Hosea 12
12
1VokwaEfuremu vanoita ushamwari nemhepo,
vachiswerodzingirirana zuva rese
nemhepo yokumabvazuva zvayo.
Nhema noutsinye, ndizvo zvavanowanza
vachiita zvibvumirano neAsiria
vachituta mafuta
kuaenda kuIjipiti.
2Tenzi ane mhosva
yaari kupa vokwaJudha,
acharanga vokwaJakobho
maererano nezviito zvavo
achivatsividza maererano nezviito zvavo.
3Jakobho, achiri mudumbu,
akanga akabata chitsitsinho
chomukoma wake,
kuzoti ava murume mukuru
akaita tsimba naMwari.
4Jakobho akaita tsimba nomutumwa
akabva akurira,
akachema achimukumbira chikomborero.
Akasangana naMwari paBhatieri
ipapo Mwari akataura naye,#12:4 Naye: MuchiHebheru panoti, “Nesu.”
5iye Tenzi, Mwari wehondo nehondo dzavarwi,
zita rake raanodaidzwa naro
izita rokuti Yahweh.
6Saka imimi,
norubatsiro rwaMwari wenyu,
tendeukai, mubatisise
rudo noruenzaniso
mumirire Mwari wenyu nguva dzose.
Shamhu icharangwa nayo Isiraeri
7“Munhu wemhindu dzokutengesa zvinhu
ane chikero mumaoko chinonyengedza,
chaanongoda chete
kudzvanyirira vamwe.
8VokwaEfuremu vanotozviti zvavo,
‘Hauoneka, ndiri mupfumi,
ndazozviwanira upfumi.’
Asi upfumi hwavo hwose ihwohwo
haumbovapunyutsa pamhosva yavakapara.
9Ndini Tenzi, Mwari wenyu,
ndakakubvisai kunyika yeIjipiti.
Ndichaitazve kuti mugare
mumisasa yamatendhe
sezvinoitwa panguva
yamazuva makuru akatemwa.
10Ndini ndaitaura kuvaporofita,
ini ndini ndaionesa
zviratidzo nezviratidzo,#12:10 nezviratidzo: vamwe vanoti kuyambira, vamwewo vachiti, ndaitaura zvandaifunga.
ndichipawo nokuvaporofita mienzaniso.
11MuGireadhi mune uipi,
vanhu vasina maturo;
muGirigari muchipirwa zvibayiro kuhandira,
atari dzavo dzichaitawo
semirwi zvayo yamatombo
mumigero yomumunda.”
12(Jakobho akatizira kunyika yeAramu
iye Isiraeri kwaakandoita ugariri
achiitira mukadzi,
akafudzira hwai mukadzi.)
13Tenzi akaburitsa Isiraeri kuIjipiti
achizviita nomuporofita,
nomuporofita akavachengetedza.
14VokwaEfuremu vakamudenha zvakaipisisa;
nezvo Tenzi achamurega
achipfukirwa nemhosva yokudeura ropa.
Tenzi achamutsividza
kutsvinya kwake ikoko.
Zvasarudzwa nguva ino
Hosea 12: SCLB
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Shona Common Language Bible © Bible Society of Zimbabwe, 2008.