Genesis 5
5
Hay Patad nan Holag Adam
1Hiyah te napatad hi holag Adam. Hidin nunlumuwan Apo Dios hi tagu ya inyengngohnah nan aatna. 2Ya limmunay lala'i ya babai, ya winagahana dida ya unna ngadnan didah tagu.#5:2 Unu adam.
3Ya unat goh nuntawon hi Adam hi hinggahut ta tulumpulu ya waday imbaluynan lala'i an hiyay inanungna, ya ngadnana ta hi Seth. 4Ya ni'tagu an gun nunholag damdama ta nangamung waluy gahut di tawona, ya nawadaday udumnah imbabaluynan linala'i ya binabai. 5At hay uyap di tawonah engganan den natayana ya hiyam di gahut ta han tulumpulu.
6Ya hi Seth ya hinggahut ta lemay tawona ya un mawada han imbaluynan hi Enosh. 7At nituluy an ni'tagu an gun nunholag ta nangamung waluy gahut ta han pituy tawona, ya nawadaday udumnah imbabaluynan linala'i ya binabai. 8At hi Seth ya hiyam di gahut ta han himpulu ta duway tawona ya un matoy.
9Ya hi Enosh ya nahiyam di tawona ya un mawada han imbaluynan hi Kenan. 10Ya nituluy goh an ni'tagu an gun nunholag ta nangamung waluy gahut ta han himpulu ta lemay tawona, ya nawadaday udumnah imbabaluynan linala'i ya binabai. 11At hi Enosh ya natoy hidin nunhiyam di gahut ta han lemay tawona.
12Ya hi Kenan ya napituy tawona ya un mawaday imbaluynan hi Mahalalel. 13At nituluy an ni'tagu an gun nunholag ta nangamung waluy gahut ta han napat, ya nawadaday udumnah imbabaluynan linala'i ya binabai. 14Ya hi Kenan ya natoy hidin nuntawon hi hiyam di gahut ta han himpulu.
15Ya hi Mahalalel ya nuntawon hi nanom ta han lema ya un mawada han imbaluynan hi Jared. 16At nituluy an ni'tagu an gun nunholag ta nangamung waluy gahut ta tulumpuluy tawona, ya nawadaday udumnah imbabaluynan linala'i ya binabai. 17Ya hidin waluy gahut ya han nahiyam ta han lemay tawon Mahalalel ya natoy.
18Ya hi Jared ya hinggahut ya han nanom ta duway tawona ya un mawaday imbaluynan hi Enoch. 19At nituluy an ni'tagu an gun nunholag ta nangamung waluy gahut di tawona, ya nawadaday udumnah imbabaluynan linala'i ya binabai. 20Ya hidin nuntawon hi Jared hi hiyam di gahut ya han nanom ta han duwa ya natoy.
21Ya hi Enoch ya un nanom ta han lemay tawona ya nawaday imbaluynan hi Methuselah. 22At nete"an de ya na'na'unnud hi Enoch ay Apo Dios, at mituluy an ni'tagu ta nangamung tuluy gahut di tawona, ya nawadaday udumnah imbabaluynan linala'i ya binabai. 23Ya hidin tuluy gahut ya han nanom ta lemay tawona 24ya hin'alina ya na'utaw an mi'id. Ti hiya ya un'unnud ay Apo Dios, at nonong di odolna ya ni'yuy ay Apo Dios.
25Ya hi Methuselah ya hinggahut ya han nawalu ta pituy tawona ya un mawada han imbaluynan hi Lamech. 26At nituluy an ni'tagu an gun nunholag ta nangamung hi pituy gahut ta han nawalu ta duway tawona, ya nawadaday udumnah imbabaluynan linala'i ya binabai. 27Ya hidin nuntawon hi Methuselah hi hiyam di gahut ya han nanom ta hiyam ya natoy.
28Ya hi Lamech ya hinggahut ya han nawalu ta duway tawona ya un mawada han imbaluynan lala'i. 29Ya nginadnana ta hi Noah,#5:29 Hay pohdonan ibaga ya umipa'amlong. ya inalinay, “Maphod ta ta"on hi un at hitun numbalin hi adi maphod tun lutan dumalat nan nangidutan Apo Dios ya heten ung'ungngay umipa'amlong hi nomnom hitun naligat an tamu.” 30At ni'tagu an gun nunholag ta nangamung hi lemay gahut ta han nahiyam ta lema, ya nawadaday udumnah imbabaluynan linala'i ya binabai. 31Ya nuntawon hi Lamech hi pituy gahut ya han napitu ta pitu ya un matoy.
32Ya hi Noah ya nuntawon hi lemay gahut ya unda mawada nan tulun linala'in imbabaluynan da Shem, ya hi Ham, ya hi Japheth.
Zvasarudzwa nguva ino
Genesis 5: NHAD
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.