Jeremiya 7:1-11

Iri ndiro izwi rakauya kuna Jeremiya richibva kuna Tenzi richiti, “Mira pasuo guru remba yaTenzi uzivise vanhu ipapo shoko iri, uti inzwai shoko raTenzi imi mose vokwaJudha munopinda napamisuo mikuru ino iyi muchindonamata Tenzi. Zvanzi naTenzi wehondo nehondo, iye Mwari weIsiraeri, ‘Gadziridzai nzira dzenyu nezviito zvenyu, iniwo ndipo pandichakuitai kuti mugare munzvimbo ino.’ Regai kuvimba namazwi aya anonyengedza muchingoti, ‘Iyi iTemberi yaTenzi, Temberi yaTenzi, Temberi yaTenzi.’ “Chiripo ndechokuti kana mukanyatsogadziridza nzira dzenyu namaitiro enyu, muchinyatsoitirana zvinhu zvine ruenzaniso mukaregawo kudzvanyirira muuyi kana nherera kana chirikadzi, kana zvokudeura ropa romunhu asina mhosva munzvimbo ino, uyewo kana mukakanda pasi zvokuteveredzana navamwe vamwari zvinokupinzai munhamo, ndopandichakuregai makagara munzvimbo ino, munyika yandakapa kare kumadzibaba enyu narini narini wose. “Chinzwai, izvozvi imi muri kungovimba namazwi anonyengedza zvisina chimuko. Mungati here imi maba, mauraya munhu, maita upombwe, mapika zvenhema, mapisira rusenzi kuna Bhaari matevedza vamwe vamwari vamusingazivi pedzepo mouya kuzomira pandiri muimba ino, imba inodaidzwa nezita rangu muchitoti zvenyu, ‘Takaponeswa isu,’ imi muchingoenderera mberi chete kuita zvinondisemesa zvose izvi? Ko iyo imba iyoyi inodaidzwa nezita rangu, mukuona kwenyu yatova bako remakororo nhai? Chinzwai, ini iyeni ndakatozviona, ndizvo zviri kutaura Tenzi.