Mapisarema 51
51
Rwiyo rwokuchema zvivi
Kumutungamiriri wokuimba. Pisarema raDhavhidhi, panguva yakasvika muporofita Natani kwaari, iye apinda kuna Bhatishebha.
1Ndinzwirei tsitsi, Mwari nokuda
kwounyoro hwenyu;
Dzimai kudarika kwangu nokuda
kwengoni dzenyu zhinji.
2Ndisukei zvakaipa zvangu chose,
Ndinatsei chivi changu.
3Nokuti ndinoziva kudarika kwangu;
Chivi changu chinogara chiri pamberi pangu.
4Ndakakutadzirai imi, iyemi moga,
Ndakaita chinhu chakaipa pamberi penyu;
Kuti munzi makarurama pakutaura kwenyu,
Muve usina mhosva pakutonga kwenyu.
5Tarirai, ndakaberekerwa muzvakaipa;
Mai vangu vakandigamuchira muzvivi.
6Tarirai, munoda zvokwadi pamwoyo;
Munoda kundidzidzisa uchenjeri
mukati makavanda.
7Ndinatsei nehisopi, ndive akanaka,
Ndishambidzei, ndichene kupfuura mazaya echando.
8Ndinzwisei mufaro ndive nomwoyo muchena;
Kuti mapfupa amakavhuna afare.
9Vanzirai zvivi zvangu chiso chenyu,
Dzimai zvakaipa zvangu zvose.
10Sikai mukati mangu mwoyo wakachena, Mwari;
Vandudzai mukati mangu mweya wakarurama.
11Regai kundirasha pamberi penyu;
Musabvisa mweya wenyu mutsvene kwandiri.
12Dzoseraizve kwandiri mufaro wokuponesa kwenyu;
Nditsigirei nomweya, unoda.
13Ipapo ndichadzidzisa vadariki nzira dzenyu;
Uye vatadzi vachatendeukira kwamuri.
14Ndirwirei pamhosva yeropa, Mwari,
imi Mwari muponesi wangu;
Ipapo rurimi rwangu ruchaimbira
kururama kwenyu kwazvo.
15Ishe, zarurai miromo yangu;
Ipapo muromo wangu uchaparidza
kurumbidzwa kwenyu.
16Nokuti imi hamufariri zvibayiro;
ndingadai ndaikupai izvo;
Hamufadzwi nechipiriso chinopiswa.
17Zvibayiro zvaMwari mweya wakaputsika;
Mwoyo wakaputsika nowakapwanyika,
imi Mwari hamungaushori.
18Itirai Zioni zvakanaka nokuda kwenyu;
Vakai masvingo eJerusaremu.
19Ipapo muchafarira zvibayiro zvakarurama,
nechipiriso chinopiswa nechipiriso chinopiswa chose;
Ipapo vachabayira nzombe paaritari yenyu.
Zvasarudzwa nguva ino
Mapisarema 51: SNA2002
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Shona Union Version 2002