Luka 2
2
Kuvyajwa kwa Yesu
Matayo 1:18-25
1Ngera za uḍyana wa Yohana, kwiwapfo haju at̯awaliye nsi ya Rumi na nsi zingine nyinji. Haju huyo ekihanwa *Kaisari Agust̯o. Kayavya amuri ya kut̯aligwa wantu wa nsi zonse at̯awaliyezo. 2Kut̯aligwa huku kwiwa nkwa d̯ura ngera ya Kirenio epfokuwa liwali jwa Siria.#2:2 Liwali jwa Siria ewa pia ndiye haju jwa nsi yonse ya Wayahud̯i. Siria pia ikihanigwa Shamu. 3Ndookomu kula muntu kenda kworegwani mudzini kwao. 4Yusufu kanuka kuyawa mudzi wa Nazareti wiwo Galilaya, kenda mudzi wa Betilehemu wiwo Yud̯aya, ekovyajwa haju D̯aud̯i. Yusufu kenda hukuḍe, koro ewa jwa sindo na yukoo jwa D̯aud̯i. 5Kenda akoregwe pfamodza na Maria, huyu mwanamuke amanyananiye nae, eyekuwa muziho. 6Ndookomu, wepfokuwa Betilehemu amaale, nsiku zakwe za kudzifunguya zifika. 7Maria kavyaa mwanamuyume hangafa. Kamulinga-linga na vit̯ani na kamut̯ambaarya t̯orani mwa kuḍiya ngombe chakuḍya. Koro ntakukuwa namfasi nyumbani mwa wageni.
Wat̯unga wapfegwa maagu
8Hafufi na Betilehemu, kwiwapfo wat̯unga weowakyamia mbuzi zao nasiku makondeni. 9Iyo saa malaika jwa Ḅwana kawat̯upukia, na marembo ya Muungu yawayangaiya tswee, nao wanjijwa ni oga muno. 10Ela huyu malaika kawamba, “Namutseshooga, koro nimuyeheya maagu mema, yadzeyoyeha tsekea nkuu kwa wantu wonse. 11Koro yeo, mudzini mwa D̯aud̯i, mumavyaijwa mupfonya, ndiye *Kirist̯o Ḅwana. 12Na kihambwiizo chenu ni hichi: Mudzaona mwana kalelehea alingijwe na vit̯ani na at̯ambarisijwe t̯orani mwa kuḍia ngombe.” 13Iyo saa kit̯aro cha malaika kuyawa mbinguni kitsanganika pfamodza na huyuḍe malaika na waḍabva kumushad̯a Muungu wakyamba,
14“Shad̯u nza Muungu awee dzuu mbinguni,
na naghea iwe lumwenguni, kwa wantu atsakizijweo nao!”
15Makisa hawa malaika wawayatsa hawa wat̯unga na wapfaa mbinguni. Ndookomu hawa wat̯unga wanena wao na wao wakyamba, “Hwendeni Betilehemu hukaḍiyowe hiḍi dzambo ḍihendekeyeḍyo ḍya Ḅwana ahwambiiyeḍyo.” 16Ndookomu hawa wat̯unga wanuka na rebvu, wenda wamuona Maria na Yusufu, noyu mwana eyet̯ambaariswa t̯orani mwa kuḍiya ngombe. 17Wakisa kumuona huyu mwana, hawaḍe wat̯unga wawasumwiiya hawa wantu hayaḍe yonse ya malaika awambiiyeyo dzuu ya huyu mwana. 18Na wonse wasikiiyeo haya wambiijweyo ni hawa wat̯unga wamaka. 19Ela Maria kaviweka vyuuwo hivi mojoni mwakwe na kuvimamat̯a. 20Makisa hawa wat̯unga wagala huku wakimushad̯a Muungu kwa yonse wasikiiyeyo na waoneyeyo. Koro wamuona huyu mwana dza viviḍe wambiijwevyo ni malaika.
Yesu kahunwa sari
21Huyu mwana epfofikisa nsiku nane hangu epfovyajwa, kangizwa harusini na kapfegwa sari. Kahanwa Yesu, dza viviḍe vya huyu malaika evyonena kaḅila Maria nkadzamumiha.
Yesu kapfiikwa Hekaluni
22-24Vyoregwa Shariani mwa Musa kwamba, kwa Wayahud̯i, kula muke adzifungwiiye mwanamuyume, anakaa nsiku miyongo mine asidzadhereswa. Na ili aweze kudhereswa, imumala kuyavijwa mvuugiya ya vikwe viwii ambu wana ndiwa wawii. Na pia vyoregwa kwamba, kula mwanamuyume hangafa, ni had̯i at̯olegwe kwa Ḅwana.
D̯ubva nsiku miyongo mine zipfosia hangu nsiku ya Yesu avyaijweyo, Maria na Yusufu wenda pfamodza na huyu mwana *Hekaluni Yerusalemi, kumuyavya kwa Ḅwana.
