Mateu 4
4
Satani anoedza Jesu murenje
(Mak 1:12,13; Ruka 4:1–13)
1Ipapo Jesu akatungamirirwa naMweya kuenda murenje kundoedzwa naSatani. 2Akatsanya siku nesikati kwamazuva makumi mana. Mushure mezvo akabva oziya. 3Muedzi akauya akati kwaari, “Kana uri Mwanakomana waMwari iti matombo aya ave chingwa.” 4Asi iye akapindura achiti, “Zvakanyorwa zvichinzi, ‘Munhu haararami nechingwa choga asi neizwi rose rinobuda mumuromo maMwari.’ ” 5Dhiabhori akamutora akaenda naye kuguta dzvene pamusorosoro chaipo peTemberi akati kwaari, 6“Kana uri Mwanakomana waMwari zviwisire pasi nokuti zvakanyorwa zvichinzi, ‘Achaudza vatumwa vake kuti vakuchengete, vachakugama mumaoko avo kuti urege kugumburwa rutsoka rwako nebwe.’ ” 7Jesu akati kwaari, “Zvakanyorwazve kuti, ‘Usaedze Tenzi Mwari wako.’ ” 8Dhiabhori akamutorazve akaenda naye kugomo refu–refu akamuratidza umambo noumambo hwapasi pose nembiri yaho. 9Satani akati kwaari, “Zvose izvi ndinokupa kana ukati pasi gwadagwa uchindinamata.” 10Jesu akati kwaari, “Ibvapo! Satani nokuti zvakanyorwa zvichinzi, ‘Unofanira kugwadamira uchinamata Tenzi Mwari wako. Iye oga ndiye waunofanira kushandira.’ ” 11Dhiabhori akabva akamusiya. Vatumwa vakabva vauya kuzomushandira.
Jesu anotangisa basa rake muGarirea
(Mak 1:14,15; Ruka 4:14–15)
12Jesu paakanzwa kuti Johani akanga asungwa, akaenda kuGarirea. 13Akabva kuNazareti akandogara kuKapanaumu padyo negungwa, mudunhu rokwaZabhuroni nerokwaNafutari 14kuti zviya zvakanga zvataurwa nomuporofita Isaya zvizadzikiswe zvokuti,
15“Iwe nyika yeZabhuroni
newe nenyika yeNafutari
iri pedyo negungwa
mhiri kwaJorodhani,
Garirea yevechirudzi,
16vanhu vakanga vagere murima
vakaona chiedza chikuru
navavo vakanga vagere munyika nomumumvuri worufu
chiedza chakavabudira.”
17Kubvira nguva iyoyo Jesu akatangisa kuparidza achiti pindukai nokuti umambo hokudenga hwaswedera.
Kudaidzwa kwavadzidzi vana vokutangisa
(Mak 1:16–20; Ruka 5:1–11)
18Zvino Jesu akati achifamba pamahombekombe egungwa reGarirea, akaona mukoma nomunun'una, vana Simoni anonzi Pita naAndireya munun'una wake vachikanda usvasvi hwavo mugungwa nokuti vakanga vari vabvuvi vehove. 19Akati kwavari, “Nditeverei. Ini ndichakuitai vabvuvi#4:19 Vabvuvi: Zvinoreva vabati vehove. vavanhu.” 20Pakarepo vakabva vasiya usvasvi hwavo vakamutevera. 21Akaenda mberi akaona vamwe, mukoma nomunun'una, Jemusi mwanakomana waZebhedhi naJohani munun'una wake vari mugwa navaZebhedhi, baba vavo vachigadzira usvasvi hwavo. Akavadaidza. 22Pakarepo vakabva vasiya igwa nababa vavo vakamutevera.
Jesu anodzidzisa; nokuparidza achirapa varwere
(Ruka 6:17–19)
23Jesu akafamba neGarirea yose achidzidzisa mumasinagogu avo achiparidza Shoko Rakanaka roumambo uye achirapa zvirwere zvose noundonda hwose pakati pavanhu. 24Mukurumbira wake wakapararira neSiria yose. Vakaunza kwaari varwere vose vakanga vachirwara nezvirwere zvakasiyana–siyana namamwewo marwadzo navakanga vakagarwa nemweya yakaipa, navaiva netsviyo navakanga vane mitezo yomuviri yavo yakafa akavarapa. 25Gurusvusvu ravanhu rakamutevera richibva kuGarirea nokuDhekaporisi nokuJerusaremu nokuJudhea uye nokumhiri kwaJorodhani.
Zvasarudzwa nguva ino
Mateu 4: SCLBC
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Shona Common Language Bible © Bible Society of Zimbabwe, 2008.