Acts 15
15
Ha Lammimitingan Cha Kukunsiseɏ
1Hachi ked, gummatong cha uchum un lelleɏakiʼn lampeɏpuʼd Judea ot intudtuchucha kan cha mamati, un kalancha, “Achipun makwaʼn maseɏaklibyen kayu lu achipun kayu mampasogyat un malungpeɏ si intudtuchun Moses.”#15:1 Leviticus 12:3 2Ngim lakasongsongbyat cha Paul kan Barnabas kan chicha. Ked siya lanchutukancha kan cha Paul kan Barnabas ya cha uchum un mamati ta umoychaʼd Jerusalem makaugud kan cha apostoles ya cha pallakayon cha mamati mipanggop si allaʼn palikut. 3Pileɏung-ud cha mamati chicha, ot langoycha ud Phoenicia ya Samaria, imbyegbyegacha lamatiyan cha Gentil kan Jesus. Ot amod chi galas cha losan un mamati. 4Gummatongcha pun ud Jerusalem, limangilin cha mamati ya cha apostoles ya cha pallakayon chicha. Ot imbyegacha cha losan un killingwan Apudyus mipagapu kan chicha.
5Ngim summiked cha uchum un mamati un lampeɏpu si grupun cha Pariseo, ot kalancha, “Masapuɏʼn ibyega taku un mampasogyat cha Gentil ya tuttuwaoncha bo lintog Moses.”
6Hachi ked, lammimiting cha apostoles ya cha pallakayon ta man-uuguchencha allaʼn byaleg. 7Lagamput pu labyeyeg un lansisillongbyatancha, summiked si Peter ot kalala, “Susulud, ammuyu si sin-eɏgew, sakon chi chilutukan Apudyus kan chitaku un mangibyegbyega si bibiɏuʼn chameg kan cha Gentil ta chongɏoncha ugud Apudyus ya mamaticha. 8Ked si Apudyus un sin-ammu si somsomok cha tagu, impailala un ilawatla cha Gentil un lamati ti illidchola Ispiritun Apudyus kan chicha un isun chi langidchela kan chitaku. 9Lappun laksigon Apudyus kan chitaku ya chicha, ti pileɏkasla somsomokcha un mipagapu si pammaticha. 10Payuggey mangin-in-an si Apudyus? Puggey paligatan cha mamati si manchegson un achipun cha chachakkeɏ taku ya ulay chitakuʼn mismu achipun taku kabyeeɏan? 11Ngim mamati taku un matagu taku mipagapu si kachegun Apu Jesus, ked siya bo kan chicha.”
12Lagamput pun, lappun akit umsiyong kan cha achuʼn tagu ot lanchochongngeɏcha si ilug-uggud cha Barnabas kan Paul mipanggop kan cha lakaskaschaaw ya sinyeɏ un killingwan Apudyus kan cha Gentil mipagapu kan chicha. 13Lagamputcha pun, lan-ugud si James ot kalala, “Susulud, chongɏonyu ibyegak. 14Imbyegan Simon kan chitaku in-ilon Apudyus si chamu un langipaila si mampopotogla kan cha Gentil, ti chilutukala cha tagula. 15Ha killingwan Apudyus, liyulud si inggilin chi propeta un kalala,
16‘Lu magamput cha alla, mangulilak si umaliʼn eɏgew ta isaedku kasin chi
layam-an un manturayan David ta mileɏam un ustu-ustu.
17Ta losan un Gentil un pililiyak un mantaguk mansagungcha kan sakon.
18Allaya imbyegan chi Apu un impatigammula si awi.’ ”#15:18 Amos 9:11-12
19Intuɏuy James lan-ugud, “Ha kasomsomkak achi taku paligatan cha Gentil un mansagung kan Apudyus. 20Ngim maluɏat taku kan chicha ta ibyega taku un achipuncha kalon cha michatun un makan si silan-apudyus, achicha makachegchegas ya achicha kalon chi ischaʼn cha lapseɏʼn ayam ya chaɏa. 21Ti ammun losan cha Judio allaʼn lintog, ti malipud si awi, libyasabyasa si kacha Sabyechu chi lintog Moses si losan un sinagoga ya mibyegbyega cha ugudla si kaili-ili.”
