John 1
1
Ha Ugud Lambyalin Tagu
1Si chamuʼn chaampun chi lubung makwaan, ilinggew chi Ugud#1:1 Ha ugud ked mipakaammu si somsomok, ked ha ibyegala si Kristu chi Ugud. Piolaʼn uguchon ked siya tagu un mangagammuwan si somsomok Apudyus. ked ha Ugud inggew kan Apudyus ked siya si Jesu Kristu. Inggew siya kan Apudyus ked Siya si Apudyus. 2Inggew siya kan Apudyus si chamchamu. 3Lakwa cha losan mipagapu kan siya. Ked lu lappun siya, lappun pulus lakwa kan cha allaʼn lalakwa. 4Siya lampeɏpuwan chi biyeg cha losan un matattagu, ya siya bo silaw un mansilaw si somsomok cha tagu. 5Ha Silaw, silawala cha manggikbot cha somsomokcha ked ha gikbot achipun makaabyak si silaw.
6Inggew chi osaʼn leɏakiʼn imbuun Apudyus un mangngachen John.#1:6 Ha allaʼn John ked John un Mambubunyeg, chakampun un John un disipulus Jesus un langigili si allaʼn liblu. 7Ummali ta ibyegbyegala kan cha tagu katuttuwaan mipanggop si hachiʼn Silaw. Tistiguwala hachiʼn Silaw ta mamati otyan cha tagu kan siya. 8Chakampun un John chi silaw, ngim siya ummali mangibyega mipanggop si hachiʼn silaw.
9Ha tuttuwaʼn silaw, umali utla lubung ta silawala cha somsomok cha tagu. 10Illinggew siya utla lubung ya killingwan Apudyus chi lubung mipagapu kan siya, ngim achipun cha tagu ammu siya. 11Ummali siya si mismuʼn ilila, ngim achipun cha mismuʼn kailiyala ilawat siya. 12Ngim kan cha losan un ummawat ya lamati kan siya, illidchela chicha si kalintogen un mambyalin aalak Apudyus. 13Achipuncha mambyalin aalak Apudyus si sigud un miyalakan chi tagu willu miyalak un alak cha man-asawa, ngim mipagapu si pallakabyelin Apudyus.
14Ked ha Ugud, lambyalin tagu ot illinggew kan chitaku utla pita. Amod chi kachegula ya imbyegbyegala katuttuwaan kan chitaku. Intullongmi kila-Apudyusla, kila-Apudyus chi ossaan un Alak un lampeɏpu kan amala.
15Tilistiguwan John chi mipanggop kan siya un kalala, “Siya hachin imbyegbyegak kan chikayu, ‘Ha misagsagulud kan sakon, ked langatngatu lu sakon, ti sigud un illinggew siya si chaampunku miyalakan.’ ” 16Gapu si amod un kachegula kan chitaku, binbinchisyulala chitaku un lappun mangkigachela. 17Illidchon Apudyus chi Lintog kan Moses, ngim si Jesu Kristu, siya langipaila si kachegun Apudyus kan chitaku ya katuttuwaan mipanggop kan siya. 18Lappun tagù langitullong kan Apudyus, ngim abus chi ossaan un Alakla un kadwan Amala, siya langipakaammu kan siya.
Ha Tudtuchun John Un Mambubunyeg
(Mat. 3:1-12; Mrk. 1:1-8; Luk. 3:1-18)
19Ot allaya imbyegan John un Mambubunyeg mipanggop kan Jesus. Lambuun cha papangat cha Judio ud Jerusalem si uchum un papachi ya Levita un umoy man-imus kan John lu silu siya. 20Achipun John insulib, ngim imbyegala katuttuwaan, “Chakampun un sakon chi Kristu.”#1:20 Ha Mesias willu Kristu, osaʼn titulo. Ha piolaʼn uguchon siya osaʼn chilutukan Apudyus un manturay.
21Ot ilimuscha kan siya, “Siluka lù? Ha sika si Elijah?”
Ot kalala, “Lai, chakampun un sakon.”
Ot ilimuscha kasin, “Ha sika propeta?”#1:21 Malachi 4:5
Ot summongbyat un kalala, “Lai.”
22Ot kalancha kan siya, “Siluka lù? Ibyegam u kan chikami ta awed ibyegami kan cha langibuun kan chikami. Simma maibyegam mipanggop si long-eglu?”
23Ot silongbyatan John, kalala,
“Sakon chi illinggew si lugeɏn lappun ummili un mangiyip-ipkaw un,
‘Mansagala kayu, un isun chi isagalayu chaɏan un ayon chi Apu!’ ”#1:23 Isaias 40:3
24Ot inggew cha Pariseo un libuun kan John, 25ilimuscha, “Lu chakampun un sika chi Kristu willu Elijah willu propeta, puggey pin-a mambunyeg lù?”
