Revhitiko 4
4
Zvipiriso zvezvivi
1Zvino Jehovha wakataura naMosesi akati, 2“Taura navana vaIsiraeri, uti, ‘Kana munhu akatadza nokusaziva pachinhu chimwe chezvakarairwa naJehovha kuti zvirege kuitwa, akaita chimwe chazvo; 3kana mupristi wakazodzwa akatadza, akapinza vanhu pamhosva, anofanira kuvigira Jehovha nzombe duku isina mhosva, nokuda kwezvivi zvake zvaakatadza, kuti chive chipiriso chezvivi.’ 4Ngaauye nenzombe duku pamukova wetende rokusangana pamberi paJehovha, aise ruoko rwake pamusoro wenzombe, ndokuuraya nzombe pamberi paJehovha. 5Zvino mupristi wakazodzwa ngaatore rimwe ropa renzombe, ariise patende rokusangana, 6mupristi agonyika munwe wake muropa, ndokusasa rimwe ropa kanomwe pamberi paJehovha, pamberi pechidzitiro chenzvimbo tsvene. 7Zvino mupristi aise rimwe ropa pamberi paJehovha panyanga dzeatari yezvinonhuwira zvakanaka, iri mutende rokusangana, agodurura rimwe ropa rose renzombe mujinga meatari yezvipiriso zvinopiswa, iri pamukova wetende rokusangana. 8Zvino ngaabvise mafuta ose enzombe yechipiriso chezvivi, mafuta anofukidza hura, namafuta ose ari pamusoro pohura, 9netsvo mbiri, namafuta ari pamusoro padzo, ari pachiwuno, namafuta ari pamusoro pechiropa, ngaazvibvise pamwechete netsvo, 10sezvaanobviswa panzombe yechipiriso chokuyananisa nacho; zvino mupristi ngaazvipise pamusoro peatari yezvipiriso zvinopiswa. 11Dehwe renzombe, nenyama yayo yose, pamwechete nomusoro wayo namakumbo ayo, nohura hwayo, namazizi ayo; 12nzombe yose iyo unofanira kuitakurira kunze kwemisasa, pakanaka, panorasirwa madota, ndokuipisira pamusoro pehuni nomoto; ngaipisirwe panorasirwa madota.
13“Kana ungano yose yaIsiraeri ikatadza, chinhu icho chikasazikanwa neungano, kana vakaita chimwe chezvinhu zvakarairwa naJehovha kuti zvirege kuitwa, vakapara mhaka; 14kana chivi chavakatadza chikazozikanwa, zvino ungano ngaiuye nenzombe duku, chive chipiriso chezvivi, iwuyiswe pamberi petende rokusangana. 15Zvino vakuru veungano ngavaise maoko avo pamusoro wenzombe pamberi paJehovha, nzombe igourawa pamberi paJehovha. 16Zvino mupristi wakazodzwa ngaauye nerimwe ropa renzombe patende rokusangana, 17mupristi anyike munwe wake muropa, arisase kanomwe pamberi paJehovha, pamberi pechidzitiro. 18Zvino ngaaise rimwe ropa panyanga dzeatari iri pamberi paJehovha, iri mutende rokusangana; rimwe ropa rose agoridururira mujinga meatari yezvipiriso zvinopiswa, iri pamukova wetende rokusangana. 19Zvino ngaabvise mafuta ose aripo, aapise pamusoro peatari. 20Ndizvo zvaanofanira kuitira nzombe; sezvaakaitira nzombe yechipiriso chezvivi, ndizvo zvaanofanira kuitira iyi; mupristi anofanira kuvayananisira, vakanganwirwe. 21Zvino unofanira kutakurira nzombe kunze kwemisasa, andoipisa, sezvaakapisa nzombe yokutanga; ndicho chipiriso chezvivi cheungano.
22“Kana mukuru akatadza, akaita nokusaziva chimwe chezvinhu zvose zvakarairwa naJehovha Mwari wake kuti zvirege kuitwa, akapara mhaka; 23kana chivi chake chaakatadza akachiziviswa, ngaauye nenhongo yembudzi isina mhosva, chive chipiriso chake. 24Zvino ngaaise ruoko rwake pamusoro wembudzi, aiuraye panourayirwa chipiriso chinopiswa pamberi paJehovha, chive chipiriso chezvivi. 25Zvino mupristi ngaatore rimwe ropa rechipiriso chezvivi nomunwe wake, ariise panyanga dzeatari yechipiriso chinopiswa, nerimwe ropa rayo aridururire mujinga meatari yechipiriso chinopiswa. 26Mafuta ayo ose ngaapiswe pamusoro peatari, sezvavakaita namafuta echipiriso chokuyananisa; mupristi amuyananisire pamusoro pezvivi zvake, akanganwirwe.
27“Kana mumwe wavanhu zvavo akatadza akaita nokusaziva chimwe chezvinhu zvakarairwa naJehovha kuti zvirege kuitwa, akapara mhaka; 28kana chivi chake chaakatadza akachiziviswa, ngaauye nesheshe yembudzi isina mhosva, chive chipiriso chake pamusoro pezvivi zvake zvaakatadza. 29Zvino ngaaise ruoko rwake pamusoro wechipiriso chezvivi, auraye chipiriso chezvivi panourayirwa chipiriso chinopiswa. 30Zvino mupristi ngaatore rimwe ropa rayo nomunwe wake, ariise panyanga dzeatari yezvipiriso zvinopiswa, asi rimwe ropa rayo rose ngaaridururire mujinga meatari. 31Zvino ngaabvise mafuta ayo ose, sezvinobviswa mafuta ezvipiriso zvokuyananisa nazvo, mupristi agoapisa pamusoro peatari, chive chinhu chinonhuwira zvakanaka kuna Jehovha; mupristi anofanira kumuyananisira, akanganwirwe.
32“Kana akauya negwayana rokuita naro chipiriso chake chezvivi, ngaauye nesheshe isina mhosva. 33Zvino ngaaise ruoko rwake pamusoro wechipiriso chezvivi, agoriuraya panourayirwa chipiriso chinopiswa. 34Zvino mupristi ngaatore rimwe ropa rechipiriso chezvivi nomunwe wake, ariise panyanga dzeatari yezvipiriso zvinopiswa, asi rimwe ropa raro rose ngaaridururire mujinga meatari; 35zvino ngaabvise mafuta aro ose, sezvinobviswa mafuta egwayana pachibayiro chezvipiriso zvokuyananisa nazvo; mupristi aapise pamusoro peatari sezvinoitwa nezvipiriso zvose zvaJehovha zvinoitwa nomoto; mupristi anofanira kumuyananisira pamusoro pezvivi zvake zvaakatadza, akanganwirwe.
Zvasarudzwa nguva ino
Revhitiko 4: SNA2002
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Shona Union Version 2002