Isaya 3
3
Nyonganyonga muJerusaremu
1Ndinodaro nokuti Tenzi
Tenzi wehondo nehondo
ava kubvisa muJerusaremu nemaJudha
zvose zvinovararamisa nezvinovatsigira zvinoti:
chokudya chose chinovararamisa,
nechokunwa chose chinovararamisa,
2negamba rose zvaro nomurwi wehondo wose
nomutongi wose nomuporofita wose zvake
nomushoperi wose zvake
nomunhu wose wechikuru
3uye nomutungamiriri wose
wechikwata chamakumi mashanu avarwi
nomubati wose wechigaro
uyewo gurukota rose zvaro
negodobori rose roun'anga
nenyanzvi yose yezvamazango.
4Ndichaita kuti vakomana zvavo
vave ndiwo madzishe avo
vatongwe nepwere.
5Vanhu vachabatisana pfumvu chaiyo,
munhu woga woga achidaro kuna mumwe wake
munhu wose achidaro kune waakagarisana naye
wechidiki oitira vakuru misikanzwa,
dzenga romunhu richidaro kune anoremekedzwa.
6Kana munhu akatora
mukoma kana munun'una
womumba achiti,
“Iwe unotova nechokupfeka zvako
ndiwe ungatova mutungamiriri wedu
uye murwi wamatongo uyu
utongwe newe zvako.”
7Pazuva iroro iye achadura pachena kuti,
“Handingave ini wokukuponesai,
mumba mangu hamuna chokudya kana nechokufuka
Hamungandiite mutungamiriri wavanhu,”
8nokuti Jerusaremu yawondomoka,
Judha yakoromoka nokuti zvavanotaura nezvavanoita
zvinopesana naTenzi,
zvinozvidza kuvapo kwake kuno mukurumbira.
9Iho uso hwavo#3:9 Uso hwavo: Vamwe vanoti rusaruro rwavo. hunopupurira
kuita kwavo kwakaipa.
Vanoparidzira chitadzo chavo
savanhu veSodhomu, havachivanziridze.
Zvichavawana zvavo nokuti
nhamo yavo ndeyokuzviparira.
10Taurirai vakarurama kuti zvichavanakira,
nokuti vachadya mubayiro wezvavakaita.
11Zvichamuwana wakaipa, zvichamuipira,
nokuti zvaakabata namaoko ake ndozvaachaitirwawo.
12Vanhu vangu,
vari kuoneswa ndondo nepwere
vachitongwa navakadzi#3:12 Navakadzi: Izvi ndizvo zviri muchiHebheru asi vamwe vanoturikira napamwewo.
vanhu vangu,
vatungamiriri venyu vari kukuendesai mutome
vachivhiringidza makwara enyu
amunofanira kutevera.
Tenzi anogadza dare vanhu vake
13Tenzi ava panzvimbo yake yapadare
anosimuka kuti achitonga marudzi.#3:13 Marudzi: Vamwe vanoti vanhu vake (LXX).
14Tenzi ava kupinza dare vakuru vakuru
pamwechete namakurukota avanhu vake,
achivapa mhosva yokuti,
“Ndimi makarozva munda wamagirepisi,
mudzimba dzenyu mune zvinhu
zvamakapamba imi kuvarombo.
15Simba rokutsika-tsika vanhu vangu
kudai munoriwana kupi,
muchidzungaidza nokupazamisa varombo?”
Ndizvo zviri kurehwa naTenzi,
Tenzi wehondo nehondo.
Yambiro kuvanhukadzi veguta reJerusaremu
16Tenzi ari kuti,
“Pamusana pokuti vanasikana veZioni vanozvikudza
vachifamba vakarebesa kwazvo mutsipa
vachidingaringa kwazvo nemesomeso
vachifamba vachigogodeka,
mumakumbo umu, ndarira dzichingwengwereka.
17Tenzi acharova neshamhu yezvisasa
musoro wavanasikana veguta reZioni,
Tenzi achavaita
baravara#3:17 Baravara: Vhudzi imbiri yavanhukadzi. Zvino kuitwa baravara kuvafumura kwazvo. mumusoro.”
18Musi iwoyo Tenzi achavabvutira
ndarira dzakanaka mumakumbo
netsungare mumusoro
nenyembe dzinenge mwedzi
19nemhete munzeve
namakoza omumaoko
namadhuku
20nenguwani namakoza namabhandhi
nezvinu zvamafuta okuzora
anonhuwirira namazango
21neringi dzomumaoko dzokudhindisa nadzo
nemhete dzapamhuno
22nehanzu dzomutambo
namajasi namachari
namabhegi okubatira mumaoko
23namachira akangwerevera
nembatya dzerineni nenguwani
nemimbure yokufukidza uso.
24Panze pokuva namafuta
okuzora anonhuwirira,
pachave nezvinoita gutukutu rokunhuwa;
panze pokuva nebhandhi
pachave netambo zvayo;
panzvimbo pokuva nevhudzi
rakanyatsorukwa, pachava nemhanza;
panzvimbo pokupfeka gemenzi rinokosha
pachapfekwa mbikiza dzamasaga;
panzvimbo penyora dzorunako
pachava nenyora dzakanyeka.
25Varume venyu vachaurayiwa nebakatwa,
magamba enyu achifira kuhondo.
26Dare rokumisuo mikuru kweZioni
richahwihwidza kuchema rachiti pasi pwashasha
kugara somukadzi asiyiwa achiti dano
asina chaakapfeka.
Zvasarudzwa nguva ino
Isaya 3: SCLB
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Shona Common Language Bible © Bible Society of Zimbabwe, 2008.