Juan 16
16
1Mga bagay ngaytung ituꞌun, ipagsugid kuytung lagi it imyu isaꞌun ega subuk makakleb kamu it mga mabetangan mi, nga kumurang i pamayaꞌ mit aken. 2Siguradu yang awaꞌen i pagkaJudio mi. Mabut i timpu nga in siyu-siyuy mimatay it imyu, kat pasepsep ya, tanud ya magayeng ipagsirbi duꞌun it Ampuꞌang Diyus i pagbuwaten ya ngayti. 3Talagang buwaten niraytu sabap it ega magkakilalaan nira aku, atnagay Amaꞌ. 4Ipagsugid ku naytung lagit imyu isaꞌun pagꞌabut it timpu nga buwaten nira na, mademdeman mi nga nakasugid ku nang lagit imyu. Kaꞌlay ngaytu, ega paytu ipagsugi-sugid kut imyu i itu nga mga bagay, ka kaꞌiba-iba mi paꞌ aku.”
Buwat it Manigtabang ngaytu, itanyag yay kamaliꞌ nga pasepsep it mga ega magpamayat ki Jesus, baw padakulaꞌen yay kasepsep it magpamayaꞌ na
5Inaat paꞌ ni Jesus, “Kayti, muliꞌ aku na duꞌun it nagtaꞌeg it aken, temed egay maski esat imyu nga magꞌingkut sabap it uliꞌan ku ngaytu. 6Ta it kayti nga ipagsugid ku nat imyu, ereꞌeret na nga raꞌe-raꞌet it nakem mi. 7Temed matuud nagaytu i ipagsugid kut imyu, nga pagliꞌid ku ngaytu, ikagayen mi naga, sabap ega paꞌasitut imyu i Manigtabang in ega limꞌid aku. Temed in magliꞌid aku, taꞌgen ku kanya nga paꞌasitut imyu.
8Pagꞌabut it Espiritu Santo nga Manigtabang ngaytu, itanyag ya nga kamaliꞌ i pasepsep it mga taw nga ega magpamayat aken. Kamaliꞌ i pasepsep nira pasar it kasalaꞌan, kataldengan baw pangukuman it Ampuꞌang Diyus sabap it kasalaꞌan. 9Itanyag ya nga kasalaꞌan nira talaga i daꞌsira magpamayaꞌ it aken. 10Pasar it kataldengan, itanyag yat kanira nga mataldeng aku naga, kamatuudan, muliꞌ aku na duꞌun it Amaꞌ ku. Ega nayan malte-maltegan mi aku. 11Pasar it pangukuman sabap it kasalaꞌan, itanyag ya nga inukumanan na si Satanas ngaytu nga magsasakep situt sinirungat langit.
12May beken paꞌ sana nga ipagkusugid kut imyu, temed it pagsesmeken kamu, ega paꞌ kaya mi nga sepsepen kayti. 13Temed pagꞌabut it Espiritu Santo ngaytung Manigpaꞌrut it kamatuudan, kanya i tumabang it imyu isaꞌun masepsepan mi nga banar i muꞌsa nga kamatuudan. Ega yan manadili kanyat mampang, in daꞌga yay isugid yat imyu, in unuy magkagnegan ya duꞌun it Amaꞌ. Baw ipaꞌyag ya gasiꞌ it imyu i mga bagay nga magꞌaꞌabut. 14Ipalteg yay kadakulat kabantugan ku, ka purus garing situt aken i muꞌsang sugiden yat imyu, nga mga ampang baw buwat kuy ipaꞌyag ya. 15Iyan muꞌsa nga duꞌut Amaꞌ, aken gasiꞌ. Aypaꞌ inaat ku nga manggaring it aken i ipaꞌyag yat imyu.”#16:15 Mateo 11:27.
Talagang makuriꞌan i mga magpamayat ki Jesus, temed kasmek nira, magbaraꞌ nga kasagyaan
16“Dekeyeꞌ mana nga timpu,” maat paꞌ ni Jesus, “ega na maltegan mi aku. Magtaꞌlib siꞌ i dekeyeꞌ nga timpu, maltegan mi siꞌ akut sumaꞌup.”
17Mamagreteng-reteng i beken nga mga alagad ya ngayti. Maat nira, “Unu bay pagꞌaaten ya ngaytu? Unuka inaat ya nga, ‘Dekeyeꞌ mana nga timpu, ega na maltegan mi aku, bawnga dekeyeꞌ siꞌ nga timpu maltegan siꞌ it sumaꞌup’? Baw maat ya gasiꞌ ngayan, ‘Sabap muliꞌ aku na duꞌut Amaꞌ.’” 18Sigi nga reteng-reteng nira nga magꞌaat, “Unuytuy ireg sugiden it dekeyeꞌ manang timpu? Ega magkasepsepan taytu.”