26Summongbyat si John kan chicha, “Bunyagek chikayu si chelum, ngim awed kan chikayu osaʼn taguʼn achipunyu ammu. 27Siya misagsagulud kan sakon, ked gapu si kilangatula, achipulak lumbong un mangukas si kechun chi sancheɏla.”
28Lakwa losan cha laoy ud Bethany, si biik chi chewwang un Jordan un mambunbunyagen John.
Si Jesus Chi Keɏlilun Apudyus
29Labigat pun, intullong John si Jesus un ased un umoy kan siya ot kalala, “Ilanyu, allaya keɏlilun Apudyus un mangaan kan cha byasuɏn cha tagu utla lubung! 30Siya imbyegbyegak un misagsagulud kan sakon un langatngatu lu sakon, ti illinggew siya si chaanku miyalakan. 31Ulay sakon achipunku ammu lu silu siya, ngim ummaliyak mambunyeg si chelum ta ipakaammuk siya kan cha galak Israel.”
32Ot imbyegan John, “Intullongku Ispiritu un lan-osog un isun chi kalapatin leɏpuʼd langit ot illinggew kan siya. 33Sakon mismu achipunku ammu siya, ngim si Apudyus un langibuun kan sakon un mambunyeg si chelum, imbyegala kan sakon, ‘Ha taguʼn itullonglu un ayan chi Ispiritu ya inggew kan siya, siya mangibunyeg si Ispiritun Apudyus.’ 34Hachi intullongku, ked paloklokak kan chikayu un siya tuttuwaʼn Alak Apudyus.”
Cha Ummulan Disipulus Jesus
35Labigat pun, illinggew kasin si John ya cha chuwaʼn disipulusla. 36Ot intullongla pun si Jesus un lummaus, kalala, “Ancha Keɏlilun Apudyus!”
37Chingngeɏn pun cha chuwaʼn disipulus John chi imbyegala, tilun-udchà Jesus. 38Lantuwilì Jesus ot intullongla chichaʼn mituntun-ud ot ilimusla kan chicha, “Simma masapuɏyu?”
Ot kalancha kan siya, “Rabbi, (piolaʼn uguchon mistulu) udma inggewam?”
39Ot kalan Jesus kan chicha, “Umali kayu ta itullongyu.”
Ot litun-udcha kan siya ot intullongcha inggewala. Gapu ta machema, ummiyancha kan siya.
40Ha osa un litun-ud kan Jesus, si Andrew un sulud Simon Peter. 41Ot chilecheɏaslan langngit kan Simon un suludla ot imbyegala kan siya, “Inchesanmi Messias!” (Piolaʼn uguchon, Kristu). 42Oli pun illiyoy Andrew chi suludlaʼn Simon kan Jesus.
Intullong pun Jesus siya, kalala, “Sika Simon un alak John. Ngadlok sika Cephas.” (Piolaʼn uguchon Peter willu Byetu).
Ilayagen Jesus Cha Philip Kan Nathanael
43Labigat pun simsimmok Jesus un umoy ud Galilee. Ot inchesala si Philip ot kalala kan siya, “Tun-ucholak.”#1:43 Ha ibyegala si Greek tun-ucholak, piolaʼn uguchon mitun-ud kan Jesus un mandisipulusla.
44Si Philip ked iBethsaida un ilin cha Andrew kan Peter. 45Inchesan Philip si Nathanael ot kalala kan siya, “Inchesanmi taguʼn imbyegan Moses si lintog ya cha propeta. Siya si Jesus un alak Joseph un iNazareth.”
46Ilimus Nathanael, “Awed kamman bibiɏù tagù lampeɏpuʼd Nazareth?” Ot kalan Philip, “Umalika ta inta itullong.”
47Intullong pun Jesus si Nathanael un ased, kalala, “Allaya tuttuwaʼn galak Israel un lappun sikapla.”
48Ilimus Nathanael kan siya, “Himmaga ilolaʼn ammum gey sakon?” Ot kalan Jesus, “Intullongku sika si inggewam si puun chi kayun igus, sakbyey un ilayagen chika kan Philip.”
49Ot summongbyat si Nathanael kan siya, “Apu, sika Alak Apudyus! Sika Ari ud Israel!”
50Ot kalan Jesus, “Mamatika gapu ta imbyegak kan sika un intullongku sika si puun chi kayuʼn igus. Ad-achu asim itullong un lakaskaschaaw lu cha alla!” 51Ot kalala kan chicha, “Ibyegak chi tuttuwa kan chikayu, mailayu un miwalit ud langit ya mailayu cha angheles Apudyus un mipangpangatu ya chumedchedcheɏa kan Sakon un Alak chi Tagu.”
Zvasarudzwa nguva ino
John 1: HUA
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2009, Wycliffe Bible Translators, Inc. in cooperation with Translators Association of the Philippines