1 VaKorinde 2
2
Pauro haana kuparidza nouchenjeri hwenyika
1Zvino ini, hama dzangu, pakuuya kwangu kwamuri, handina kuuya ndichikuparidzirai uchapupu hwaMwari nokunaka kwamashoko, kana kwouchenjeri. 2Nokuti ndakati, handingazivi chinhu pakati penyu, asi Jesu Kristu iye akaroverwa pamuchinjikwa. 3Ndakanga ndiri pakati penyu noutera, nokutya, nokudedera kukuru, 4neshoko rangu nokuparidza kwangu hazvizaiva namashoko okugombedzera ouchenjeri; asi nokuratidza kwoMweya nokwesimba; 5kuti kutenda kwenyu kurege kuva muuchenjeri hwavanhu, asi musimba raMwari.
6Zvino tinotaura uchenjeri pakati pavakakura; asi uchenjeri husati huri hwenyika ino, kana hwavabati venyika ino vanoshayiswa simba. 7Asi tinotaura uchenjeri hwaMwari hwakavanzika, hwakafukidzwa, hwakatemerwa kubwinya kwedu naMwari, nyika isati yavapo; 8husina kuzikanwa nomumwe wavabati venyika ino; nokuti dai vaihuziva, vangadai vaisarovera Ishe wokubwinya pamuchinjikwa. 9Asi sezvazvakanyorwa, zvichinzi,
“Izvo zvisina kuonekwa neziso, kana kunzwika nenzeve,
Nezvisina kupinda mumwoyo womunhu,
Ndizvo Mwari zvaakagadzirira vanomuda.”
10Nokuti Mwari akazviratidza izvo kwatiri isu naMweya; nokuti Mweya anonzvera zvose, nezvakadzika zvaMwari.
11Nokuti munhu ndoupiko anoziva zvomunhu, asi mweya womunhu uri maari? Saizvozvo hukuna munhu anoziva zvaMwari, asi Mweya waMwari. 12Zvino isu hatina kugamuchira mweya wenyika, asi Mweya unobva kuna Mwari; kuti tizive izvo zvatakangopiwa hedu naMwari.
13Ndizvo zvatinotaurawo, tisingatauri namashoko atinodzidziswa nouchenjeri hwomunhu, asi anodzidziswa naMweya; tichidudzira zvinhu zvoMweya kuvanhu voMweya. 14Zvino munhu sezvaakaberekwa haagamuchiri zvinhu zvoMweya waMwari; nokuti upenzi kwaari; haazvinzwisisi, nokuti zvinonzwisiswa naMweya. 15Asi ari woMweya anonzwisisa zvose, asi iye amene haanzwisiswi nomunhu. 16Nokuti, “Ndianiko akaziva murangariro waIshe, kuti amudzidzise?” Asi isu tinomurangariro waKristu.
Zvasarudzwa nguva ino
1 VaKorinde 2: SNA2002
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Shona Union Version 2002