pelee̱j, kisꞌiee̱ ngo ndí xí Reuu̱ kiꞌmí, 19kó kisꞌie ngasee̱ ndí xí xi̱ꞌin ko̱jo ndí xí ínchjín. Jaskan ngije katsen Reuu̱, Pelee̱j ngi jó úchán ko̱jo nijan nó kisꞌijña nga̱sondie.
20Kjiꞌanga kamá kantié jó noó Reuu̱ kisꞌiee̱ ngo ndí xí Seruu̱j kiꞌmí, 21kó kisꞌie ngasee̱ ndí xí xi̱ꞌin ko̱jo ndí xí ínchjín. Jaskan ngije katsen Seruu̱j, Reuu̱ ngi jó úchán ko̱jo yito nó kisꞌijña nga̱sondie.
22Kjiꞌanga kamá kantié noó Seruu̱j kisꞌiee̱ ngo ndí xí Najoo̱r kiꞌmí, 23kó kisꞌie ngasee̱ ndí xí xi̱ꞌin ko̱jo ndí xí ínchjín. Jaskan ngije katsen Najoo̱r, Seruu̱j ngi jó úchán nó kisꞌijña nga̱sondie.
24Kjiꞌanga kamá kan nijan noó Najoo̱r, kisꞌiee̱ ngo ndí xí Teraa̱j kiꞌmí, 25kó kisꞌie ngasee̱ ndí xí xi̱ꞌin ko̱jo ndí xí ínchjín. Jaskan ngije katsen Teraa̱j, Najoo̱r ngi úchán ko̱jo tjiꞌúnnijón nó kisꞌijña nga̱sondie.
26Kjiꞌanga kamá ichítié ko̱jo kan noó Teraa̱j, kisꞌiee̱ ján ndí: Abra̱n, ko̱jo Najoo̱r, ko̱jo Araa̱n.
Xota̱ tji̱e̱ xi kisꞌiee̱ Teraa̱j
27Kuí bí xi̱ꞌbi̱ xi xota̱ tji̱e̱e̱ Teraa̱j:
Teraa̱j boá xí kamá na̱ꞌmii̱ Abra̱n, ko̱jo Najoo̱r, ko̱jo Araa̱n.
Kó Araa̱n boá kuí xí kamá na̱ꞌmii̱ Loo̱t. 28Araa̱n ki̱a̱ kꞌien nangi nínga katsen, ki̱a̱ Uu̱r ngo ngi̱ndie xi chji̱a̱ni nangi Kalndea̱, kó ti̱ tikón ngase Teraa̱j na̱ꞌmii̱ Araa̱n nga kꞌien kui.
29-30Abra̱n kisꞌijñajo̱ ngo na̱ xi kiꞌmí na̱ Sarai̱ xi ndi̱ kamá kó jmí ndí kisꞌiejiín.
Kó Najoo̱r kisꞌijñajo̱ ngo na̱ xi kiꞌmí na̱ Milkaa̱, kui naa̱ tsa̱kji̱ín Araa̱n boá, kó Araa̱n kisꞌiee̱ ingo tsa̱kjìn xi na̱ Iskaa̱ kiꞌmí.
31Kó Teraa̱j jatjoni nangi Uu̱r ngo ngi̱ndie xi chji̱a̱ni nangi Kalndea̱, sꞌe̱ kijí xtji̱e̱e̱n nangi Kanaa̱n, kó nga jachó Araa̱n ki̱a̱ kisꞌijña kui ko̱jo Abra̱n ndií, ko̱jo ndíndee̱ xi Loo̱t kiꞌmí ko̱jo kja̱ndaa̱ xi na̱ Saraii̱ kiꞌmií. 32Kui ngi̱ndiee̱ kꞌien Teraa̱j nga kamá jó úchán ko̱jo ún noó.
Zvasarudzwa nguva ino
Jenesii̱s 11: MAIX
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014