Acts 18
18
Si Paul Ud Corinth
1Lagamput pu hachi, tilelan Paul ud Athens ot ummoy ud Corinth. 2Udchi inchesala osaʼn Judio un lampeɏpuʼd Pontus un mangngachen Aquila ya si asawalaʼn Priscilla. Kaggegetongcha un lampeɏpuʼd Italy, ti imbilin Emperador Claudius un umoyon cha losan un Judio ud Rome. Ummoy Paul chicha gileggakay. 3Gapu ta man-iisu kawachicha un mangwa si kambas, illinggew ya lakakawachi kan chicha. 4Ot Silabyechuʼn ummoy si Paul si sinagoga ya pilachaslaʼn ilawis cha Judio ya cha Gentil un mamati kan Jesus.
5Gummatong pun cha Silas kan Timothy un lampeɏpuʼd Macedonia, impapuut Paul imbyegbyega ugud Apudyus ya pilaloklokala kan cha Judio un Kristu si Jesus. 6Ngim silupling pun cha Judio siya ya lan-uguuguchencha si lawwing, pilukpukala tapuk si silupla ta ipailalan isitola ot kalala kan chicha, “Lu chusaon Apudyus chikayu, ha long-egyu amuyuwanyu! Lappun biyangku. Mallugi si sala inyak kan cha Gentil.”
7Ot tilelan Paul chicha ot ummoy likabyeɏoy kan Titius Justus, osa un Gentil un pin-a manchaychayaw kan Apudyus. Ha byeɏoyla ked cheeg chi sinagoga. 8Inggew si Crispus un pangat chi sinagoga ya losan un kabyeɏoyla lamaticha kan Jesus. Achu bo cha lampeɏpuʼd Corinth un lamati si chingngeɏcha imbyegbyegan Paul ya lampabunyegcha.
9Si osaʼn labi lampaila chi Apu kan Paul ot kalala, “Achika umogyat, ngim ipapatim un mangibyegbyega si ugudku. Achim iyagey! 10Ti awechak kan sika, ked lappun tagu si mangaluka kan sika ti achu cha taguk si allaʼn siudad.” 11Ot illinggew siya si sintawon ya olom buɏan un pin-a mantudtuchu si ugud Apudyus.
12Si langgubillachuɏan Gallio ud Achaia, lantitimpuyug cha achipun mamatiʼn Judio un chokmaancha si Paul ked illiyoycha siya si kurti ta ichiɏumcha kan Gubillachuɏ. 13Kalancha, “Allaya tagun pin-ala awison cha tagu taplu manchaychayawcha kan Apudyus si kopya un sumupling si lintog.”
14Ngim man-ugud oyya si Paul, ot kalan Gallio kan cha Judio, “Lu awed byasuɏla willu lawwing un killingwala, alusak chongɏon cha chiɏumyun Judio. 15Ngim gapu ta mipanggop si pion chi ugud un ibyega ya cha ngachen cha tagu ya lintogyu chi man-is-isikanyu, chikayu mangamung. Issak un manguis kan cha katchi.” 16Ot pileɏawala chicha si korti. 17Ot chilokmaan cha si Sosthenes un pangat chi sinagoga ot bilautancha siya si paway chi kurti. Ngim achipun Gallio biliyangan chicha.
Langulin Si Paul Ud Antioch
18Illinggew si Paul kan cha mamati ud Corinth si labyeyeg. Lampakacha ot tilelala chicha ot ummoy ud Cencrea un kadwala cha Priscilla kan Aquila. Gummatongcha pun ud Cenchrea, lampaapulug si Paul ta ipailala un latungpeɏ chi insapatala kan Apudyus.#18:18 Numbers 6:18 Ot lanlugencha si bapur un umoy ud Syria. 19-21Gummatongcha pun ud Ephesus, tilelan Paul cha Aquila kan Priscila. Ot ummoy ud sinagoga ot lakasongsongbyat kan cha Judio. Tilawichencha si Paul ta inggew yan kan chicha udchi ngim achipunla inteun. Lampakacha kan chicha ot kalala, “Lu siya pion Apudyus, mangulilak kan chikayu.” Ot lanlugen kasin si bapur un umoy ud Syria.
22Gummatong pun ud Caesarea un osaʼn ili ud Syria, lalagecha ummoy ud Jerusalem ot gilaggakayla cha mamati. Ot lan-osog ummoy ud Antioch. 23Lagamput pu illinggewala si pigan eɏgew udchi, lanlubbyat ot ummoyla gilaggakay cha ili-iliʼn sakupon chi Galatia ya Phrygia ta pakoscheɏola cha mamati.
Si Apollos Ud Ephesus Ya Corinth
24Si hachi, gummatong ud Ephesus chi osaʼn Judio un lampeɏpuʼd Alexandria. Ha ngachenla Apollos. Lalaing siya un man-ugud ya achu ammula mipanggop si liigiliʼn ugud Apudyus. 25Laachaɏan siya mipanggop kan Apu Jesus ya mallagpot un man-ugud ya lappun mangkuɏangan chi mantutudtuchula mipanggop kan Jesus. Ngim abus chi lambunyagen John si ammula. 26Lateɏod un lan-ugud ud sinagogan cha Judio. Chingngeɏn pun cha Priscilla kan Aquila siya, ilayagencha siya ud uwacha ot impakaawatchaʼn ustu-ustu cha achipunla ammu mipanggop kan Jesus ya in-ilon Apudyus un malagu kan cha tagu. 27Pion pun Apollos un umoy si probinsiyan chi Achaia, silegeg cha mamatiʼd Ephesus siya ot laluɏatcha kan cha mamati ud Achaia ta mangiliyoncha siya. Gummatong pun udchi, chakeɏ intuɏungla kan cha lamati mipagapu si kachegun Apudyus. 28Ti lalaing un lakasongsongbyat kan cha Judio, ot ilabyakla chicha ti pilaloklokala si ugud Apudyus un Kristu si Jesus.
Zvasarudzwa nguva ino
Acts 18: HUA
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2009, Wycliffe Bible Translators, Inc. in cooperation with Translators Association of the Philippines