Kuungudza KwaJeremiya 1
1
Kutambudzika kweJerusaremu
1Haiwa, guta, rakanga rizere
navanhu, rinogara sei riri roga!
Iro, rakanga riri guru pakati
pamarudzi, rava sechirikadzi!
Iro, rakanga riri vamwoyo pakati
penyika, rovigira mutero.
2Rinochema zvikuru usiku,
misodzi yaro iri pamatama aro;
pakati pavadikanwi varo vose rinoshaiwa muvaraidzi,
shamwari dzaro dzose dzarinyengera,
dzashanduka vavengi varo.
3Judha aenda kuutapwa nokuda kwokutambudzika,
nokuda kwokubatiswa zvikuru;
vanogara pakati pamarudzi,
asi haavane zororo,
vose vaidzingana navo vakamuvata pakamanikana.
4Nzira dzeZioni dzinochema,
nokuti hakuna anouya kumutambo,
masuo aro ose akaparadzwa,
vapristi varo vanogomera,
mhandara dzaro dzinotambudzika,
iro romene rinovavirwa.
5Vadzivisi varo ndivo vava vakuru,
vavengi varo vanofara;
nokuti Jehovha akaritambudza
nemhaka yokudarika kwaro kuzhinji;
vana varo vaduku vakaenda kuutapwa
pamberi pomudzivisi.
6Kunaka kwake kwose kwakabva pamukunda weZioni;
machinda ake aita senondo dzinoshaiwa mafuro,
akatiza asine simba pamberi poanodzingana nawo.
7Namazuva okutambudzika nokudzungaira kwaro,
Jerusaremu rinorangarira zvose zvairifadza
kubva pamazuva akare;
panguva yakawira vanhu varo pamaoko omudzivisi,
kusina wakaribatsira,
vadzivisi vakariona,
vakaseka kuparadzwa kwaro.
8Jerusaremu rakatadza zvikuru kwazvo,
naizvozvo raitwa sechinhu chisakanaka;
vose vairikudza, vorishora,
nokuti vakaona kushama kwaro,
zvirokwazvo, rakagomera,
rikadzokera shure.
9Tsvina yaro yakanga iri panguo yaro,
harina kurangarira kuguma kwaro;
naizvozvo rakanyura zvinoshamisa,
harina munyaradzi;
tarirai, Jehovha, kutambudzika kwangu,
nokuti muvengi wazvikudza.
10Mudzivisi atambanudzira ruoko
rwake kune zvose zvaro zvinofadza;
nokuti rakaona marudzi achipinda
panzvimbo yaro tsvene,
vamakanga marayira pamusoro pavo
kuti varege kupinda paungano yenyu.
11Vanhu varo vose vanogomera,
vanotsvaka zvokudya;
vakapa zvinhu zvavo zvinofadza kuti
zvive zvokudya zvokusimbisa mweya yavo;
tarirai, Jehovha, muone;
nokuti ndaitwa wakazvidzwa.
12Nhai, imi mose munopfuura,
hamuna hanya nazvo here?
Tarirai muone kana kuchema
kuripo kwakafanana nokuchema kwangu,
kwakauyiswa pamusoro pangu,
kwandakatambudzwa nako naJehovha
nezuva rokutsamwa kwake kukuru.
13Akatuma moto mumapfupa angu,
zvichibva kumusoro, akavakunda;
akadzikira tsoka dzangu mumbure,
akandidzosera shure;
akandiparadza nokundishaisa simba zuva rose.
14Joko rokudarika kwangu kuzhinji
rakasungwa noruoko rwake;
zvakarukwa, zvaiswa pamutsipa wangu,
zvandishaisa simba rangu;
Ishe akandiisa mumaoko
avasingagoni kudzivisa.
15Ishe akashaisa simba mhare
dzangu dzose dzakandipoteredza,
akakokera ungano yakatarwa
kuzondipwanyira majaya angu;
Ishe akatsika mukunda mhandara
yaJudha sapachisviniro.
16Ndinochema nokuda kwezvinhu izvi,
maziso angu anoyerera misodzi,
nokuti munyaradzi,
aifanira kusimbisa mweya wangu,
ri kure neni;
vana vangu vasiyiwa,
nokuti muvengi akunda.
17Zioni rinotambanudza maoko aro,
hakuna angarinyaradza;
Jehovha akarayira pamusoro paJakobho,
kuti vakamupoteredza vave vadzivisi vake;
Jerusaremu riri pakati pavo sechinhu chakanaka.
18Jehovha akarurama,
nokuti ndakamukira murayiro wake;
doteererai imi vanhu vose,
muone kuchema kwangu;
mhandara dzangu namajaya angu aenda kuutapwa.
19Ndakadana vaindida,
asi vakandinyengera;
vapristi vangu navakuru vangu
vakaparara muguta,
panguva yavakanga vachizvitsvakira
zvokudya kusimbisa mweya yavo.
20Tarirai, Jehovha, nokuti ndiri panjodzi,
mwoyo wangu unotambudzika;
mwoyo wangu washanduka mukati mangu,
nokuti ndakakumukirai kwazvo;
kunze munondo unonditorera vana,
mumba makaita somuno rufu.
21Vakandinzwa ndichigomera,
hakuna anondinyaradza;
vavengi vangu vose vakanzwa nhamo dzangu,
vanofara kuti makazviita;
muchauyisa zuva ramakatara,
ipapo vachafanana neni.
22Zvakaipa zvavo zvose ngazviuye pamberi penyu;
muvaitire ivo sezvamakandiitira ini
nokuda kwokudarika kwangu kwose;
nokuti kugomera kwangu kuzhinji,
mwoyo wangu washaiwa simba.
Zvasarudzwa nguva ino
Kuungudza KwaJeremiya 1: SNA2002
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Shona Union Version 2002