Kubuda 25:1-40

Tenzi akataurira Mosesi achiti, “Udza vaIsiraeri vapire zvipo kwandiri. Munhu mumwe nomumwe ngaapire kwandiri chipo chaanoda nomwoyo wakasununguka, iwe uchindigamuchirira. Zvipo zvaungagamuchire kwavari ndezvizvi zvinoti; ndarama nesirivha nendarira, kwouya machira erineni akanakisisa nezvivhimbo zveruvara rwedenga nezveruvara rwehute nezvitsvuku nemvere dzembudzi, kwoti matehwe ehondohwe akatsvukiswa kwotiwo matehwe etahashi, namapango omuunga, uyewo mafuta okuisa mumarambi netunonhuhwirira twamafuta okuzodzesa notwomurusenzi, ndokuzotiwo tumabwe tunokosha tweonikisi notumwe tumabwe tunokosha twokuisa pahanzu yeefodhi napanyembe yapadundundu. VaIsiraeri ngavandigadzirire nzvimbo inoera kuti ndigare pakati pavo. Unofanira kugadzira tendhe rinoera iroro pamwechete nemidziyo yaro nomutoo chaiwo wandinokuratidza. “Vanofanira kugadzira bhokisi rechitenderano ramapuranga omuunga. Urefu hwaro huri masendimita zana rine gumi, upamhi hwaro huite masendimita makumi matanhatu, kudzika kwaro ngakuitewo masendimita makumi matanhatu namatanhatu. Ngarinamirirwe nendarama chaiyo yakanakisisa mukati nokunze, uritenderedze kumusoro kwaro nomukombero wendarama. Unorigadzirira maringi mana endarama ugoaisa pamakumbo mana ebhokisi. Maringi maviri ngaaiswe kurutivi rumwe, mamwe maviri aiswewo kurutivi rumwe. Unoveza mapango omuunga, woanamirira ndarama, wopinza mapango iwayo mumaringi aya ari pamativi ebhokisi kuti uwane chokuritakurisa nacho. Mapango iwayo anofanira kugara ari mumaringi ebhokisi, arege kubviswamo. Unozoisa mafendefa echitenderano andichakupa mubhokisi imomo. “Unofanirawo kugadzira hwidibiro yendarama chaiyo yakanakisisa. Urefu hwayo huite masendimita zana rine gumi. Upamhi hwayo huite masendimita makumi matanhatu ane matanhatu. Unofanira kutora ndarama wogadzira mifananidzo miviri yezvisikwa zvinonzi makerubhu, woita zvokuzvipfura wozviisa pamativi maviri ehwidibiro. Unoita makerubhu pahwidibiro iyoyo akati uku rimwe uku rimwe, uagadzire akabatana nayo ari kumapeto maviri ehwidibiro. Ndiko kuagadzira kwauchaaita. Makerubhu iwayo ngaasimudzire mapapiro awo kumusoro akafukidza hwidibiro namapapiro awo akatarisana iwo akatarisa pahwidibiro, woisa mafendefa echitenderano andichakupa mubhokisi, uripfige nehwidibiro. Ipapo ndipo pandichauya kuzosangana newe. Ndichataura newe ndiri pakati pamakerubhu maviri anenge ari pahwidibiro yebhokisi rechitenderano, ndichikuudza zvandinoda kuti vaIsiraeri vaite. “Unofanira kugadzira teburu yamapuranga omuunga. Kureba kwayo ngakuite masendimita makumi masere ana masendimita masere, kufara kwayo kuchiita masendimita makumi mana ana masendimita mana, udzami hwayo huite masendimita makumi matanhatu ana masendimita matanhatu. Ngarinamirirwe nendarama chaiyo yakaisvonaka, uitenderedze nomukombero wendarama. Unoigadzirira mupendero unoipoteredza une upamhi sehwechanza, uise kamutsetse kendarama kunze kwawo kakapoteredza mupendero iwoyo. Unogadzira maringi mana endarama woaisa pamakona mana ari pamakumbo ayo. Maringi anopfekerwa mapango okutakurisa teburu ngaaiswe pedyo nomupendero uyu. Unozoveza mapango omuunga okutakurisa teburu yacho woanamirira nendarama, woigadzirira ndiro dzayo namadhishi ayo orusenzi, namajagi ayo nemidziyo yayo yokushandisa pamupiro wokuteura. Midziyo yose iyoyi ngaigadzirwe nendarama chaiyo yakanakisisa. Pateburu ipapo, ndipo paunozoisa chingwa chepandinenge ndiri chinogara chiri pandichange ndiri misi yose. “Unofanira kugadzira minora, chigadzikiro chomwenje chendarama chaiyo yakanakisisa. Chigadzikiro ichocho pamwechete negaro racho nehunde yacho, ngazvigadzirwe nendarama yakapfurwa. Ugadzire makapu acho namaruva acho akazaruka namamwe asati azaruka, uanamire pachigadzikiro zvibatane. Pamativi acho ngapave namapazi matanhatu, achiti uku matatu, uku matatu. Bazi rokutanga kune rumwe rutivi, ngarigadzirirwe makapu matatu anenge maruva omuarimondi akazaruka nemamwewo asati azaruka. Bazi rechipiri kune rumwe rutivi, ngarigadzirirwewo makapu anenge maruva akazaruka neasati azaruka. Ngazviitwe zvimwechetezvo pamapazi ose ari matanhatu. Hunde yechigadzikiro ngainamirwe makapu mana anenge maruva omuarimondi akazaruka neasati azaruka. Pose pose panosangana hunde namapazi maviri nechepasi pawo ose ari matanhatu, ngapanamirwe ruva rimwechete rendarama risati razaruka. Chigadzikiro namapazi acho namaruva acho, ngazvinamirwe zvive chinhu chimwechete chakapfurwa nendarama chaiyo. Unozogadzira marambi manomwe echigadzikiro uanamire pachiri kuti avhenekere mberi kwacho. Unofanira kugadzira zvigero zvokuchekesa tambo dzacho, ugadzirewo tireyi dzacho duku, ngazvive zvendarama chaiyo yakanakisisa. Chigadzikiro chomwenje nemimwe midziyo yacho yose, ngazvigadzirwe nendarama chaiyo yakanakisisa inorema makirogiramu makumi matatu namashanu. Unofanira kugadzira zvinhu izvozvi usingasiyanisi nezvandakuratidza mugomo muno.