Ha Suɏat Kan Cha Mamatiʼn Gentil
22Oli pun lan-uugud cha apostoles ya cha pallakayon ya losan un mamati un manchutukcha si grupucha un mibiɏun kan cha Paul kan Barnabas un umoy ud Antioch. Cha lachutukan ked cha Judas un ngadloncha Barsabbas ya si Silas, cha chuwaʼn mangipangpangu kan cha mamati. 23Impaw-itcha allaʼn suɏat kan chicha:
“Chikamiʼn apostoles ya pallakayon un susuludyu utla Jerusalem. Allaya suɏatmi kan chikayuʼn Gentil un mamati utlat Antioch, Syria ya Cilicia.
24Chingngeɏmi un inggew cha uchum un leɏakiʼn lampeɏpu utla un ummali utlat un mangallilaw kan chikayu si itudtuchucha. Ngim achipunmi illidchen chicha si kalobbongan un mangwa si katchi.
25Lan-asiteulanmi un chumutuk kami si ibuunmi kan chikayu. Mitun-udcha kan cha Barnabas kan Paul un ay-ayatonmi, un
26langichuya si biyegcha un lansimbi kan Apu Jesu Kristu.
27Ked ibuunmi cha Judas kan Silas un mangipakaammu kan chikayu si allaʼn suɏatmi.
28Ti lan-asiteulanmi ya ha Ispiritun Apudyus un achipunmi chikayu paligatan malaksig kan cha allaʼn masapuɏʼn koonyu.
29Achiyu kalon cha michatun kan cha silan-apudyus, chaɏa ya cha ischan cha lapseɏn ayam ya achi kayu makachegchegas. Lu koonyu cha alla, bibiɏu mambibiyegyu. Abus hachi ibyegami kan chikayu.”
30Lagamputcha pun laluɏat, pileɏung-udcha cha allaʼn opat ot lan-osogcha ud Antioch. Gummatongcha pun udchi, chilagupcha cha mamati ot illidchoncha hachiʼn suɏat. 31Bilasacha pun chi suɏat, amod chi galascha si bibiɏuʼn byegbyegacha.
32Achu cha imbyegbyegan cha Judas kan Silas un malegeg ya mampakoscheɏ si pammaticha. 33Illinggewcha ud Antioch si pigaʼn eɏgew ot pileɏung-ud cha mamati chicha un kalancha, “Binchisyulan otyan Apudyus chikayu ya ayyuwalala chikayu si ayanyu.” Oli pun langulincha kan cha langibuun kan chicha. 34Ngim pion Silas un matelan.#15:34 v. 34 lappun si kaachuwan un manuscript si Greek. Ngim simsimmok Silas un inggew ud Antioch. 35Ngim illinggew cha Paul kan Barnabas ud Antioch, ot lantudtuchucha ya imbyegbyegacha ugud Apudyus. Achu cha kadwachaʼn lamati un tummuɏung kan chicha si kawachicha.
Ha Lansilaan Cha Paul Kan Barnabas
36Lummaus pu achuʼn eɏgew, kalan Paul kan Barnabas, “Inta geggakayon cha susulud un mamati si kacha siudad un ummoyanta langibyegbyeg-an si ugud Apudyus ya inta itullong lu ma in-iloncha.” 37Pion Barnabas un iyawitcha si John Mark. 38Ngim issan Paul, ti tilelala chicha si lummaus un eɏgew ud Pamphylia ya achipunla intuɏuy tiluɏungan chicha si kawachicha. 39Oli pun amod chi lansongsongbyatancha ot lansilacha. Si Barnabas inyawitla si John Mark ot lanlugencha si bapur un umoy ud Cyprus. 40Ngim si Paul pililiyala si Silas un kadwala. Illuwaluwan cha mamati chicha ta kacheguwan ya ayyuwalan chi Apu chicha si losan un ayancha. 41Oli pun ummoycha si ili-ili ud Syria ya Cilicia ta pakoskoscheɏoncha pammatin cha mamati.
Zvasarudzwa nguva ino
Acts 15: HUA
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2009, Wycliffe Bible Translators, Inc. in cooperation with Translators Association of the Philippines