19Namuyaan ni Jesus nga kuꞌingkut sirat kanya, aypaꞌ inaat ya sira, “Subung it magꞌingku-ingkutun kamu sabap duꞌut inaat ku ngayti nga dekeyeꞌ manang timpu daꞌku na maltegan mi, baw magtaꞌlib gasiꞌ i dekeyeng timpu, maltegan mi siꞌ akut sumaꞌup. 20Matuud tuy iꞌaat ku ngaytut imyu, nga sumgaw kamu baw rumaꞌe-raꞌet nga banar i nakem mi, temed kadakel it mga kalaban ku, sumagya nga banar. Talagang ega basta-bastay kasmek mi, temed kasmek mi ngaytu, magbaraꞌ tu nga kasagyaan. 21Daꞌga baꞌ, in pagbusgan nay magbebteng, talagang ega na magaye-gayen i pikir ya, sabap naꞌbut nay uras nga maglabay i bilug ya it kakuriꞌan? Temed pagkapanganak ya, subuk nalipatan ya nay kakuriꞌan ya ngaytu. Masagya siꞌ kanya sabap duꞌut waꞌwaꞌ ngayti nga ipiyanganak ya. 22Kamu, atkayan naga yan. Kayti masmek kamu, temed makitaan mi naga yan aku. Sikayan subrang-subraꞌ siꞌ i kasagyaan mi. Baw kasagyaan mi ngaytu, magꞌuꞌunay na, nga ega maꞌawaꞌ it maski siyu. 23Ega na kaꞌilangan pang mingkut kamut aken it iyang aldaw, ka nasepsepan mi na.
Kamatuudan talagaytu nga iꞌaat kut imyu, nga in unu-unu nga angutun mi duꞌun it Amaꞌ kat keseg it pakilagpit mit aken, siguradung ibgay yat imyu. 24Seked kayti, ega pay pagꞌangutun mi kat keseg it pakilagpit mit aken. Mangut kamu. Siguradung ibgay it imyu baw sikayan makasagya kamung banar.
25Iyan mga itu ngaytu, ipiyagꞌaat kut imyu it paꞌalimbawa lamang. Temed mabut i timpu nga ega na atkaytuy pakisugi-sugid kut imyu. Raparan na nga isugid kut imyu i pasar it Amaꞌ. 26Kat aldaw ngayang iyanꞌen, mangut kamu duꞌut kanya kat keseg it pakilagpit mit aken. Ega na maat kaꞌilangan pang ipanalangin ku kamu duꞌun it Amaꞌ. Diritsu nay panalangin mi duꞌun it kanya. 27Sabap pagmaꞌalen kamu nayang banar it Amaꞌ, ka pagmaꞌalen mi na aku baw magpamayaꞌ kamu nga garing aku duꞌun it Amaꞌ. 28Talagang garing aku duꞌut Amaꞌ bawnga limnampud aku nga naꞌasitut banwa ngaytu. Ta kayti, limꞌid aku na situt sinirungat langit ka muliꞌ aku na duꞌun it Amaꞌ.”
29Mampang i mga alagad ya ngayti, maat nira, “Kayti talagang rarapar nay pakisugi-sugid mu ngaytut amen, ega na aꞌalimbawa. 30Kayti magkaꞌrutan namen nga urut mu nay muꞌsang bagay. Ega kaꞌilangan mu nga ingkutun ka it maski siyu isaꞌun maꞌrutan mu in unuy kat pikir ya, sabap maski ega paꞌ ipiyalbaw yay kuꞌingkutun ya, urut mu nang lagi. Sikayan pagpamayaꞌnen namen na nga talagang ikaw, garing nga matuud duꞌun it Ampuꞌang Diyus.”
31“Ay unu,” maat ni Jesus, “magpamayaꞌ kamu na kayti? 32Temed ta, mabut yan i uras, kayti na ngaytu, nga matari-tariwanak kamu. Manganya-kanya kamu nayan it uliꞌ duꞌut kanyang pagꞌiꞌistaran. Tananan mi nayan aku. Takaꞌ ega naga yan kaꞌesa-esa aku ka iba ku nagay Amaꞌ ku.
33Isiyugid kut imyuytu isaꞌun may kaꞌimbengan it nakem mi kat pakilagpit mit aken. Talagang may kakuriꞌan mi naga yan, mintras situ kamu pat banwa ngaytu. Temed paksegen mi i nakem mi ka aku ngaytu, diyaꞌeg ku nay magsasakep situt sinirungat langit.”
Zvasarudzwa nguva ino
Juan 16: TBWONT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 1992, Wycliffe Bible Translators, Inc. All rights reserved.