Simioni kamuona mupfonya
25Ngera hiziḍe kwiwa muntu eyeakihanigwa Simioni, eyeakikaa Yerusalemi. Ewa muntu muhachi na eyeakimuhila Muungu. Ruhu Mudheru ewa dzuuye, na ekiindiya mupfonya jwa Waisiraeli. 26Ruhu jwa Muungu kamuyanga Simioni kwamba asidzafwa kadzamuona Mupfonya adzeehumwa ni Muungu. 27Akiyongojwa ni Ruhu Mudheru, Simioni kenda Hekaluni. Na iyo saa Yusufu na Maria wepfokudza na Yesu kumuhendea adha za kisharia, 28Simioni kamuhwaa huyu mwana mikononi mwakwe na kamushad̯a Muungu kamba,
29“Ḅwana, sasa kumaḍit̯imiza ḍamano ḍyako,
d̯ubva muyatse muhumwao ende na naghea.
30Koro nimamuona mimi mwenye,
huyu mupfonya jwa wantuwo,
31umuelekanyiyee ili wantu wonse wamuone.
32Kadzawa dza muyanga
wa kuyangazia vyeet̯i miroyo
na kadzawa hila nkuu kwa wantuwo wa Isiraeli!”
Ut̯aḅiri wa Simioni
33Ise na nina huyu mwana wamakiswa ni vyuuwo vinenejwevyo ni Simioni dzuuye. 34Makisa Simioni kawavodhya kisa kamwambia Maria, “Huyu mwana huyu kadzawahendeza wenji wa wantu wa Isiraeli wapfonyegwe na wangine waare. Kadzawa kihambwiizo cha Muungu, ela wantu wenji wadzamudziza. 35Ndookomu mat̯aro ya siri ya wantu wenji yadzayangaa wekeani. Nawe kudzapata ngiru, iyo nkali dza kisu, idzeyokusimika mojowo.”
Ut̯aḅiri wa Hana
36Kwiwa *nabii muke jarisa, eyeakihanwa Hana. Ewa mwanamuke jwa Fanueli, jwa kyeet̯i cha Aseri. Kahwajwa, na ḅaad̯a ya myaka mifungahe muumewe kafwa. 37Na hat̯a epfofikisa myaka miyongo minane na mine ewa amaale ni muke muchiwa. Ekyenda Hekaluni kumuyomba Muungu na kufunga siku na musikahi. 38Simioni epfoakinena na Maria na Yusufu, Hana kadza. Nae kaḍabva kumushad̯a Muungu na kusumwiiya dzuu ya huyu mwana kwa kula eyeakimuyoweeya Muungu aikombowe Yerusalemi.
39Ndookomu Maria na Yusufu wepfot̯imiza yonse ya hi sharia ya Ḅwana iyoikitsaka wahende, wauja Nazareti ya Galilaya. 40Huyu mwana kakuya na kawa na nguvu. Kadzaa karo, koro Muungu ewa katsakizwa nae.
Yesu kahafa Yerusalemi
41Kula mwaka wavyaziwe Yesu wekyenda Yerusalemi kwa jila ya Pasaka.#2:41 Jila ya Pasaka iwa jila ya kukumbuka kuyavigwa kwa Wayahud̯i kuyawa na uhumwani Misiri. 42Yesu epfofika myaka kumi na miwii#2:42 Wepfofika myaka kumi na miwii, wanawayume wa Kiyahud̯i wekiḍabva kudzielekanya kuhenda kazi za kiḍini mwaka wa pfii wakwe. wenda nae kwe jila. 43Hi jila ipfosiya, ise na nina waḍabva kugala nyumbani. Ela ntawakumanya ya kwamba Yesu kahafa Yerusalemi. 44Wao wat̯ara kwamba ewa pfamodza na wantu wao wayawiyeo Yerusalemi. D̯ubva mioroye ise na nina waḍabva kumulacha kwa waḅamu zao na wantu wa sindoni mwao. 45Wakitsamuona, wauja Yerusalemi wakamulache. 46Wamulacha hat̯a nsiku ya hahu hangu wepfonuka Yerusalemi, ndipfo wakimuona. Wamuona kakaa Hekaluni na waalimu wa *Sharia, akiwapfindiiya na kuwauza vyuuwo. 47Wonse wamusikiiyeo Yesu akwakwambukuyani urembo hayaḍe eyoakiuzwa wamaka kwa karowe. 48Mambo hayo yamumakisa ise na nina muno. Makisa mamajwe kamuuza, kamwamba, “Mwanangu, maana ya kuhuhenda hivi hivi ni? T̯ayowa, ami na babajo hwikikulacha na d̯ina kula pfantu, katsi kwapfahapfa!” 49Yesu kawambukuya kawamba, “Anywi munilachia? Munamba ntamukumanya hat̯a kwamba ni had̯i niwepfo nyumbani mwa Baba?” 50Ela wao ntawakuimuka kwambukuyakwe. 51D̯ubva Yesu kagijana nao, wauja Nazareti na nkakuyatsa kuwat̯ii. Maria kayaweka haya yonse mojoni mwakwe. 52Yesu kagija kukuya na chimo na kenjipfa na karo. Na Muungu na wanaad̯amu wagija kutsakizwa nae.
Zvasarudzwa nguva ino
Luka 2: pkb
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2004, Bible Translation and Literacy